Read Lamnso Ŋgaà Yen 5 Bible Online

Ŋgaà Yen 5 - Lamnso bible

Ŋgaà Yen 5

¹M kfən lòo leéy, e yèn, a ŋgaà wo wù kì dzə́ e kàvàʼ və̀y kér váv ŋwàʼ e kiwo ke yìy kí, aá sáŋ mbìv sidzə̀m, e kaàrí, e fìnèr e kiláy kí kirə́ʼ saàmbà.

²M yén sá kigha ke nshìylav Nyùy kímóʼ kí, a kí fúŋ kitávín, dzə́r jii, «Wìr dzə̀ shó wo wù gheenen fó bày kiláy fó ŋwàʼ fèn, aá yén mvə́m a?»

³Wù fúŋ bey, e làa yòʼ fə̀m a ker wír e yuv, kìn é nsay, kìn áàŋkfəə́ wòŋ wo dzə̀ wù bvə̀r ŋwàʼ woo shooy, e lèéy mvə́m.

⁴M nèn gheèsì, e dìy, bìʼ fo wìr yòʼ‑oò lo fəə̀ e mòʼón, wo dzə̀ wù bvə̀r ŋwàʼ woo shooy, e lèéy mvə́m.

⁵Wùmòʼ woo wír fo kfə́m siy si nèn sùúy e mò jii, «Lá à yòʼ dzəə dìy. Yú, wìr wùmòʼ dzə̀ shó wo wù soon ne vinyo veé ndzə, a wù ghèén fó bày kiláy ke á fìnèrìn ŋwàʼ və̀n sho kirə́ʼ saàmbà, e bvə̀r. A ŋgaàŋ dzə̀ wír wo á yoŋ ji Bvərə̀ʼ woó Kitum kee Juda, a dzə̀ Rám Fòn Davir.»

⁶M ku nèn yèn Wan Njiì mo wù tíy e shùu kàvàʼ, e vifá vee vikweè vìy wùn à kfə́m siy sí nsàn, kiʼ vileémé vileémé, mo á seè, e yiì a dzə̀ cu sho. Wù‑uù kér loŋ saàmbà, kfə̀n kér sí saàmbà. A sí yee shooyi dzə̀ kiyoy kee saàmbàwìr wo dzəə̀n wo Nyùy. A Nyùy túm, a wù ghán kitú ke nsay kidzə̀m.

⁷Wàn Njiì və̀y nèn kòʼtí, e sə̀ ŋwàʼ və̀y fo ŋgaà wo wù kì dzə́ e kàvàʼ, kér e wùn kiwo ke yìy kí.

⁸Mo wù səən, vifá vee vikweè vìy wùn à kfə́m see nshòv sikweè e mbaà siy si nèn a gbù e si wo. A wìr mòʼón mòʼón kér lúŋ ye vé‑eè fèrìn e *kisha ke mbàm ki, kfə̀n kér kighín ke á fèrìn sá e kisha kee shooy ki. Kiláy kí wáa dzə sho kirúnén, a kí din bunrì ye wír Nyùyi bunrì fo wun.

⁹Á wáa gbù bèy, a yòv luŋ wo fíy wúmóʼó, a wú dzə̀ jii: «Kù dzə̀ wò, wo à gheenen fó sə ŋwàʼ və̀n, e bày mfìn, e mvə̀ʼ. Wò‑oò biìmé kpú, mensə́ mè mè leém, à tín wíri fó lòn, e siìr e Nyùy. A vé‑eè lò vitúm vidzə̀m, kìn dzə̀ ke kí súŋnin lám vəné, kfə̀n lò woŋ sidzə̀m wùn à rám wìr msòŋé e dzə̀m.

¹⁰Aà lèm ne áwune ji rám vifòne, á wáa dzə ji atàá cù, a cù Nyùy, aá wíy a saʼ kitú ke nsay.»

¹¹M kfən lòo leéy, e yèn nshèelav se Nyùy ansə̀kì ansə̀kì, virə́ʼ nsə̀kì nsə̀kì, aá kaárí fó, e tàr, kàvàʼ wùn à vifá vee vikweè vìy, à kfə́m sé wìr sìy si wáa dzə fo ntìntìn.

¹²Aáwune yov, kwá kitávín jii: «Wàn Njiì wo vé‑eè yuyrin dzə̀ wo wù gheenen ji á kóʼór, e fò sáʼ sho. Wù kú a ker vifá vidzə̀m, a ker vifií, a ker vitaáví vidzə̀m. Á kú a ghvəm wun, a wùʼsì yír rə́, a burí wun.»

¹³M kfən yù sá, a vifá ve ví ŋeʼ e ndzə vidzə̀m ve ví dzəə̀n é yuv wùn à veé nsay vi, à veé loònsay vi, à veé ndzəv ví tátí, a yòv jii: «Á wáa ghvəm ŋgaà wo wù dzə́ e kàvàʼ, e kfə̀n a ghvəm Wan Njiì, a burí áwune. Á kù wíy a wùʼsì yír yév, a fìʼ vitaáví vév, viyá viyá là may.»

¹⁴Ví wáa yòv bèy, vifá vee vikweè ve ví tíy e ghaa kàvàʼ vìy vi wáa shòŋrì jii, «Amen.» Kfə́m sé wìr sìy si wáa wìy, a gbù e shùu kàvàʼ, a fo ghvə́m.