Read Lamnso Ŋgaà Yen 3 Bible Online

Ŋgaà Yen 3 - Lamnso bible

Ŋgaà Yen 3

¹Wìr wo mò‑oò yenen və̀y nèn kfə̀n sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Sardis. A wú dzə̀ jii: «Kinyo kìn ki sùúy mo wo kiyoy kee saàmbàwìr wo dzəə̀n wo Nyùy wùn à shijiy shee saàmbà shi dzəə̀n e mǒ kiwo. M kì vinyo ve vèn rə́si yii vidzə̀m, a ví yénsin ji vèn dzə̀ atin fo Nyùy mbìv. Yii bèy, a vèn kpù ne kpuún fó fo.

²Vèn yimen ri, e yìmrì kiyoy ke vèn dzəə́ fér shishàr ki, fo kí maysi, e shèm. M yén jii, kinyo ke vèn yii ji á lim fo Nyùy wom kí yoʼ ghèén fo wun gheéy.

³Vèn kú a kuumé a dzə̀ kinyo ke vé‑eè yéʼey ven shó fo mbìy, a vèn wáy shilív shó. Vèn biner ri shilív shén shí lèn, e ghàr a dzə̀ kee shooy. A vèn tèn fó yìmèn, bo m yíi sàsìn, e bvəy vitsə́ʼ moo shóŋ, é vèsən yú. A bó vèn yòʼ yíi kiíy ghán se m bvə́yí.

⁴Yii bèy, a m kù yòʼ kì jii, wír ámóʼó bér e věn mvəm, a bó á yòʼ wáy kiwó e vinyò foo fèy, a bó shilóm shi yòʼ dzə̀ e vee shooyí ndzə̀y. A dzə̀ áwune ve á gheenen fó wìy màʼ ndzə̀y se fəvír sí, é vèr áwune wáa ghan.

⁵A kù dzə̀ mo á wíy màʼ ndzə̀y se fəvír sí e wìr wo wù só vinyo ve bi ví wùn, a bó m yòʼ wíy səʼsí yír ŋgaàŋ fo ŋwàʼ wo á saŋen yír sé wìr ve á wíy lùŋ sho. M wíy tiím e Tàr wor Nyùy wùn à nshèelav sə́ sí si, a suúy feyì ji wìr və̀n dzə̀ wóom.

⁶«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi.»

⁷Wù nèn kfə̀n sùúy jii, «Sáŋ ŋwàʼa lèn a dzə̀ wó ŋgaà ntum woó kintatì keé Filadeefia. A wú dzə̀ jii: «Kinyo kìn ki sùúy mo wo m loòn fo Nyùy. A kù yii suuy mo kinyo ke dzəə̀n ke ru kí. Kér mo kimbàʼ ke kí‑iì dzəə̀n e Fòn Davir kiwo fo mbìy. A mvə̀ʼ mo shúu lav, bo bó wìr yòʼ dzə̀ shó wo dzə̀ wù kfə̀n fìn. M fin, bo bó wìr yòʼ dzə̀ shó wo dzə̀ wù mvə̀ʼ.

⁸M kì vinyo ve vèn yii vidzə̀m, e kfə̀n kìíy ji vèn yòʼ kér a kitar, a vèn kù tíy e mǒ kinyò kitávín, yii mo kí dzəə̀n. M nen mvə̀ʼ shúu lav, e lèm e rə́ ji vèn shaa shó, a bó yòʼ dzə̀ wìr sə̀tí.

⁹M kì wír ve á yoŋ vitú vév ji wír vém veé Juda, aá dzə̀ kév a dzə̀ e Satan ŋgoo. Vèn yú, m wíy yiì, aáwune kiíy ji wír ve m kòŋèné dzə̀ ven vin, e yiì, aáwune wiy, a gbù e věn si.

¹⁰Mo vèn kù sí yú a dzə̀ kinyo kém, e toòmé ŋgeʼ ji nyaáŋ, bo wíy lòo dzə e ghan sé ŋgeʼ ye tavín, é m kim ven fó fo. A ŋgeʼ rə̀n dzə̀ ye yì wíy gbù, e sətí ndzə e dzə̀m, e fíʼ mùm wír veé kitu ke nsay adzə̀m.

