Read Lamnso Ŋgaà Yen 18 Bible Online

Ŋgaà Yen 18 - Lamnso bible

Ŋgaà Yen 18

¹Kee shooy ki shaà, m yén yìmòʼ yee nshìylav Nyùy, aá fó vitaáví ve ghaʼán ví shó. Yì wáa səy fo yuv, a njàʼkìr, kitú ke nsay ki wáa ran kidzə̀m.

²A yì wiy, fúŋ kitávín jii, «Babilon wo kuʼùn gbù ne. Wù gbù ne. Fóo sì kisáŋ. Kù sì ji kitár ké anyùy. Vibáy vidzə̀m wùn à kfəə́ se menə̀n me mè kóʼoy medzə̀m mè sí báʼti a dzə̀ fó.

³A fóo kfə̀n bey, bìʼ fo Babilon‑eè baar woŋ sidzə̀m e visàkì və́ ve ghaʼtín ví mo á nò a dzə̀ meluʼ. Afon veé kitu ke nsay adzə̀me‑eè wiy, jaŋè, a wùn áwune yii joonè. Vé wayí kfən kùʼkìr fo fo kitú ke nsay kidzə̀m, bìʼ fo wù‑uù rə́si yí woŋ, báʼti bùʼ, fúmé.»

⁴M nèn kfə̀n yù jí yìmòʼ, a yì jaŋ fo yuv jii: «Wìr vem, vèn fəə́ fó wòŋ foo fèy adzə̀m. Vèn fəə́ fó fo, fó way kiwó e vinyò ve wù buʼtì, e nəə́ e ŋgeʼ sa mo wù yíi nəə́.

⁵Vèn wáa kiíy ji wù yiì ne vinyo, e tònén, Nyùy yú fó yuv, a wù sí yìi màʼ ŋgeʼ sho lèn.

⁶Á kù yíi lovtí sho lèn mo wù‑uù lóvti e wíri, e kfə̀n dzə̀sì. A wù‑uù yiì kinyo kimòʼón, bo á siir sho lèn vibaà. Á kù li bàr və wo wù‑uù jav meluʼ sho, e way abàr vee shooy lèn abaà, é si ŋgeʼ, é wù jiíyí.

⁷Mo wù‑uù kóʼnin, yí kitú kfə́, á kù yíi sə̀r sa wun réŋréŋ bey, é wù wáa ŋeèy, a ser e kibvə̀r. Wù‑uù sévti jii, ‹M yéʼ e kàvàʼ, a sáʼ mo woŋ. M yòʼ dzə̀ wiíy ŋkfə. M yòʼ wíy a ser e vifù é ghan símóʼ sí ji m diy kpú lum.›

⁸A kishiíy kí kù wiy ke wù wíy nəə́ e lòn wuu baà. Yàsí wíy gbù e wùn wó. Wù kfə̀n wíy a dìy. Wù wíy a tooŋé jíŋ. Á wíy tòn wun e və̀y, é wù shwí, e rèŋ, bìʼ fo Nyùy Tàr, wun woo Nyùy wo wù wíy màʼ ŋgeʼ sho dzə̀, a wù tàv é ŋàŋ.»

⁹Və́yí wíy koo e Babilon, afon veé nsayi maʼ sí, yén mo kindzə́ʼ ki dzəm fo fo, aá wáa dìy, a shèŋ vitú. A dzə̀ áwune ve vé‑eè wiy, a wùn áwune yí woŋ, buʼtì vinyo.

¹⁰Aá wíy yen lòn vən, e nèn fàn, e tèr wún, a tiy kév kwaʼda, a sham a dzə̀ fó shuù jii, «Éè mò, éè mò, vèn yén kimà ké laʼ ke kí‑iì néŋ bùrì bùrì. Ŋkàlaʼ Babilon, wò‑oò dzə̀ e gháʼán. Kòóy ka, bo lòné ku lò, e sə̀tí wò bèn kàŋ mòʼón?»

¹¹Vé wayí wíy a toŋ sa kitú ke nsay kidzə̀m, a shèŋ vitú, a ghay jii, «Fèn wíy a yun la vifá vér?

¹²Wìr wùmòʼ yòʼ kfə̀n dzə̀ shó wo wù wíy a yun visha vér vé mbàm ve baar ví wùn à ve fəvír ví. A bó wìr yòʼ kfə̀n dzəə́ wìy a yun vifá ve kisù ke wùn vee moo *síbaŋ, wùn aànjàʼkírí, à ndzə̀y sé viwìr si, kìn dzə̀ se baar sí, kìn dzə̀ se fəvír sí, kìn dzə̀ see fètì fètì. A bó wìr wùmòʼ yòʼ kfə̀n dzə̀ə́ sho wo wù wíy a yun vifá ve wír ve kuʼkìné yii wáyri lav sho, moo vicí ve rəʼtìn ví, à vifá ve á fèrìn e sóŋ kitàme, kìn ve á semen e kfə́ə vici vímóʼ ví, kìn á tòn a dzə̀ e kfəə́ se vishà si jeéy jeéy, kìn dzə̀ mfiì se nsaàlav se á wiy sho wíyin kwaʼda.

