Read Lamnso Ŋgaà Yen 21 Bible Online

Ŋgaà Yen 21 - Lamnso bible

Ŋgaà Yen 21

¹M nèn yèn lèn, a sì yúv wo fíyi wùn à nsay ye fíy, a yúv wo mvəə́ wùn à nsay ye mvə ŋeémé ne, e lày, à rìbà ndzə̀v shó.

²M nèn yèn Jerusalem wo fíy wo dzəə̀n láʼ Nyùy, a wù sə́ʼəy fo yuv fo Nyùy wùn, aá náŋsín, e wàyrí moo jín wo á du sho fo lum.

³M yú, a jì yìmòʼ súŋnin fo lum kàvàʼ kitávín, suuy jii, «Á yén ri lèn, Nyùy sí dzə́ wùn à wíri. Wù wíy a shiíy wùn áwune, aáwune wáa dzə wír və́. Wúnwun woo Nyùy kù sí wìy a dzə wùn áwune.

⁴Wù wíy sòr mensíy medzə̀m fo wírí si, a bó wìr yòʼ dzəə́ wìy a kpu, é bo á wáa dìy kímóʼ kí ji kpú. Bó wìr yòʼ dzəə́ wìy a yu nyár, a bó wìr yòʼ dzəə́ wìy a toŋ gheéy. Vinyo vee fó mbìy vidzə̀m vi kù shaà ne bèy.»

⁵Wìr wo wù dzə́ e kàvàʼ və̀y nèn sùúy jii, «Á lèn wo m yíi siìr vifá vidzə̀m, é ví kfə́n vifíy.» Wù kfən sùúy e mò jii, «Sáŋ vinyo ve à yuun vin vi é ŋwàʼ. Dzə̀ vinyo ve ru ví ve dzə̀ wìr tìír vifií shó.»

⁶Wù kfən sùúy e mò jii, «Nsìysì wom ghèén ne lán e dzə̀m. Dzə̀ mo *Alfa wùn *Omega, a dzə̀ jii, Keʼ wùn à Kinjòʼsì kí. M wíy a fo mendzə́v me dzəə̀n dzəʼə̀m yee là may e wìr wo kilòŋ kí yúm e dzə̀m, a mè fəə́ fo mǒ dàn ghán sidzə̀m, aá nó kisáŋ,

⁷a sì vitsə́ʼ mo m fó e wìr dzə̀m wo wù só vinyo veé ndzə ye bi. M wíy a dzə Nyùy ŋgaàŋ, é ŋgaàŋ wáa dzə wán wom.

⁸Yii bèy, ké wìr ámóʼó kí kù jòʼsì ne kimbiirìn ke və̀y fo və́yí bo, baári moo mekàŋ, a dzə̀ kpú yee akàŋ abaà. A kù dzə̀ áwune adzə̀m ve bó á yòʼ‑oò lo kùr shilív, a tiy e mǒ kinyò, e làa yòʼ a way shilív e mǒ wùn, tíy a dzə̀ é vinyò ve kisaŋ vi. Kìn dzə̀ wír wo wù yúyri wír, kìn ŋgaà kinjàŋ, kìn wo viŋkar, kìn wo wù sénin sə́m, kìn wo wù ghvə́m vifá vímóʼ ví ji Nyùy, e lì aŋgàa kimboʼtì adzə̀m.»

⁹Nshìylav Nyùy yìmòʼ nèn wìy, e yèn mo, a dzə̀ yìmòʼ fo see saàmbà sìy se sí kì kér kighín ké lòn kee saàmbà, a dzə̀ lòn wo wú jòʼsìn bám. Wù wìy, e sùúy e mò jii, «Wìyi, é m din wò jín wo dzəə̀n wiíy Wàn Njiì Nyùy.»

¹⁰Kiyoy ke Nyùy ki ku nèn shòŋ mo, e kòʼ shó e kitu ke mbár wùmòʼ, e dìn Jerusalem woo láʼ Nyùy, a wù sə́ʼə́y fó yuv fo Nyùy wùn.

¹¹A rán Nyùyi bán fo laʼ foo fèy, a yí tókir moo kfə́ə *síbaŋ yímóʼó, a bó á yòʼ yii táv yéné, aá yoŋ ji jespa. Yí kfə́n a yensín moo kileèy, á wáa yen mvə́m.

¹²Á bóm lúm kày e daadà e yuv, e kaàrí láʼ yee shooy sho, e tàr. Shuu si wáa nəə́ sho nshòv sibaà e ghvə̀m, a shuu mòʼón mòʼóne kér nshìylav Nyùy ye yì shiy shuu woo shó, aá sáŋ yír e mòʼón mòʼón e shuù se kày foo fèy, a dzə̀ yír sé rám Isray yee nshòv sibaà e ghvə̀m.

¹³Kay yee shooyi wáa dzə virə́v vikweè, a kímóʼ kí leey fo shùy yii tó, kímóʼ kí fo shùy yii nəə, bo vee vibaà ví wáa leéy kuy wùn à tsə́né. A kee kimòʼón kee kirə́v kí kér shuu e taár.

¹⁴A vé‑eè neèr sə́y nshòv sibaà e ghvə̀m, e bóo bom kay yee shooy e kitu wo, e sàŋ yír sé aŋgàa ntum vee nshòv sibaà e ghvə̀m ve dzəə̀n vé Wàn Njiì Nyùy e səy foo fèy.

