Read Lamnso Ŋgaà Yen 13 Bible Online

Ŋgaà Yen 13 - Lamnso bible

Ŋgaà Yen 13

¹M nèn yèn, a nyàm ye beemén fəə́ fó rìbà ndzə̀v fey, a yì kér kitú saàmbà, e loŋ si shó e ghvə̀m, a loŋ e mòʼón mòʼón sóv ntáráʼ. Aá sáŋ yír e mòʼón vitú vee saàmbà vìy vidzə̀m, a dzə̀ liy ye yì kuu a dzə̀ Nyùy.

²Nyàm ye m yenen rə̀n shwínin baá, bo vighiy və́ ví wáa dzə vé nyám ye á yoŋ ji *bear, é shúu wáa dzə wó bvərə̀ʼ. Kigàgǎʼsòŋ kí nèn fò vitaáví və́ vé saʼ e nyàm rə̀n, e dzə̀ʼə̀r e wùn kàvàʼ ji fon wo ghaʼán.

³Mo kitú ke nyàm rə̀n ki dzəə̀n saàmbà, kee kimòʼón ki kér kileémé a dzə̀ ke wìr lóo leéy, wù kù a yen ji wù‑uù kpù á ne.[1] Yii bèy, fóo ku yòʼ bònén, nyàm rə̀y lùŋ, wíri wáa leéy, a ker gháʼ. Kitú ke nsay kidzə̀m ki nèn lò, a gbù e wùn wó,

⁴a ghvəm ji Nyùy, e kfə̀n a ghvəm kigàgǎʼsòŋ, bìʼ fo foon kigàgǎʼsòŋ vitaáví və́ shó, bo wù wáa saʼ wíri. Á wáa ghvəm nyám rə̀n bèy, a suúy jii, sà mèé la moo nyám rə̀n a? Wìr sà dzə̀ shó wo dzə̀ wùn wun tàm á?

⁵Nyàm rə̀n ku nèn a taa e kàvàʼ mo Nyùy‑iì màʼtìn ji wù sáʼ ŋwee nshòv sibaà e mkweè, e kfə̀n màʼtì ji wù wáa sevtí kinsevtì, a kuù wun woo Nyùy mo wù koŋè.

⁶Wù ku nèn a kuù Nyùy, a yòŋrì e yír se bi sí, a kuù láʼ rə́ yeé yuv wùn à wír ve á dzəə̀n shóo adzə̀m.

⁷Á kfən màʼtì sa ji wù maʼ rə́r wùn à wír Nyùyi, e tòn áwune, e sə̀ vitaáví, a saʼ wir dzə̀m, kìn dzə̀ woŋ vəné, kìn dzə̀ kitúm kiné kí, kìn á súŋnin a dzə̀ lám gha, kìn dzə̀ kfə́ə wìr msòŋ rəné, é wù kú a saʼ.

⁸Kù dzə̀ mo wír veé kitu ke nsay adzə̀me wíy a ghvəm nyám yee shooy ji Nyùy, a yu fo fo. A kù wíy a ghvəm wír adzə̀m ve bó á yòʼ‑oò lo sàŋ yír sév é ŋwàʼ Wàn Njiì wo vé‑eè yuyrin. A ŋwàʼ və̀ne dzə̀ wo vé‑eè saŋen yír sé wìr ve á kù‑uù wíy lùŋ sho, é bo ndzə wìy a kèʼ.

⁹Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù.

¹⁰A wìr‑iì sì wo á kù‑uù wíy koo, bo dzə̀ á kù koò. A dzə̀ wír, a kí‑iì sì ji wù wíy kpu rə́r, bo wù kù wíy kpu. Wír ve dzəə̀n vé Nyùyi ku nèn a way kév a dzə̀ shilív e Nyùy wùn, a tiy kitávín, e dù, e jòʼsì.

¹¹M kfən yèn nyám ye beemén yìmòʼ, a rə̀n fəə́ a dzə̀ fó nsay. Yì‑iì kér loŋ sibaà, shwínin wan njiì, bo jì rə wáa dzə ye kigàgǎʼsòŋ kiy.

¹²Yì nèn shèm mbìy nyàm ye yì‑iì siìn rə̀y, a ker vitaáví a dzə̀ vé nyàm yee shooy, a yiì, wír veé kitu ke nsay adzə̀me wáa ghvəm a dzə̀ nyam mbìy rə̀y ji Nyùy. Nyàm rə̀n dzə̀ ye vé‑eè lemerin e dzəə ye dzə̀ yì kù kpù, yii bèy, yì bónén.

¹³Yì nəə́ lim bèy, e nèn a yiì viŋgaʼnìn ve vinyò, a fo sho. Lo, wù wàa yiì, və́yí wàa səy fo yuv, wíri wàa yen.

¹⁴Nyùy ku nèn màʼtì wùn nyàm yee fó mbìy rə̀y wáa ghan, yì wáa yiì viŋgaʼnìn ve vinyò bèy, e bòʼtí wír veé ndzə sho adzə̀m. Yì nèn wìy lò, e bàyrí wíri, á fèr kibámmbó ke kí wáa shwinín nyam mbìy ye vé‑eè lemerin e nyùy, bo yì bónén rə̀y.

¹⁵Yì nèn a ker vitaáví ve dzə̀ yì fò kiyoy e kibámmbó kiy ki ji kí wáa ŋèʼ, a suŋnín, é wìr dzə̀m wáa ghvəm ji Nyùy. Wìr téné, é kí yúyrí.

¹⁶Yì kfən kàn ji wìr kér a fó sə nsáŋtí e wùn kiwo ke yìy kí, kìn wù sə́ e yírvishi. A wìr dzə̀m kù‑uù kér fó sə, kìn dzə̀ wír wo kuʼùn, kìn dzə̀ wo terí, kìn dzə̀ ŋgaà kav, kìn dzə̀ ŋgaà kitàn, kìn dzə̀ wan wòŋ, kìn dzə̀ kwàn.

¹⁷A bó yòʼ dzə̀ wìr yùn kifá, a bó yòʼ dzə̀ wù fiìnè ke fiinèn kí, a bó wù kér nsáŋtí woo shooy e wun wùn. A nsáŋtí və̀y din yír nyàm mbìy rə̀y, aá sáŋ a dzə̀ e sí se ŋwàʼ se á yii táŋ kifá sho si,

¹⁸a sí dzə̀ jii, nshòv ntuùfú e mntuùfú e ghií ntuùfú (666), sí wáa dìn yír a dzə̀ yé wìr. Wìr wo wù kér vifií, ŋgaàŋ fiʼsin nsáŋti nyàm ye beemén rə̀n, e shù ŋgaàŋ.