Read Lamnso Ŋgaà Yen 14 Bible Online

Ŋgaà Yen 14 - Lamnso bible

Ŋgaà Yen 14

¹M kfən lòo leéy, e yèn Wan Njiì Nyùy, a wù tíy e kitu ke Gwan *Sion wùn à wíri nsə̀kì nshòv sikweè e mkweè e wiì (144,000), a dzə̀ ve vé‑eè saŋen yír wun woo Wan Njiì wùn à yé Tàr woví aáwuné yírvishi.

²M yú, a kiyor ki wiy fo yuv, koó mo tàtí kóŋ sí, a gbù, kfə̀n báykir moo kishèv. Fóo kfə́n a bìŋrì bìŋrìn mo bàʼtí wíri, a kùm lúŋ.

³A dzə̀ màŋgòŋ və̀y mo wù yov luŋ, aá tiím, a leéy kàvàʼ Nyùy wùn à vifá vee vikweè ve ví dzəə̀n é ghaŋ wo vi, à kfə́m see nshòv sikweè e mbaà siy si. Luŋ wo áwune‑eè yov və̀ne dzə̀ wo fíyi, a kù kì áwune, a bó yòʼ dzə̀ wìr wùmòʼ yèʼéy, e shaà áwune ve Nyùy‑iì tàrìn fo wír veé nsayi, á lùŋ.

⁴Mo áwune ghvə́m a dzə̀ Wan Njiì Nyùy, á nén a dzə là shilóm moo wánlè lùmèn wo bó yòʼ dzə̀ wù kùm wiíy, kù dzə́, shiy a dzə̀ və́ə. Áwune ku nèn a jùmrì a dzə̀ wun woo Wan Njiì Nyùy, wùn áwune wáa dù fo wù du. A Nyùy‑iì shòʼtí ne áwune, e fə̀ə́r fo wìr msǒŋ mvəm, wáa dzə wír mbìyi ve kér wun woo Nyùy wùn Wan və wo á yoŋ ji Wan Njiì.

⁵A bó áwune yòʼ‑oò yiì ne mèŋ Nyùy gheéy, aá dzə́ kév là jay.

⁶M nèn kfə̀n yèn nshìylav Nyùy yìmòʼ, a yì féŋ, shaa e yuv, kér sáʼka wo wù kù wíy a dzə e juŋ ghán sidzə̀m, e dù, e jòʼsì, a wù wíy ji wun fiʼti e wír veé kitu ke nsayi adzə̀m. A dzə̀ ji woŋ e dzə̀m wùn à vitúm vi vidzə̀m, kìn ví súŋnin a dzə̀ lám vəné, e kfə̀n fìʼtì e kfə́ə wìr msòŋé e dzə̀m.

⁷Wù wáa wìy, a jàŋ kitávín jii, á wáa fàn Nyùy, a burí vitaáví və́. Ghán se wù sí yìi tàr vinyo ve wíri, e tinén si ghèén a ne. Á wáa ghvəm wun ji Nyùy. Dzə̀ wun wo wù‑uù bomen yúv wùn à nsay, e fə̀ə́r rìbà ndzə̀v wùn à ntòŋ sé ndzəv sí.

⁸Nshìylav Nyùy rə̀y lòo jàŋ bèy, yìmòʼ nèn bàtír, a jàŋ kfə́ jii, «*Babilon gbù ne. Wù gbù a ne. Ŋkàlaʼ ye kuʼùn gbù ne. Yì‑iì səŋrì vitúm vidzə̀m moo sàkì, aá kaári, nó visàkì və́ ve ghaʼán ví moo meluʼ.»