¹⁵Nshìylav Nyùy ye yì‑iì súŋnin vèr wun wáa ker mbàŋ ye á yii fiʼ kirə́ʼ shó, aá fér a dzə̀ e *kisha ke mbàm ki, a vé‑eè fò shó ji wù fiʼ á láʼ yee shooy sho, e kfə̀n fìʼ kay wùn à shuu si,

¹⁶a láʼa dzə̀ buú e kweè e kiŋkar. Wù nèn fìʼ, vikuʼùy ví wáa dzə may nsə̀kì e mayi ghii tàn (1,500). Mbvə̀ʼ kú a dzə sa bèy. Yí kfən dàr e yuv réŋréŋ bey.

¹⁷Wù kfən lì mfìʼ ye wíri yii kérí, e fìʼ kay sho, yí dàr e yuv kóy nshòv sibaà e mtaár.

¹⁸Vé‑eè lì a dzə̀ tíy ye á yoŋ ji jespa, a dzə̀ tíy ye á yii fer *síbaŋ yímóʼó shó, e bóo bom kay yee shooy sho, e nèn bòm wúntí laʼ a dzə̀ e kisha ke mbàm ke baar kí, a kee shooy ki dzə̀ kfə́ jeéy, yénsin moo kileèy.

¹⁹Á kfən fiì sár kày fo ndzə e kfəə́ se síbaŋ símóʼ sí, a sí yii dzə́ e kilùm. Sí wáa dzə kfəə́ nshòv sibaà e ghvə̀m mo vé‑eè fiìn é mbìv sí mbìv sí. Mbìv yìmòʼ wáa dzə *síbaŋ ye á yoŋ ji jespa, a yí tókir, yénsin moo kileèy. Mbìv ye yì batin, á fiì e safiri, a yee shoone səə́ne moo yúv. Mbìv yee taár wáa dzə aget, a rəne kér nshòm e kfəə sí kfəə si. Mbìv yee kweè wáa dzə emeral, a yee shoone njaʼkìr, kfə̀n səə́ne moo viŋgà.

²⁰Mbìv yee tàn wáa dzə oniks, a yì shomkìr shòmkìn, yénsinè. Mbìv yee ntuùfú wáa dzə karnelian, a yì yénsin moo kileèy, kfə̀n baŋ moo fə́ə nsiì. Mbìv yee saàmbà wáa dzə kfə́ə sáylúm yímóʼó, a yí baaŋè baàŋèn moo kisha ke mbàm. Mbìv yee waamé wáa dzə beril, a yì səə́ne moo ndzə́v. Mbìv yee bvə̀ʼə̀ wáa dzə topar, a yì yénsin, kfə̀n baaŋè moo nshùʼ. Mbìv yee ghvə̀m wáa dzə kalsedoni, a yì səə́ne səə̀nén moo vibábár. Mbìv yee nshòv mòʼón e ghvə̀m wáa dzə jasin, a yì səə́ne kfə́ moo shinsəʼ. Mbìv yee nshòv sibaà e ghvə̀m nén a dzə amatist, a dzə̀ síbaŋ ye yí səə́ne moo shitòŋ.

²¹Shúu kàyi wáa dzə sa, aá fér e kfəə́ saàkìnshìy wùmòʼ, a wù fə́r moo mentíy. Á li lúm saàkìnshìy woo shooy e mòʼón, á bùʼ shuu sho e mòʼón. Dzə́ə seé mvə̀mlaʼ si wáa dzə, aá ku fiì a dzə̀ e kisha ke mbàm ke baar kí, a kin ki yénsin moo kileèy.

²²M yén láʼ yee shooy, e làa yòʼ yen lav yìmòʼ fó jeéy ji ye Nyùy Tàr, wun woo Nyùy woo Ŋgaà Vitaàví Vidzə̀m, a wùn Wàn Njiì və ghán fo virə́ʼ vidzə̀m.

²³Wír vee fóo yòʼ dzəə́ kér shií é ŋwee, kìn shúy, bìʼ fo rán ye yí lo a dzə̀ fo Nyùy wùné bán fo ghán sidzə̀m. Wàn Njiì Nyùy kfə́n a dzə kikaʼày ke kí kaʼày fó.

²⁴Vitúm vidzə̀m vi wíy a ker rán a dzə̀ fó laʼ foo fèy, e bó a yen virə́ʼ, a ghan, áàfon véví wáa baʼtí bùʼ wov a dzə̀ fó.

²⁵Shuu se kày si kù wíy a tiy sirə́ ghán sidzə̀m, a bó wìr yòʼ wíy a sətí gheéy, bìʼ fo bó yòʼ dzə̀ ndzə yì sə̀n fó.

²⁶Vitúm vidzə̀m vi kù wíy a wìy e bùʼ wùn à káv wóví, a baʼtí a dzə̀ fó.

²⁷A bó yòʼ dzə̀ sá kifá ke kí kér shilóm ki nə̀ə́ é laʼ fèn gheéy. A bó yòʼ dzə̀ sá wír wo wù yii liì kisaŋ, kìn wo wù bóʼti kimboʼtì, wù nə̀ə́ fó. Kù wíy nəə́ wír ve yír sév sí dzəə̀n é ŋwàʼ Wàn Njiì Nyùy wo vé‑eè saŋen yír sé wìr ve á wíy lùŋ sho.