Read Lamnso Ŋgaà Yen 2 Bible Online

Ŋgaà Yen 2 - Lamnso bible

Ŋgaà Yen 2

¹Wìr wo m kì yenen və̀y nèn sùúy e mò jii, «Sáŋ ŋwàʼa lèn, a dzə̀ wó ŋgaà ntum woó kintatì keé Efesor. A wú dzə̀ jii: «Kinyo kìn ki suuy mo wo m kér shijiy shee saàmbà e mǒ kiwo ke yìy kí, a dzə̀ mo wo m ghán e nsàn vitiir ve làm vee saàmbà vìy.

²M kì vinyo ve juŋ ve vèn rə́si yii vidzə̀m, e kfə̀n kìíy mo vèn rə́si katìr e Nyùy kinyò, sə́ vinyo vidzə̀m, kù dzə́ ji nyaáŋ. A m kfə̀n kì sá ji bó vèn yòʼ biíme a ji wír ve bií wáa ghan e věn mvəm. Wíri‑iì lóo sə ŋgúm ji áwune dzə̀ aŋgàa ntum vém, vèn kù nèn tàr, e yèn ji á bóʼti a bòʼtín.

³M kì sá mo vèn rə́si biíme ŋgeʼ si bìʼ kinyo kém, kù dzə́ ji nyaáŋ, e làa yòʼ shwèy.

⁴Yii bèy, a kímóʼ kí dzə̀ shó ke vèn yii lèn, la kí yòʼ a gheén mo gheéy. Vèn yòʼ dzəə́ koŋ mo mo vèn‑eè koŋ fo mbìy.

⁵Vèn kuúmé mo vèn‑eè dzə́, a shilív shén shí dzəə́ tíy e mǒ wùn kitávín. Vèn biner melív men, a yiì mo vèn‑eè yii fo mbìy. A vèn dzə̀ là fóo bìnèr melív men, bo m yíi wìy, e shàʼàr kitiir kén ké làm, é kintatì ki lay.

⁶Yii bèy, a kinyo ke ru ke vèn yii ki dzə̀ jii, vèn ban a vinyo ve wìr ve á jumrì yéʼéy Nikolay, réŋréŋ mo m ban sa.

⁷«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi. Wìr wo wù wíy so vinyo veé ndzə ye bi fen dzə̀ wo m wíy fo kilíŋ sho, é wù yí kicí ke kí kúy e Nyùy mvə̀m kiboò, a dzə̀ ke wìr yí, wù wàa ker dzəʼə̀m yee là may.»

⁸Wù nèn kfə̀n sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Simeena. A wú dzə̀ jii: «Kinyo kìn ki suuy mo wo m dzəə̀n Keʼ, e kfə̀n a dzə Kinjòʼsì. A dzə̀ mo wo mò‑oò kpuun, e kfə̀n fəə̀, a dzə e tin.

⁹M kì ŋgeʼ se sí rə́si kooy ven, a m kfə̀n kì mo kitan ki yúy ven. Yii bèy, a dzə̀ m wàa suúy ji vèn dzə̀ á vé bùʼu. M kì sá mo wír ámóʼó rə́si tóy vinyo e věn bàm, yoŋ vitú vév ji wír veé Juda, aá dzə̀ kév a dzə̀ e Satan ŋgoo.

¹⁰Vèn wáa kiíy ji ŋgeʼ símóʼ sí kù dzəə́ yiì a koóy a ven. Yii bèy, sí lóo koóy, lá vèn yòʼ a fàn. Satan sí yiì a mùm ven, aá wáa koorí wír ámóʼó fo věn mvəm, a way e sháŋ. A vèn wíy yen ŋgeʼ see shooy bèy, e meé kishiíy e ghvə̀m. M nén a tir ven jii, vèn kú a yu a dzə̀ fo mò, a fə̀m dzə̀ kpú, é m wìy nə̀ŋsí ven e dzəʼə̀m yee là mayi.

¹¹«Vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi. Wìr wo wù wíy so vinyo veé ndzə ye bi fen dzə̀ wo bó wù yòʼ dzəə́ wìy nəə́ e kpu yee akàŋ abaà.»

¹²Wù nèn kfə̀n sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Pegamum. A wú dzə̀ jii: «Kinyo kìn ki sùúy mo wo m kér nyùy ye á baàyìn mbìv sidzə̀m.

¹³M kì fo vèn dzə́. Vèn dzə́ a dzə̀ fo ntoʼ Satan dzəə̀n. Yii bèy, a m kì ji vèn kù kì fon won a dzə̀ á mo və̀n, a bó vèn yòʼ‑oò yiì ne mèŋ mo gheéy. Fə̀m‑eè dzə̀ é ghan se vé‑eè yuyrin Antipar e vèn à Satan kirə̀ʼ fóo fèy, bìʼ fo wù‑uù fiʼtì kinyo kém shilív shimòʼón, vèn yòʼ‑oò lo fàn, e lèʼ mo gheéy.

