Read Lamnso Ŋgaà Yen 15 Bible Online

Ŋgaà Yen 15 - Lamnso bible

Ŋgaà Yen 15

¹Á nèn kfə̀n dìn kileèy ke kinyò kímóʼ kí é mbàʼ. M yén viŋgaʼnìn ve vinyò, shuu wómé yúm. Mò‑oò yèn nshèelav se Nyùy saàmbà, a dzə̀ se sí kér kfəə́ se lòn see saàmbà se sí jòʼsìn bám. See shooy si shaa, bo Nyùy màysì ne ŋgeʼ se wù shwiiy kilòŋ, maʼ e ndzə sidzə̀m.

²M yén sá kirə́ʼ kímóʼ kí moo kibáŋ, a kí tíy ji nyoòŋ, yénsin moo kileèy, a və́yí baári fo fo. Wír ámóʼó wáa tiy e ghaa ndzəv fóo fèy, a dzə̀ ve wùn à nyàm ye beemén rə̀y‑iì tamen, áwune só. Áwune yòʼ‑oò ló a ghvəm kibámmbó kfə́, e kfə̀n tèn fó sə nsáŋtí və wo wú din yír rə́. Á wáa tiy e ghaa kibaŋ fey, a ker lúŋ se Nyùy foon aáwune,

³a kùm, a yòv luŋ Mooser woo *ŋgaà ntum Nyùy, e kfə̀n a yòv wó Wàn Njiì Nyùy. Aá yov jii: «Éè Nyùy Tàr, wò woo Nyùy woo Ŋgaà Vitaàví Vidzə̀m, vinyo ve à yii vi dzə̀ féyì, a wíri leey, kér gháʼ. À dzə̀ Fon wo wù sáʼ vitúm vidzə̀m, a sáʼ yée du tìítiy, là kiloʼ.

⁴Wìr woo là fó a fàn wò, a burí vikuʼùy vé dzə̀ la? Kù jòʼsì wò, wo à dzəə̀n e ránén vèn mòʼón. Vitúm vidzə̀m vi kù wíy a wìy, a gbù a dzə̀ e wò si, bìʼ fo á yén vinyo ve à yii vidzə̀m, a ví du tìítiy.»

⁵Kee shooy ki shaà, m yén, aá mvə́ʼ lav Nyùy yeé yuv, kirə́ʼ ke Nyùy dzəə̀n shó ki wáa yensín.

⁶Nshèelav se Nyùy se sí kì kér lòn woo saàmbà sìy si nèn fəə̀ fó lav Nyùy fèy, aá máʼ ndzə̀y se fəvír sí, a sí rán njaʼkìrì, e tìm vikuúví aáwuné vidìm, aá fér e *kisha ke mbàm ki.

⁷Kímóʼ kee kifá fo ve ví tíy e ghaa kàvàʼ vikweè ki nèn lì kighín saàmbà, e jàv e nshèelav see saàmbà sìy si, a dzə̀ lòn shó e rúnkín. A dzə̀ lòn wo Nyùy wo wù gòʼòn kàŋ mòʼón shwiiy kilòŋ, e màʼ e wírí kitu.

⁸Kindzə́ʼ ke Nyùy yii lóo dzə e kirə̀ʼ, kí wàa sətí fo wíri yén rán rə́ ye ghaʼáné kí nèn a ndzəʼ e lav Nyùy fèy, e sə̀tí. A bó yòʼ dzə̀ wìr nə̀ə́, e meé e ghan se nshèelav se Nyùy see saàmbà sìy si yíi màysì lòn woo saàmbà və̀y, e màʼ e ndzə.