Read Lamnso Ŋgaà Yen 12 Bible Online

Ŋgaà Yen 12 - Lamnso bible

Ŋgaà Yen 12

¹M yén, aá din kileèy ke kinyò kímóʼ kí é mbàʼ, m yén vinyo ve tavkín ví. Wiíy wùmòʼ fəə́ fó, a shùy njaʼkìr fo wùn wó, a dzə̀ ndzə̀y sə́ bey, a wúu rəə́ tíy a dzə̀ é ŋwee, a wù sóv ntáráʼ é kitu, a dzə̀ shijiy nshòv sibaà e ghvə̀m.

²Wù‑uù dzə̀ e bvə́me, a sì ghán se wù‑uù yíi a dzəə́. Wù nèn a lum e ŋàŋ, a yu nyár, a toŋ.

³M kfən yèn kímóʼ kee kinyo e mbàʼ foo fèy. Kintìŋ ké kigàgǎʼsòŋ kímóʼ kí fəə́ fó, a kí baŋ bàŋèn, kér kitú saàmbà, e loŋ si shó e ghvə̀m. Kitú kimòʼón kimòʼón ki wáa ker ntáráʼ.

⁴Kigàgǎʼsòŋ kin ki wáa tsənsí kún, a yèr yúv shó, mejiy mè wáa kerkír, a gbù fo nsay. Mejiy mè lóo dzə metaár, wù kèr shee shimòʼón. Wù yèr bèy, e nèn wìy, e tìím e wiíy wo wù lúm və̀y si ji wù dzəə́ wán, é wun wàá mey.

⁵Wù dzəə́ wán lumèn, a dzə̀ wán wo wù‑uù wíy tatí ndzə e dzə̀m, a saʼ e ŋkǒmbàŋe, a dzə̀ kisha. Mo wàn shemen é kiwo, á nèn tùʼ, e kòʼ shó e yuv, wù wáa dzə e Nyùy ghaa kàvàʼ.

⁶Wun woo wiíy nèn tùmnín kfə́, e nyèŋ, e dù, a dzə e kwaʼ fo Nyùy‑iì naŋsin kirə́ʼ ji wù wáa beètì sho kishiíy kishóv mntuùfú é ghiì baà é nsə̀kì (1,260), é wun wáa leéy fo wun.

⁷Rə́r sí nèn lò, e sàsìn, e gbù e Nyùy wòŋ woó yuv. Nshìylav Nyùy ye kuʼùn ye á yoŋ ji Mayker báʼtí nshèelav sə́, wùn à kigàgǎʼsòŋ kiy ki tám.

⁸Wù só kigàgǎʼsòŋ wùn à wír vəə́, e jùm fo yuv, bìʼ fo bó yòʼ‑oò dzə̀ á kfə̀n màʼtì, á wàa dzə fo gheéy.

⁹A kintìŋ ke kigàgǎʼsòŋ ke vé‑eè jùmèn kin ki dzə̀ yó ye yì‑iì siìn fó ŋgùʼ, a dzə̀ wun wo wù ghán ndzə e dzə̀m, bóʼti wíri, aá yoŋ yír rə́ ji Satan, a dzə̀ ji Tavmènàŋ. A vé‑eè jùm, e màʼ a dzə̀ é nsay wùn à nshèelav sə́ sí sidzə̀m.

¹⁰M nèn yù, a jì súŋnin e yuv kitávín, suuy jii, «Á lèn və̀n wo Nyùy wor səən ne wíri, á lúŋ. Wù neèr ne sáʼ rə́ ye tavíné lèn, wíri yén ji dzə̀ wun Fon. Á kfən yèn sá mo vikuʼùy vé Wan və woo Mfə̀ə́r ví dzəə̀n. Á jùm ne wír wo wù rə́si wiy, yén Nyùy e shùy, yén vitsə́ʼ, tóy vinyo aàfə́r vérí bàm.

¹¹Yii bèy, aáwune ghàʼ ne wun, bìʼ fo vé‑eè tíy kév a dzə̀ é mensə me Wàn Njiì Nyùy, fiʼtì a dzə̀ kinyo ke Nyùy, e kfə̀n biìmé kpú bìʼ kinyo kee shooy.

¹²Woŋ woó yuví ku nèn a sheʼrí, é wír ve á dzəə̀n fóo wáa sàvnìn adzə̀m. Yii bèy, a ŋgeʼ dzə̀ ye wìr ve á dzəə̀n kév é nsay wùn à vifá ve ví dzəə̀n é ndzəv ví, bìʼ fo Satan səyin ne e nsay. A wù sə̀y féyì wùn à dòʼshwiíy wo ghaʼán, a wù kì ji ghán sə́ sí bèr ne a shishàr.»

¹³Mo á màʼàn kigàgǎʼsòŋ kiy fo yuv, kí lòo yen ji wun kù sì á kifá keé nsay, e nèn kèʼ, a ròn wuú wiíy wo wù dzəən wán woo lumèn və̀y, a dù.

¹⁴Á nèn fò vav e wiíy, a dzə̀ yé lùŋ wo wiy mo dzə̀ wù fèŋ, e nyèŋ kigàgǎʼsòŋ kiy, e dù, e lìr e kwaʼ fo vé‑eè naŋsin kirə́ʼ ji wù du, e dzə̀ʼə̀m sho viyá vitaár e kimbéʼ ki, aá wáa leéy fo wun.

¹⁵Wù léʼ, e dù fo, kigàgǎʼsòŋ kiy ki nèn sìíy, e cù ndzə́v fó shuù, yí wáa leŋ, a dù fo ji yí leér á wiíy woo shooy.

¹⁶Yii bèy, nsay shám wiíy woo shooy, e mvə̀ʼ shuu, e fùv ndzə́v ye kigàgǎʼsòŋ kiy ki kì cuun shó bèn e dzə̀m.

¹⁷Wù yén bey, e màysì, e shwìíy kilòŋ fo wiíy və̀y, e nèn fəə̀ ji wun du, e kèʼ rə́r, a màʼ kfə́ə wiíy woo shooy ye yí berin, a dzə̀ áwune ve á lem nsər se Nyùy, tíy a dzə̀ é kinyò ke Jesus.

¹⁸Kigàgǎʼsòŋ kí nèn dù, a tiy e ghaa rìbà ndzəv.