¹⁴Yii bèy, a vinyo vímóʼ ví dzə̀ shó ve vèn yii, la ví yòʼ a gheén mo. Wír ámóʼó dzə̀ e věn mvəm ve á yii vinyo, a dzə̀ ve Balaam‑eè yii. Wù‑uù táŋ mo dzə̀ Fòn Balak yiì, e bóo màʼ wír veé Isray. Wù‑uù din sho mo dzə̀ wù lèvtí wír veé Isray, aá wáa dù e virə̀ʼ vé anyùy, a yikír fo, e kfə̀n a jàŋ kinjàŋ.

¹⁵M suuy ké wìr vìn bèn, a m kì ji wír ámóʼó kfə̀n dzə̀ sá e věn mvəm moo vee shooy, a dzə̀ ve á jumrì vinyo ve kisaŋ vi ve wír Nikolayi yéʼeyì.

¹⁶M nén a tir ven jii, vèn biner á melív men. A vèn tèn fó bìnèr, bo m yíi wìy, é vèr à wír vee shooyi tám, é m laar e nyùy ye yì fəə́ fo mǒ shuù.

¹⁷«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi. Wìr wo wù wíy so vinyo veé ndzə ye bi fen dzə̀ wo m wíy ŋòʼ vifá ve yi ve ví lo a dzə̀ fo Nyùy, e fo sho, aá kù lìtì vee shooy a dzə̀ é yuv. A m kfə̀n wíy fo ŋgaàŋ *síbaŋ ye fəvírí, aá sáŋ yír rə́ ye fíyi shó, a dzə̀ meŋkfə́m me ŋgaàŋ, a bó yòʼ dzə̀ wìr wùmòʼ kìíy. Kù kiiy wun woo ŋgaà síbaŋ.»

¹⁸Wù nèn kfə̀n sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Tiyatira. A wú dzə̀ jii: «Kinyo kìn ki suuy mo woo Wan Nyùy. Dzə̀ mo wo wón sii njaʼkìr fo fo moo kiliímé ke və̀y, a wuú yémé rán, tókir moo kisha ke baar ke á naŋsin, e yètìr.

¹⁹M kì vinyo ve juŋ ve vèn rə́si yii. Vèn koŋnìnè, wáy shilív e mǒ wùn, lim fo wíri adzə̀m, yú a dzə̀ fo Nyùy, e làa yòʼ a dor. Vèn kfə́n a lìm lèn feyì, e shaà mo vèn‑eè lim fo mbìy.

²⁰Yii bèy, a kinyo kímóʼ kí dzə̀ ke vèn yii, a kí bír mo. Vèn màʼtì wiíy wo á yoŋ ji Jesebel, wù wáa ghan e věn mvəm. A wiíy və̀n yoŋ kitú kfə́ ji *ŋgaà ntum Nyùy, yéʼey wír vém, bóʼti áwune, aá jaŋ kinjàŋ, kfə̀n du e virə̀ʼ vé anyùy, yí vifá ve cù.

²¹A mò‑oò fò ghán shó ji wù biner shilív sə́, wù tén fó màʼtì liì və visàkì woo shooy.

²²Vèn yú, m yíi màʼ yàsí e wiíy woo shooy wùn, é wír ve wùn áwune yii liì kisaŋe yén ŋgeʼ ye biibí. Aá tèn fó màʼtì liì woo shooy,

²³bo m kù yíi màʼ yàsí aàŋgaà və́ ŋgoó wùn adzə̀m, aá kpúkír. M yii bèy, é vintatì vidzə̀m vi nèn yèn rú ji dzə̀ á mo, wo m kiìn vinyo ve ví dzəə̀n e wìr bvə̀m, e kfə̀n kìíy ve shilív shé ŋgaàŋ shi tíy sho. A m wíy a yiì kinyo e wìr, a dzə̀ mo ŋgaàŋ‑eè yii.

²⁴«M nén a suúy kinyo lèn a dzə̀ e vèn ve vèn berin é kintatì keé Tiyatira foo fèy, ve bó á yòʼ tíy e kinyò fèn, a bó á yoʼ wày kiwó e vinyò ve wír ámóʼó yoŋ ji sə́m ye ghaʼáné, ye kiìn Satan. A m suuy e vèn jii, kinyo kímóʼ kí yòʼ dzə̀ shó ke dzə̀ m yèʼér e věn wùn.

²⁵Vèn ku ghàr a dzə̀ kinyo ke vèn tíy sho ki, e dù, e meé e ghan se m wíy kfən.

²⁶Wìr wo wù só vinyo ve bi ví, yii a dzə̀ vém, e dù, e meé e ghan se m wíy kfən, dzə̀ wo m wíy fo sáʼ sho, a dzə̀ ye Tàr wor‑iì foon e mò, é wù wáa saʼ vitúm veé nsay vidzə̀m. A wù wíy a saʼ e ŋkǒmbàŋ wo dzəə̀n kisháa, a tìm áwune shó, aá wáa bvəʼə́y moo kíŋ.

²⁸A m kfə̀n wíy fo ŋgaàŋ vitaáví a dzə̀ vé sàŋ wo wù yii lo kijàvndzə, shùy kù nèn tò.

²⁹«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi.»