⁹Yìmòʼ yee nshìylav nèn kfə̀n a jùmrì see sibaà siy, a jàŋ kfə́ kitávín jii, «Wìr wo wù ghvə́m kibámmbó ké nyàm, yoŋ ji Nyùy, kfə̀n kér nsáŋti nyàm rə̀y e wùn kiwo, kìn dzə̀ é yírvishi,

¹⁰ŋgaàŋ kù wíy no meluʼ me Nyùy me bi mè. A dzə̀ ŋgeʼ ye tavín ye Nyùy wíy way e wùn bàr, a ŋgaàŋ kù kér fó jiiyí e dzə̀m. Ŋgaàŋ wíy a rəsí, a saŋrí e və̀y wo wú shwí, baári moo mekàŋ, a Wàn Njiì Nyùy wùn à nshèelav sə́ sí leeyì.

¹¹Aáwune ve á ghvə́m nyám, kfə̀n ghvə́m kibámmbó kfə́, kér nsáŋtí wo wù din yír rəə́, kù wíy a saŋrí e və̀y bey, e làa yòʼ a ker meemè gheéy, kìn dzə̀ e shùy, kìn dzə̀ vitsə́ʼ, é kindzə́ʼ ki wáa koʼ fo fo ghán sidzə̀m, viyá viyá là may.

¹²Kí nén a dzə jii, wír ve dzəə̀n vé Nyùyi kú a tiy kitávín, e dù, e jòʼsì, a lèm nsər se Nyùy, e kù a way shilív a dzə̀ e Jesus wùn.»

¹³M yú, a jì yìmòʼ yóŋ mo fó yuv, e sùúy jii, «Sáŋ kinyo kìn ki. Kèʼ fo lèn, bòŋ ké wìr ve á kpú e Nyùy shùu lìm. A dzə̀ mo Kiyoy ke Nyùy ki bínsi ji dzə̀ á rú. Á wíy laamé áwune fó vinyò ve juŋ vi ve áwune‑eè rə́si yii. Kèʼ fo lèn, áwune sí yiì a yu vijuŋ, e meèmè fo áwuné akwiiròn.»

¹⁴M nèn kfə̀n lòo leéy, e yèn mbàʼ ye fəvír, a kifá ki dzə́ sho, shwínin wír. A wù sóv ntáráʼ wo á fèrìn e *kisha ke mbàm ki, kfə̀n kér loòjèé é kiwo, aá baáy ben kijuŋ.

¹⁵Nshìylav Nyùy yìmòʼ nèn fəə̀sín fo Nyùy lav yeé yuv, a jàŋ wír wo wù‑uù dzə́ e kitu ke mbàʼ və̀y kitávín, a suúy sho jii, «Ràmsì loòjèé wò, e kàv vifá vi fó ndzə. Ví bìy ne, e ghèén, a sì ghán sé kav.»

¹⁶Wìr wo wù kì dzə́ e mbàʼ və̀y nèn tsə̀nsí loòjèé və é nsay, e kàv vifá vìy sho.

¹⁷Yìmòʼ yee nshìylav nèn kfə̀n fəə̀ fo Nyùy lav yeé yuv rə̀y, a yì kér sa loòjèé, aá náŋsín, e baày.

¹⁸Yìmòʼ ye yì yii ton və́y é kiy cù, nèn lò fo ghaa kiy fèy, e fəə̀, e jàŋ ye yì kér loòjèé wo njimén rə̀y kitávín jii, «Leéy kitú ke nsay ki, e yèn. Báŋ se kici ke á yii koy, fer meluʼ sho si bàŋ ne. Tsə́nsí loòjèé wò, e kàv.»

¹⁹Wù nèn tsə̀nsí loòjèé və, e kòy kicí shó kitú ke nsay kidzə̀m, e bàʼtí, e sə̀r e Nyùy bii mo á yii sər kicí kee shooy e bii wo á nyeŋ sho, bo meluʼ mè wáa fəə. A wó Nyùy woo bií dzə̀ ŋgeʼ ye tavín ye wù maʼ e wírí kitu.

²⁰Bií Nyùy və̀ne dzə̀, aá fəə́sín ne fo Nyùy mvə̀mlaʼ. Á sə̀r kicí kiy sho, e nyèŋ, nèn fəə̀ mensə́. Mè léŋ, e dù, e mèé may ghii baà, e shoò kóy e fur.