Read Lamnso Ŋgaà Yen 22 Bible Online

Ŋgaà Yen 22 - Lamnso bible

Ŋgaà Yen 22

¹Nshìylav Nyùy rə̀y nèn dìn mo ndzə́v ye wìr nó, wù wàa ker dzəʼə̀m yee là may. A yí rán ji rèéŋ moo kileèy, fəə́ fo sar kàvàʼ wo dzəə̀n wo Nyùy wùn Wàn Njiì və,

²léŋ, sə́y e ntìntìn dzəə̀ ye kùʼùn ye yì dzəə̀n é mvə̀mlaʼ foo fèy. Vicí ví wáa kuy e ghaa ndzəv fey mbìv sidzə̀m, a dzə̀ kicí ke wìr yí, wù wàa ker dzəʼə̀m yee là may. A kí koom ŋwee e dzə̀m, a dzə̀ ji kàŋ nshòv sibaà e ghvə̀m e kiya. Vibábár və́ ví wáa dzə kifú ké shìv ke kí fer vitúm vidzə̀m.

³Láʼ rə̀ne wáa dzə bèn, a bó yòʼ dzə̀ á kfə̀n yèn kifá kímóʼ kí fó ke kí wáa koʼóy fo Nyùy. Dzə̀ fo kàvàʼ Nyùy wùn Wàn Njiì və wíy a tiy, é wír ve dzəə̀n vəə́ wáa ghvəm wun fo.

⁴Aá wíy a yen sí wun woo Nyùy, aá kfən sàŋ yír rə́ aáwuné yírvishi.

⁵Nyùy Tàr, wun woo Nyùy wíy kàʼày áwune, é la ndzə yìmòʼ yòʼ kfə̀n a dzə ji yee vitsə́ʼ, é bo á wáa tàʼ kikaʼày, kìn ji á wáa shìy ji shùy tó. Áwune wíy a dzə fo lèn ji rám vifòne, a saʼ vifon vév ghán sidzə̀m, viyá viyá là may.

⁶Nshìylav Nyùy rə̀y nèn kfə̀n sùúy e mò jii, «Vinyo ve à yuun vin vidzə̀m vi dzə̀ ve ru ví ve dzə̀ wìr kù wày vifií shó. Tùm Nyùy Tàr nshìylav rə ji yì wiy, e dìn kinyo ke kí sí yìi koóy aàŋgaà və́ lìme. A dzə̀ wun woo Nyùy wo wù yii fó Kiyoy kfə́ áàŋgaà və́ ntume, bo á wáa tiisí ntum rə.

⁷A Jesus suuy jii, ‹Vèn yuúrí, m kù sí lo, e bvəy lèn lèn. A wíy bòŋ ké wìr wo wù yú jí se Nyùy se á tiísi e ŋwàʼ fèn, yii mo sí dzəə̀n.› »

⁸Mo woo Joon wo m saŋen vinyo vìn nén a suúy jii, ví dzə̀ ben, a mò‑oò lo yèn e sí yémé, e kfə̀n yù e vituʼùr vém ví. Mo kí kooyin bey, m nèn gbù e nshìylav Nyùy ye yì dìnèn mo vinyo vìn si ji m sí fó ghvə́m sho.

⁹Wù nèn shàʼnín jii, m maʼti á kee shooy. Wun kù dzə̀ kfə́ cáʼ ji ŋgaà lìm Nyùy réŋréŋ mo vèr aàfə́r vém ve á tiísi ntum Nyùy, à wír ve á yú kinyo ke kí dzəə̀n é ŋwàʼ fèn adzə̀me dzəə̀n. M kú a ghvəm a dzə̀ á Nyùy.

¹⁰Wù nèn kfə̀n sùúy e mò ji lá m yòʼ lìtì a jí se Nyùy tiísi e ŋwàʼ fèn fo wíri. M wáa kiíy a ji ghán se vinyo vìn vi wíy koóy si sì á fo mentsə̀m.

