Read Lamnso Ŋgaà Yen 19 Bible Online

Ŋgaà Yen 19 - Lamnso bible

Ŋgaà Yen 19

¹Nshìylav Nyùy rə̀y yòm bèy, e màysì, m nèn yù kiyor kímóʼ kí é yuv mo yor màŋgòŋ e gháʼán, aá jaŋ jii, «Á wáa burí Nyùy. Dzə̀ wun wo wù luŋèr wíri. Kér wun vitaáví vidzə̀m. Á kú a wùʼsì yír rə́.

²Wù tínen vinyo vidzə̀m tìítiy, réŋréŋ mo ví dzəə̀n. Wù màʼ ne ŋgeʼ e kintìŋ ké sàkì ke kí‑iì ghán viŋkar, bívir wír veé nsay adzə̀m ki. Wù siìr ne mensə́ me aŋgàa lìm və́ ve wiíy və̀n‑eè rə́si yúyri e kitu wo.»

³Màŋgòŋ və̀y nèn kfə̀n lò, e yìysí jii, «Á wáa burí Nyùy. Kindzə́ʼ ki kù wíy a dzə̀m fo ŋkàlaʼ foo fèy ghán sidzə̀m, viyá viyá là may.»

⁴Á yíysí bey, kfə́m sé wìr vee nshòv sikweè e mbaà wùn à vifá vee vikweè ve ví tíy e ghaa kàvàʼ vi nèn a gbù e Nyùy si, a binsí jii, «Amen. Á kú a burí Nyùy.»

⁵Jì yìmòʼ nèn a suŋnín fo kàvàʼ jii, «Ven vee aŋgàa lìm Nyùy, vèn wáa burí Nyùy wòsən. Ven ve á ghvə́m wun, vèn wáa sùyrì wun, à wo kùʼùn, à wo terí.»

⁶M kfən yù kímóʼ kee kiyor mo yor màŋgòŋ, a kí koó mo tàtí kóŋ sí, a gbù, kfə̀n koó mo báykir kishèv. M yú, aá fúŋ jii, «Vèsən wáa burí Nyùy. Sí sáʼ Nyùy Tàr lèn, wun woo Nyùy wòsən, woo Ŋgaà Vitaàví Vidzə̀m.

⁷Á wáa sheʼrí, a sàvnìn, a koʼór yír rə́. Ghán sí ghèén ne se Wàn Njiì Nyùy yíi koóy wiíy və, a jìn bàʼtí ne, a shìy shìyìn.

⁸Nyùy màʼ ndzə̀y é wùn wó, a sí rán, fə́r ji páv. A ndzə̀y sin si dzə̀ vinyo ve ru ví ve wír ve dzəə̀n vé Nyùyi rə́si yii.»

⁹Nshìylav Nyùy rə̀y nèn kfə̀n sùúy e mò jii, «Sáŋ kinyo ke m yíi a suúy kìn ki é ŋwàʼ. Bòŋ ké wìr ve á biin áwune ji áwune wiy, e yì vijín vé Wàn Njiì Nyùy.» Wù kfən sùúy e mò jii, vinyo vìn vi dzə̀ á jí se Nyùy feyì feyì.

¹⁰M nèn lò, e gbù e si wo ji m ghvə́m á wun, wù sháʼnín jii, «Màʼtì kee shooy ki. M kù dzə̀ kém sá ji ŋgaà lìm Nyùy mo vèn aàfə́r vé ve á tíy e kinyò ke Jesuse dzəə̀n. A kinyo ke Jesus kìn ki kù dzə̀ kíwun ke kí bánri wír ve á tiísi ntum Nyùy adzə̀m. Kú a ghvəm a dzə̀ Nyùy.»

