Read Lamnso Ŋgaà Yen 16 Bible Online

Ŋgaà Yen 16 - Lamnso bible

Ŋgaà Yen 16

¹M nèn yù, a jì yìmòʼ súŋnin fo lav Nyùy fèy, yoŋ nshèelav se Nyùy see saàmbà sìy kitávín jii, «Vèn du, e cuùrì lǒn Nyùy wo wú dzəə̀n e věn vighin vee saàmbàa é kitu ke nsay.»

²Ye mbìy yee nshìylav nèn cuùrì kfə́ kee kighín é nsay. Viváv ve biibí ví koó wír ve á kér nsáŋti nyàm ye beemén rə̀y, ghvə́m kibámmbó kfə́.

³Nshìylav ye yì meen ji baà nèn cuùrì kfə́ kee kighín a dzə̀ é rìbà ndzə̀v. Wù bìnkìr, e kfə̀n moo mensə́ me ŋkfə kifa, kifá ke kí ŋeʼ e ndzəv kidzə̀m ki kpúkír.

⁴Nshìylav ye yì meen ji taár cuùrì kfə́ kee kighín a dzə̀ é ndzəv se sí léŋ leŋén, e kfə̀n cuùrì ntòŋ sé ndzəv sidzə̀m. Sí nèn bìnkìr ji mensə́.

⁵M yú mo nshìylav Nyùy ye yì màʼàn lòn é ndzəv rə̀y suuy jii, «Nyùy, à dzə̀ e ránén. Wò‑oò sì, aà kù dzə̀ lèn. À tìnén ne vinyo vìn réŋ.

⁶Wír vìne‑eè yúyri wír vé wùn aàŋgàa ntum vée, a mensə́ mè léŋé. Aà siìr ne ŋkfə́tír a dzə̀ mensə́, á wáa no. A dzə̀ mo dzə̀ á kù lòvtí aáwune.»

⁷M nèn yù, a jì yìmòʼ yíysí fó kiy cù, e bìnsí jii, «Eènà, Nyùy Tàr, wò woo Nyùy woo Ŋgaà Vitaàví Vidzə̀m, à tínen vinyo vìn réŋ féyì. A dzə̀ mo dzə̀ kí kù a dzə.»

⁸Nshìylav Nyùy ye yì meen ji kweè nèn cuùrì kfə́ kee kighín a dzə̀ é si shùy. Yì nèn màysì, a tònnìn moo və́y, e fíʼ tòn wíri.

⁹Yì ku nèn a mbaŋrí, a lùm, a tòn wíri tónen, virə́ʼ ví wáa bòvrì. Á nèn lò fo fo, a kuù Nyùy wo wù tsənsin kfəə́ se lòn sin kúun, e làa yòʼ fə̀m bìnèr melív mev, a ghvəm wun ghvə́mén gheéy.

¹⁰Nshìylav Nyùy ye yì meen ji tàn nèn cuùrì kfə́ kee kighín a dzə̀ é kitu ke kàvàʼ wo nyàm ye beemén rə̀y dzə́ sho. Woŋ wo nyàm yee shooy sáʼáa nèn sə̀n e dzə̀m, wíri wáa yu nyár, a saŋrí, a kfər viliímé,

¹¹e kù a kuù a dzə̀ Nyùy wo wù dzəə̀n é yuv, wo wù foon nyár aáwune wùn à viváv ví, e làa yòʼ fə̀m màʼtì vinyo vév ve bi ví gheéy.

¹²Nshìylav Nyùy ye yì meen ji ntuùfú nèn cuùrì kfə́ kee kighín a dzə̀ é ndzəv ye yí shaa e kuʼùn, aá yoŋ ji Yufret. Yí ku nèn yùm. A Nyùy‑iì yii bèy, ji afon ve á wíy a lò fo mbìv ye shùy yii tó fo fo, a wìy rə́rí fíʼ a ker dzə́ə yée tumsín sho.

¹³M yén vibáy vímóʼ ví vitaár, a ví kóʼoy, kiʼ moo vishàm. A kímóʼ kí fəə́ fo kigàgǎʼsòŋ kiy kí shuù, kímóʼ kí fo nyàm ye beemén rə̀y shuù, bo kímóʼ kí wáa fəə fo nyàm yee ŋgaà kimboʼtì rə̀y shuù.

¹⁴Vibáy vìn vi dzə̀ vé anyùy, a ví ghán kitú ke nsay kidzə̀m, báʼti afon ji á fíʼ wìy fəə̀, a màʼ rə́r é kishiíy ke Nyùy woo Ŋgaà Vitaàví Vidzə̀m wíy fəə, a nə̀r kóy.

¹⁵Kí nèn a dzə jii, á kuúmé á kinyo ke Jesus‑eè suuyin jii, «Vèn yú, m wíy sàsìn, e bvəy moo shóŋ. A bòŋ ké wìr wo m wíy lòo wìy, a wù dzə́ e ndzə̀y sə́ sí wùn, shiyì, fo m wìy sàsìn, e bvə̀y, é wù túm kinshóʼ, a ghan, a woomé.»

¹⁶Vibáy vìy vi ku nèn bàʼtí afon veé kitu ke nsay vìy e kirə̀ʼ kímóʼ kí, aá yoŋ e Lǎm Hibru ji Amagedon.

¹⁷Nshìylav Nyùy ye yì meen ji saàmbà nèn cuùrì kfə́ kee kighín a dzə̀ é shwer. Jì yìmòʼ súŋnín kitávín fó kàvàʼ wo wù dzəə̀n é lav Nyùy yeé yuv jii, «Kí ghèén ne.»

¹⁸Kishèv ki nèn kèʼ, a bàvkìr, a baykír, virə́ʼ ví wáa dzə̀mkìr. Nsay kfə́n a sə̀ʼ kitávín, virə́ʼ ví wáa kèrkìr. A bó yì yòʼ‑oò yiì ne sə̀ʼ e ŋàŋ bey, kèʼ mo wíri‑iì fəən é nsay.

¹⁹Ŋkàlaʼ ye kuʼùn wáʼkír, virə́ʼ ví nyéŋ, e jàv mbìv sitaár. Ntèʼ se kuʼkìn sí keèsì woŋ sidzə̀m, e kfə̀n é mboʼ. Á mo Nyùy‑iì kuumen joonè woó *Babilon wo vé‑eè yoŋ ji woŋ wo ghaʼáné‑eè yii. Nyùy shwiíy kilòŋ fo áwune é ŋàŋ, e kàn jii, á ku jiìyí a bàr wo wù wayin ŋgeʼ yev shó, e kànsí e dzə̀m.

²⁰Nsay sə̀ʼ bèy, woŋ se sí dzəə̀n é ntìntìn ndzə̀v sí nèn làykìr sidzə̀m, aàgwan adzə̀me sə́y e nsay.

²¹Lúm se mentiy si wáa gbù moo vilán e wírí kitu, á kú a kuù Nyùy wo wù tsənsin mentíy, wíri wáa yen ŋgeʼ ye ghaʼán.