Read Lamnso Ŋgaà Yen 20 Bible Online

Ŋgaà Yen 20 - Lamnso bible

Ŋgaà Yen 20

¹M nèn yèn, a nshìylav Nyùy yìmòʼ sə́y fo yuv, kér kimbàʼ ke kí mvəʼ shúu biíntùr, kfə̀n kér kiŋkór ke sháŋ é kiwo.

²Wù wìy, e koò kigàgǎʼsòŋ ke dzəə̀n yó ye yì‑iì siìn fó mbìy rə̀y, a yír rəə́ dzə̀ ji Satan, a dzə̀ Tavmènàŋ, e kùr e sháŋ və̀y kiyá nsə̀kì.

³Wù kúr bey, e màʼ e biíntùr, e sə̀tí shuu e kitu wo, e fìnèr fo wù kfə́n a ghan e kitu ke nsay, a boʼtí wíri, a bó kiyá kee nsə̀kì kìy ki yóʼ ne shaà. Kí wíy shaà, aá nèn bvə̀r, e màʼtì, é wù ghánrí shintàm.

⁴M nèn kfə̀n yèn, aá tiír akàvàʼ, a wíri dzə́ sho, a dzə̀ ve Nyùy lèmèn ji á wáa tinén nsaʼ se wíri. Vé kàvàʼ vìne‑eè dzə̀ wír ve vé‑eè yuyrin, bìʼ fo vé‑eè tíy wùn à Jesus, fiʼtì kinyo ke Nyùy, e làa yòʼ a ghvəm nyám ye beemén wùn à kibámmbó kfə́ kí, e tèn fó sə nsáŋtí və aáwuné yírvishi, kìn é wo. M wáa yen áwune, aá kfə́n ne atin, a dzə vitú ve saʼ wùn à Kristu ji á sáʼ ndzə kiyá nsə̀kì.

⁵Mo áwune fəən fó kpu, nèn a dzə fəə́ mbìyi ye wíri fəə́ fo kpu, a bó kibér ke aŋkfə ki yòʼ wíy fəə fo kpu, e meé e ghan se kiyá kee nsə̀kì kìy ki wíy shaà.

⁶A bòŋ ké wìr ve á fəən kév fó kpu a dzə̀ é ghan sé mbìy sìn si. Dzə̀ áwune ve siìn wír Nyùy ŋkuuŋkùŋ, a bó á yòʼ dzəə́ wìy nəə́ e kpu yee akàŋ abaà. Áwune sí wìy a dzə ji atàá cù, a lìm fo Nyùy wùn Kristu, é wùn à Kristu kfə́n a saʼ nsay fo bǎm kiya kee nsə̀kì kìn.

⁷Kiyá kee nsə̀kì kìn ki wíy shaà, aá nèn bvə̀r Satan fo sháŋ fey.

⁸Wù fəə́, é wù nèn a ghan, a boʼtí vitúm veé kitu ke nsay vidzə̀m, a dzə̀ ji Gog wùn Magog, aá báʼtí rə́r, é vé rərí wáa neŋ neŋén moo síy seé ghaa ndzəv.

⁹Á wíy lev, e dù e ŋkàlaʼ ye shilív shé Nyùy shi tíy sho, e sətí woŋ woo fó e dzə̀m, e gìm ŋkàlaʼ yee shooy e tar. Yii bèy, é və́yí gbu fó yuv, e laàr áwune.

¹⁰Aá nèn koò Satan wo wù‑uù boʼtin áwune, e màʼ e kimbiirìn ke və́yí bo sho, baári moo mekàŋ, é wù nèn a dzə fo wùn à nyàm ye beemén, à ŋgaà ntum və və̀y, ve vé‑eè siìn fó, é wùn áwune wáa fòmnìn fo e shùy wùn à vitsə́ʼ, viyá viyá là may.

¹¹M nèn yèn lúm kàvàʼ wùmòʼ, a wù fə́r fərín, e lòo leéy, e yèn, a wìr dzə́ sho. Mo wù yénsin fo, nsay wùn à yúví nèn nyèŋ fó si wo, e lày, la wìr yòʼ dzə́ə a yen.

¹²M yén wír ve vé‑eè kpukin ne, aá tíy e shùu kàvàʼ, à ve kuʼkìné, à ve terií. Á nèn a mvə̀ʼtì aŋwàʼ, e dù, e mvə̀ʼ wúmóʼó, a dzə̀ wo vé‑eè saŋen yír sé wìr ve á wíy lùŋ sho. Á nèn a saʼ aŋkfə vìn, a leéy vinyo ve áwune‑eè yii a dzə̀ fó aŋwàʼ ve vé‑eè sáŋ sho, e bó a tinén.

¹³Wáa dzə e ghan see shooy, a wír ve vé‑eè làykìn é ndzəví fəə́kír ne adzə̀m. Ve vé‑eè kpuun, e dù e sàyi fəə́kír sá. Wír vee aŋkfəə́ wòŋe báʼtí adzə̀m, aá kù tínen nsaʼ wìr a dzə̀ mo wù‑uù yii.

¹⁴Á màysì, e nèn tàtí kpú wùn à woŋ aŋkfəə, e màʼ e kimbiirìn ke və̀y fey, a dzə̀ ji kpú yee akàŋ abaà.

¹⁵Yír wìri‑iì búŋ fo ŋwàʼ wo vé‑eè saŋen yír sé wìr ve á wíy lùŋ sho, á kù màʼ ŋgaàŋ a dzə̀ é kimbiirìn ke və̀y fey.