Read Lamnso Ŋgaà Yen 4 Bible Online

Ŋgaà Yen 4 - Lamnso bible

Ŋgaà Yen 4

¹Mo vinyo ve m yenen viy vi shaàn, m nèn kfə̀n yèn kímóʼ kí, a shúu yuví tíy e rə́. M kfən yù jí ye yì kì súŋnin e mò fó mbìy mo á tòŋ a dzə̀ sóŋ rə̀y, a yì suuy jii, «Kóʼtí fó mentsə̀m, é m din wò vinyo ve ví kér fó wìy koóy e ghan sé bàm sí.»

²Kiyoy ke Nyùy ki ku nèn shòŋ mo, e kòʼ shó e yuv. M yén kàvàʼ, a wìr dzə́ sho,

³a vishí vi tókir fo fo, rán moo *síbaŋ ye á yoŋ ji jespa wùn à ye á yoŋ ji karnelian. M kfən yèn, a rə́mé daá é kitu ke kàvàʼ, a tokír, a bòŋkìr moo tíy ye á yoŋ ji emeral.

⁴Aá tiír akàvàʼ ámóʼó nshòv sikweè e mbaà, e gìm kàvàʼ və̀y sho. Kfə́m sé wìr símóʼ sí wáa dzə sho nshòv sikweè e mbaà, aá máʼ ndzə̀y, a sí fə́r fərín, e sòv antáráʼ ve vé‑eè fèrìn e *kisha ke mbàm ki.

⁵Kishèv ki wáa ŋwàŋkìr fo kàvàʼ woo fó ntìntìn, a baykír, a dzə̀mkìr. A vikaʼày ví bán e shùu kàvàʼ foo fèy saàmbà, a dzə̀ kiyoy kee saàmbàwìr wo dzəə̀n wo Nyùy.

⁶Maàndzə yeé shùu kàvàʼ wáa dzə moo kibáŋ ke kí tíy ji nyoòŋ, yénsin moo kileèy. Vifá vímóʼ ví kfə́n a tiy e ghaa kàvàʼ mbìv sikweè, e gìm, e tàr, a ví ŋeʼè, kér sí mbìv sidzə̀m, à fó mbìy, à fó bàm.

⁷Ke kí tíy fo mbìy ki shwínin bvərə̀ʼ, a kímóʼ kí shwínin lúm nàʼ, kímóʼ ki wáa ker vishí moo vé wìr. Ke kí jòʼsìn kí nén a tiy moo lùŋ wo wiy wo wù taáme féŋ.

⁸Vifá vee vikweè vìn vi kér vav ntuùfú ntuùfú, kér sí mbìv sidzə̀m, a ví dzə́, yov e shùy, yov vitsə́ʼ ghán sidzə̀m, e làa yòʼ a siʼím. A ví yov jii: «Nyùy Tàr, wun woo Nyùy woo Ŋgaà Vitaàví Vidzə̀m dzə̀ e ránén. Wù dzə̀ e ránén, wù dzə̀ e ránén. Dzə̀ wun wo wù‑uù siìn, a wù dzə̀ lèn, a wù kù wíy a dzə.»

⁹Vifá ve ví ŋeʼ vìy vi kú a rəsí, a yòv bèy, a sùyrì ŋgaà wo wù dzə́ e kàvàʼ fèy, a koʼór yír rə́, a beèrì wun wo wù kù dzəə̀n shó ghán sidzə̀m, là may.

¹⁰Ví lóo yòv, kfə́m sé wìr vee nshòv sikweè e mbaà siy si wàa wìy, a gbù e ŋgaà wo wù dzə́ e kàvàʼ və̀y si, a ghvəm wun wo wù kù dzəə̀n shó ghán sidzə̀m, là may. Á lóo yiì bèy, á wàa shoʼ antáráʼ vév, a neèr e shùu kàvàʼ, a kwa jii:

¹¹«Nyùy, kù dzə̀ wò Tàr wor. Kér wò vitaáví vidzə̀m. Bòm wò vifá vidzə̀m. Wò‑oò bòm mo wò‑oò kòŋèn, ví wáa dzə sho a dzə̀ bìʼ wò. Dzə̀ wò wo dzə̀ á wàa ghvəm, a burí.»