¹¹M kfən yèn kinyo kímóʼ kí, a shúu yuví tíy e rə́, a nyàmŋkoʼ tíy fo e fə́vír. A wìr dzə́ e kitu wo, aá yoŋ yír ji Suuyrú, kfə̀n yoŋ ji Làkìloʼ. A dzə̀ jii, jay yòʼ yii dzə́ e wùn kinyò ke wù yii, kìn wù tínen a dzə̀ nsaʼ, kìn wù maʼ a dzə̀ rə́r.

¹²M yén, a wón sii njaʼkìr fo fo, baári moo kiliímé ke və̀y, a wù sóv ntáráʼ e tom e ntáráʼ. Aá sáŋ yír yímóʼó é wùn wó, a bó wìr yòʼ kì nsàv. Kù kì wun nsàv yìr yee shooy.

¹³Wù‑uù màʼ kikúm, a kí kiʼ mensə́ mensə́, aá kfə̀n yoŋ yír rə́ yímóʼó ji Jínyùy.

¹⁴Wù wáa wìy bèy, ŋkfə̀n sé rər sé Nyùy si wáa nyoòrì fo bàm, aá kóʼ sá nyám se fəvír sí, e màʼ ndzə̀y se fəvír sí, a sí rán ji rèéŋ.

¹⁵Wù shém fó mbìy, a nyùy ye njimén fəə́ fó shuù wo, a dzə̀ ye wù yíi teè vitúm sho, e tòn, a saʼ. A wù wíy a saʼ a dzə̀ e ŋkǒmbàŋe wo dzəə̀n kisha. Wù wíy màʼ ŋgeʼ ye biibí aáwuné kitu, a dzə̀ ye áwune yiìn, Nyùy woo Ŋgaà Vitaàví Vidzə̀m shwiíy kilòŋ, e fò aáwune. Wù wíy lovtí aáwune moo kicí ke á kòyìn, e wày é bii, a nyèŋ, meluʼ mè wáa fəə fo fo.

¹⁶Wù wáa wìy bèy, m yén, aá sáŋ yír yímóʼó e wùn kikum, e kfə̀n sàŋ é kibìy, a yí dzə̀ jii, «Fon‑afòn, Tàr‑fo‑atàrí.»

¹⁷M kfən lòo yen, a yìmòʼ yee nshìylav Nyùy tíy a dzə̀ é si shùy. Wù jàŋ menə́n me mè féŋ e yuv medzə̀m jii, «Vèn báʼtí, e wìy, e yì kiŋkàʼ ke Nyùy ke ghaʼán kí.

¹⁸Vèn wiy, a sàʼ nyám fo afoné wùn, a sàʼ ye wìr ve dzəə̀n vitú ve rər. Vèn saʼ ye agùy, e sàʼ ye nyàm se ŋkoʼ, à ye wír ve vé‑eè koʼoné. Vèn ku sàʼ nyám fo wìr dzə̀m wùn, kìn dzə̀ kwàn, kìn dzə̀ wan wòŋ, à wìr wo kuʼùn, à wìr wo terí.»

¹⁹M nèn yèn, a nyàm ye beemén wùn aàfon veé nsay adzə̀me báʼtí vév vé rərí ji á tám á wùn à wìr wo wù ghán e kitu ke nyàm, a ŋkfə̀n sə́ sé rər sí guutì fo bàm.

²⁰Á nèn tàm, wù koó nyám ye beemén rə̀y wùn ŋgaà ntum və wo wù‑uù rə́si ghán fo wùn mbìy, shóʼ virom, bóʼti wíri shó. A wù kù‑uù bóʼti a dzə̀ wír ve vé‑eè kér nsáŋti nyàm ye beemén rə̀y aáwuné wùn, ghvə́m kibámmbó kfə́. Mo á koon áwune, e nèn dù, e màʼ e kimbiirìn ke və́yí bo sho, baári moo mekàŋ.

²¹Ŋgaà nyàmŋkoʼ və̀y nèn màysì kibér ke wìr, e laàr e nyùy ye yì fəə́ fo wùn shuù. Menə́n medzə̀m mè báʼtí é kitu wo, e sàʼ nyám, yì gháʼ áwune gháʼán.