Read Lamnso Ŋgaà Yen 17 Bible Online

Ŋgaà Yen 17 - Lamnso bible

Ŋgaà Yen 17

¹Yìmòʼ yee nshìylav Nyùy ye áwune kì kér kighín kee saàmbà kìy nèn wìy, e sùúy e mò jii, «Ku wìy, é m din e wò mo á wíy lovtí e wiíy wo dzəə̀n kintìŋ ké sàkì ke ghaʼán kí. A wiíy və̀n dzə̀ ŋkàlaʼ ye á bàʼrìn fo ndzə́v sí néŋ e leŋ,

²aàfon veé kitu ke nsay adzə̀me báʼti, a wùn à sàkì woo shooy yii liì kisaŋ. Wír veé nsay adzə̀me wáa no sa meluʼ mvə me dzəə̀n liì kisaŋ woo shooy, a baakír.»

³Mo nshìylav Nyùy rə̀y suuyin bey, Kiyoy ke Nyùy ki nèn kfə̀n shòŋ mo, nshìylav Nyùy lì mo, e dù sho e kwaʼ. M yén wiíy wùmòʼ, a wù kóʼ nyám ye beemén, a yì baŋ bàŋèn, aá sáŋ yír se sí kuu Nyùy wún nyàm yee shooy e dzə̀m. Yì‑iì kér kitú saàmbà, e loŋ si shó e ghvə̀m.

⁴A wiíy və̀y máʼ ndzə̀y, a dzə̀ bvə́rì, e lòm kfəə́ se vifa e wùn vigháʼán, aá tón vímóʼ ví e *kisha ke mbàm ki, vímóʼ ví wáa dzə kfəə́ se *síbaŋ, vímóʼ ví wáa njàʼkìr njàʼkìn moo mentíy. Wù wáa ker bàr e kiwo, aá fér sá e kisha ke mbàm ki, a visàkì ve wù yii wùn à joonè vəə́ rún bàr woo shooy e dzə̀m.

⁵Á sáŋ yír yímóʼó é vishi wo, e yòv a dzə̀ é ŋgàn, a yí dzə̀ jii, «Babilon‑wo‑kuʼùn, Yìy‑aàsàkì, Ntoò‑liì‑kìsaŋ‑woó‑ndzə.»

⁶M yén, a wiíy və̀y baá mo koò meluʼ, a koó mensə́ me wìr Nyùy ve wù‑uù rə́si yúyri, a mè shaa e si wo, bìʼ fo á kù‑uù tíy kév a dzə̀ wùn à Jesus. M ku nèn a leéy wiíy və̀y bèy, a jaáy.

⁷Nshìylav Nyùy rə̀y dzə́r jii, «À jaay bèn ji ka? M yíi toʼtí mo nsàv wiíy wo à yén və̀n dzəə̀n, e kfə̀n toʼtí sa ye nyàm ye wù dzə́ e kitu wo, a yì kér kitú saàmbà e loŋ si shó e ghvə̀m.

⁸Nyàm ye à yén rə̀n dzə̀ ben, a yì‑iì kpù ne. Yì‑iì ló a dzə e tin, e bóo kpu. A yì kfə̀n wíy fəə fo biíntùr, a ŋèʼ. A yì fəə́ bèy ji yì ku nə̀ə́ lèn, a dzə̀ é lòn woo là may. Wír veé kitu ke nsay adzə̀me wíy a leéy nyám rə̀n, a ker gháʼ, bìʼ fo yì‑iì ló a dzə fo mbìy, e nèn lò, e kpù, e bóo kfə̀n a dzə sho lèn, a ŋèʼ. A kí kù wíy a ghaʼ a dzə̀ wír ve bó yír sév sí yòʼ dzəə̀n é ŋwàʼ wo vé‑eè saŋen yír sé wìr ve á kù‑uù wíy lùŋ sho é bo ndzə wìy a kèʼ.»

⁹Wù nèn kfə̀n sùúy jii, wír ve á kér vifií yuúrí, e shù a kinyo ke wun lo, a suúy kìn. Vitú ve nyàm vee saàmbà vi dzə̀ ji gwan woo saàmbà. A wiíy wo á yoŋ a dzə̀ láʼ və̀n, dzə́ e kitu ke agwan foo fèy. Vitú vìn vi kfə́n a dzə fon woo saàmbà.

¹⁰Vee atàne gbù ne fo afon vee saàmbà vìne, a woo mòʼón dzəə́ sáʼá, a wùmòʼ dzəə́ wìy koʼ. Woo shooy yíi wìy, é wù ku sàʼ shishàr, e nèn ŋeèmé, e lày.

¹¹Ké nyàm ye bó yì yòʼ dzə̀ə́ lèn, a yì kfə̀n wíy a dzə, ki nén a dzə jii, yì wíy kfən, é yì wáa saʼ ji fon wo wù meen ji waamé. Yii bèy, a wù dzə̀ fó ŋgoo afòn vee saàmbà vìy. A wù wíy fəə, e kù dù duùn, e nəə́ e lòn woo là may.

¹²Loŋ see ghvə̀m se m yén e nyàm rə̀n kitu si din a afon ámóʼó e ghvə̀m, a bó vee shooyi yóʼ ne kèʼ, a saʼ. Aá wíy koʼór áwune, aá sáʼ wùn à nyàm ye beemén rə̀y hawa mòʼón cáʼcáʼ.

¹³Aáwune kù wíy a tiy kév kinyo kimòʼón ji á wáa tom sáʼ nyàm ye beemén rə̀y, e nèn way vinyo vév vidzə̀m a dzə̀ é kiwo wo.

¹⁴Á wíy lò, aá nèn bàʼtí rə́r, a màʼ Wan Njiì Nyùy sho. Yii bèy, é Wan Njiì Nyùy wùn à wír vəə́ só áwune, bìʼ fo dzəə̀n wun woo Tàr fo atàrí adzə̀m, kfə́n a dzə wun Fon fo afone adzə̀m. A wír vìne dzə̀ ve wù liìn ji və́, á wáy shilív e wun wùn, a tiy a dzə̀ wùn áwune.

¹⁵Nshìylav Nyùy rə̀y nèn kfə̀n a naàrì jii, ndzə́v se m yén, a sàkì və̀n dzə́ e ghaŋ wo sìn si dzə̀ á woŋ mo sí baʼtin fó sidzə̀m, vitúm jeéy jeéy, lám jeéy jeéy, wùn à kfə́ə wìr msòŋé e dzə̀m.

¹⁶Mo loŋ se nyàm se m yén sìn si dzəə̀n afon e ghvə̀m, áwune wíy lò, aá nèn tàtí wùn à nyàm ye beemén rə̀y, a bàn wiíy woo sàkì və̀n. Á wíy kàr vifá fo wùn wó vidzə̀m, é wù wáa tiy kinshóʼ, aá wóʼ nyám fo wùn wó, e kfər, e tòn vighvə́r.

¹⁷A kù ŋàʼár Nyùy melív me afòn vìn, bo á kfə́n mbòv e mòʼón, e wày sáʼ yév a dzə̀ e nyàm ye beemén rə̀y kiwo. A Nyùy yiì bèy ji á fíʼ yiì kinyo ke wù‑uù yiìn ne sùúy ji kí wíy koóy kidzə̀m.

¹⁸A wiíy woo sàkì wo m yén və̀n dzə̀ á ŋkàlaʼ ye kuʼùn, fo afon veé nsay adzə̀me yú sáʼ.