¹³A bó wìr yòʼ dzə̀ə́ sa sho wo wù wíy a yun vifá ve ví shaŋ, rəʼtìnè, vee moo vighuv ve vici vímóʼ ví, à viláy ví, à kfəə́ se vifù vé shìv si. Kìn wo wù yún meluʼ mer, wùn à meŋgvə́r mè, à meŋkfəŋ mè, à sáŋé, kfə̀n yún anàʼ wùn aànjìi. A bó wìr yòʼ dzəə́ wìy a yun nyám sér sé ŋkoʼ wùn à *viténtén vé rər ví, aàkwàné wùn à wír ve á koó koón e kòŋé.»

¹⁴Vé way víne lóo ghay bèn, aá kfə́n a sham ŋkàlaʼ yee shoon jii, «Vifá ve wò‑oò rə́si wáy vifií shó vi lày ne. Bùʼ wò wo wò‑oò rə́si kér, yí kitú sho dù ne, a bó à yòʼ dzəə́ wìy a ker.»

¹⁵Vé way ve vé‑eè kùʼkìn a dzə̀ fó ŋkàlaʼ foo fèy vìne wíy a tiy sa kwaʼda, e bó a sham, bìʼ fo áwune fan lòn wo wú koon ŋkàlaʼ yee shoon. Aá wáa tiy bèy, a dìy, a shèŋ kitú,

¹⁶a sham jii, «Éè mò, éè mò, vèn ku yèn ŋkàlaʼ ye yì‑iì dzəə̀n e gháʼán, kér kfəə́ se ndzə̀y sinín, kér se baar sí, kér se fəvír sí, kér bvə́rì. Wù‑uù wáyri wún a dzə̀ e vifá ve vé‑eè tònèn e *kisha ke mbàm ki, wáy kfəə́ se *síbaŋ wùn à kfə́ə *saàkìnshìyí e dzə̀m.

¹⁷Bùʼ və̀n ku nèn lò, e bvə̀ʼə́m kàŋ mòʼón bèn à?» Wír ve á ghán e vikoŋ e rìbà ndzə̀ví wíy tiím sa kwaʼda, e bó a dìy. Aŋgàa vikoŋ wùn à vé lìm véví, à wír ve á ghán shoo wíy a leéy, é wír ve á ghán e ndzəv, kávnin wáyí wáa leéy adzə̀m.

¹⁸Á wíy yen mo kindzə́ʼ ki kóʼ fo ŋkàlaʼ fèy, aá wáa toŋ, a dìynìn jii, «Mfìʼ ŋkàlaʼ ye ghaʼán yee moo rə̀n dzəə́ wìy a dzə fèé?»

¹⁹Aá kú a dìy bèy, a dzəŋrí e kibvə̀r, a toŋ jii, «Éè mò, éè mò, vèn ku yèn ŋkàlaʼ ye ghaʼán rə̀n. Wìr dzə̀m wo wù ghán e kikoŋ, kávnin wáy, kùʼkìr a dzə̀ fó ŋkàlaʼ fèn. Yì ku nèn lò, e bvə̀ʼə́y kàŋ mòʼón bèn à?»

²⁰Wír vìn adzə̀me lóo dìy bèn, é wír ve á dzəə̀n é yuví wáa sheʼrí kév sheʼrín. Wír Nyùy wùn aàŋgàa ntum Jesuse wíy a sheʼrí adzə̀m, bìʼ fo Nyùy bìnèn ne nsaʼ yev, e màʼ ŋgeʼ e ŋkàlaʼ rə̀n kitu.

²¹M nèn yèn mo kigha ke nshìylav Nyùy kímóʼ kí ŋerin lúm tíy kiban, e màʼ e rìbà ndzə̀v, a yòm jii, «Kù dzə̀ mo á wíy màʼ Babilon woo ŋkàlaʼ ye ghaʼán ji vitaáví ben, é la wìr yòʼ kfə̀n dzəə wìy a yen.

²²A bó yòʼ dzə̀ á dzəə wìy yù, aá kum lúŋ fó, kìn á tóŋ a dzə̀ loŋ, kìn dzə̀ sóŋ. A bó á yòʼ dzəə́ wìy yen, a wìr lim kifá fo, kìn dzə̀ ka. A bó yòʼ dzə̀ wìr wìy yù, a wìr kum ŋgòʼ kiban fo.

²³Kikaʼày kí yòʼ dzəə́ wìy ban fo feyì gheéy. A bó á yòʼ dzəə́ wìy yu sa ŋkěŋ vijin fó. Ŋkàlaʼ rə̀n‑eè ló a dzə feyì. Wír ve vé‑eè kávnin wáy vəə́ kù‑uù dzə̀ vitàm e kitu ke nsay adzə̀m. Wù‑uù lèvtí woŋ dzə̀m e sə́me.

²⁴*Aŋgàa ntum Nyùy wùn à wír Nyùy ve vé‑eè yúyri e nsay adzə̀me dzə̀, a kù‑uù yúyri wun, a mensə́ mè léŋ e ŋkàlaʼ foo fèy.»