¹¹Kí nén a dzə a jii, a wìr‑iì yii kfə́ a dzə̀ vinyo ve bi ví, bo dzə̀ á mo ŋgaàŋ kù wíy a yiì, é ŋgaà joònè kú a yiì joonè və́. A wìr‑iì yii kfə́ vinyo ve ru ví, bo dzə̀ á mo ŋgaàŋ kù wíy a yiì, é wír ve dzəə̀n vé Nyùyi kú a ker liì wo dzəə̀n wo Nyùy.

¹²A ke Jesus suuy ki dzə̀ á jii, «Vèn yuúrí, m kù sí lo, e bvəy lèn lèn. M wiy vèr à vilaámé vém ví, a m yíi a laamé wír mo ŋgaàŋ‑eè yii.

¹³Dzə̀ mo *Alfa wùn *Omega, a dzə̀ ji Mbìy wùn à Bámé, kfə́n a dzə ji Keʼ wùn à Kinjòʼsì kí.

¹⁴«Bòŋ ké wìr ve á su ndzə̀y sév, a sí ráné, e fíʼ a ker kilíŋ ke dzə̀ á tòsín shúu kày, e nə̀ə́ e Nyùy mvə̀mlaʼ, e kòy kicí ke wìr yí, wù wáa ker dzəʼə̀m yee là may.

¹⁵Wír ve á wíy a gòʼ kév a dzə̀ fó ndzəə dzə̀ á ve á yii joonè wùn à ve á sénin sə́m, à ve á jaŋ kinjàŋ wùn à ve á ghán viŋkari, à ve á yúyri wíri wùn à ve á ghvə́m vifá vímóʼ ví ji Nyùyi. A wír ve á koŋ kimboʼtì, tíy a dzə̀ shó adzə̀me kù wíy gòʼ sa fo ndzə.

¹⁶«Tùm mo woo Jesus nshìylav yem ji yì wiy, e fìʼtì vinyo vìn e wír vémé ji á fiʼti e vintatì vi. Dzə̀ mo wo dzəə̀n Rám Fòn Davir, kfə́n a dzə mo Sàŋ wo wù lo, ndzə nèn ràn.»

¹⁷Kiyoy ke Nyùy wùn jìn wun woo Jesus nèn sàyín jii, «Ku wìy wìyìn.» Wìr dzə̀m wo wù yú kinyo kìn kú a binsí sa jii, «Ku wìy wìyìn.» Kí nén a dzə jii, wír ve á yúm kilòŋ adzə̀me ku wìy, e nò mendzə́v me mè fó dzəʼə̀m yee là may. Wìr wo wù koŋ fó no e dzə̀m, kù yíi a no kisáŋ.

¹⁸M nén a tir wir dzə̀m wo wù yú jí se Nyùy tiísi e ŋwàʼ fèn jii, wìr wáa yen a fó kuvsín kinyo fo fo. A wìr lòo dzə, e dzə̀sì kfə́ kee kinyo sho, bo Nyùy wíy baʼtí lòn wo á suuy e ŋwàʼ fèn, e dzə̀sì ŋgeʼ se ŋgaàŋ sho.

¹⁹Wìr fəə́r kifá fo jì se Nyùy tiisin é ŋwàʼ fèn, bo Nyùy yíi fəə́r kilíŋ ke ŋgaàŋ kì yíi a ker e wùn mvə̀mlaʼ fèy, é la wù yòʼ dzəə yùtí kicí ke á yoŋ e ŋwàʼ fèn ji wìr yí, wù wàa ker dzəʼə̀m yee là may.

²⁰Wìr wo wù ghemrin vinyo vìn vidzə̀m nén a ratí jii, «Á wáa kiíy rú jii, m kù sí lo, e bvəy lèn lèn.» M nén a binsí jii, «Amen, Tàr wor Jesus, ku wìy wìyìn.»

²¹Wun woo Tàr wòsən Jesus kú a kòŋ wír Nyùy adzə̀m, a leéy fo áwune.