¹¹Kù bèr shishàr, é m wiy. Vèn ku ghàr kinyo ke vèn tíy sho kìn kitávín, fo wìr bóʼtí ven, é vèn rán vinə́ŋsí vén.

¹²Wìr wo wù wíy so ndzə ye bi rə̀n dzə̀ wo m wíy fèr ji kfəy e Tàr wor woo Nyùy lav, é wù wáa dzə fo ghán sidzə̀m. M wíy tooŋé yír Nyùy woo Tàr wor é wùn wó, e kfə̀n tooŋé yír Jerusalem wo fíy sho, a dzə̀ láʼ wun woo Nyùy ye yí wíy səʼə́y fo yuv fo wù dzəə̀n. A m kfə̀n wíy tooŋé sa yír yém ye fíyi shó.

¹³«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi.»

¹⁴Wìr və̀y kfən sùúy e mò jii, «Sáŋ ŋwàʼa lèn a dzə̀ wó ŋgaà ntum woó kintatì keé Ladisia. A wú dzə̀ jii: «Kinyo kìn ki sùúy mo wo á yoŋ ji Amen. Kù yii din mo kinyo ke dzəə̀n ke ru kí, là kiloʼ. Nyùy‑iì mbaà a dzə̀ mo, e bóo bom vifá ve wù‑uù bomen vidzə̀m.

¹⁵M kì vinyo ve vèn rə́si yii vidzə̀m, a m kì ji vèn tíy e mǒ kinyò fo ntìntìn. Bó melív men mè yòʼ lum sho, a bó mè yòʼ rəəy fo fo, a m koŋ feyì ji vèn wàá kaŋ á mbìv yee mòʼón.

¹⁶Vèn dzə̀ kén moo kibán ke á kìyìn, kí weéy. Bó kí yòʼ lumè, a bó kí yòʼ rə. Kí koó koón ji wèvkìkì, a m yíi cu fo mǒ shuù.

¹⁷Wìr lo, wù wàa sevtí jii, m kùʼ ne, a ker bùʼ e ŋàŋ, a bó m yòʼ dzəə́ búŋ kifá kímóʼ kí gheéy. Vèn suuy bèy, e làa yòʼ a kiíy ji vèn dzə̀ aghéʼncey ve dzə̀ á wàa rər mendzən rə́rín fó fo. Vèn ghíy ghiyín, ghán kinshóʼ, a vèn dzə̀ amfìr e Nyùy kinyò.

¹⁸M nén a tir ven jii, a vèn bèn taʼ a dzə rú vé bùʼu, vèn wìy, e yèn a dzə̀ mo, e yùn vifá vee vifá. Vèn wiy, e yùn *kisha ke mbàm ke ru kí ke á tònèn ne, e shèŋrì. Vèn wiy, e yùn ndzə̀y se sí fə́r kijuŋ, e sə̀tí kinshóʼ kén shó, fo wíri wáa yen, e kfə̀n yùn kifú, e wày e věn si, e fíʼ a yen virə́ʼ.

¹⁹Vèn wáa kuumé jii, m yii lóo kòŋ wír, m kù a saʼ, a sə̀r ji wù fíʼ fiír. Vèn ku nèn lèm vinyo ve m suuy vìn e vifii, e bìnèr melív men, a yiì mo ví dzəə̀n.

²⁰Vèn yú, m tíy e shùu lav, kumrì. A wìr yù jí yem, e mvə̀ʼ, m nə̀ə́ e wùn lav, é vèr wun dzəʼəm, a yikír.

²¹Vèn wáa kiíy jii, wìr wo wù wíy so vinyo veé ndzə ye bi rə̀n, dzə̀ wo m wíy lì, é vèr wun wáa dzə e mǒ kàvàʼ, réŋréŋ sá mo mò‑oò soon vinyo veé ndzə, Tàr wor Nyùy lì mo, vèr wun wáa dzə e wùn kàvàʼ.

²²«Kí nén a dzə jii, vituʼùr ví dzə̀ vibaà, kímóʼ kí tén fó yu, kímóʼ kí waà yù. Vèn yuúrí ri kinyo kìn ke Kiyoy ke Nyùy ki suuy e vintatì vi.»