Read Lamnso Ŋgaà Yen 6 Bible Online

Ŋgaà Yen 6 - Lamnso bible

Ŋgaà Yen 6

¹Mo vé‑eè fìnèrìn ŋwàʼ wo Wàn Njiì‑iì səən vəy e kiláy kí kirə́ʼ saàmbà, m nèn yèn, a wù báy kirə́ʼ kee kimòʼón. Fo vifa vee vikweè ve ví dzəə̀n é ghaa kàvàʼ, kímóʼ kí nèn yòŋ jii, «Wìyi.» A jì rə wámkir moo kishèv.

²M ku nèn yèn nyamŋkoʼ, a yì fə́r fərín, a wìr dzə́ e kitu wo, kér kinte. Á nèn sòv fə́ə nsiì e kitu wo, e yòŋ ji gùy. Wù nèn a dù, a tòn vitúm, a saʼ.

³Wàn Njiì kfən bày kímóʼ kee kiláy, a sì ji kee baà. Kímóʼ kee kifá ki nèn kfə̀n yòŋ fo ghaa kàvàʼ fèy jii, «Wìyi.»

⁴Nyàmŋkoʼ ku nèn fəə̀ fó ŋwàʼ fèy, a yì baŋ ji bùŋ, moo mensə́, a wìr dzə́ sa e kitu wo. Á nèn wày nyùy rə̀r é kiwo wo, e fò vitaáví shó ji wù wáa ghan kitú ke nsay kidzə̀m, a bayír wíri, aá wáa màʼ rə́r, a yuyrí vitú vév.

⁵Wàn Njiì nèn kfə̀n bày kímóʼ kee kiláy, a sì kee taár. Kímóʼ kee kifá ki kfən yòŋ fo ghaa kàvàʼ jii, «Wìyi.» M ku nèn yèn yìmòʼ yee nyamŋkoʼ, a yì sə́n sənén, a wìr dzə́ e kitu wo, kér mfìʼ vidzəə̀sì é kiwo.

⁶M yú, a jì yìmòʼ súŋnin, koó mo yì lo fo vifá vee vikweè ve ví dzəə̀n é ghaa kàvàʼ vìy vi, suuy jii, «Wìr kér fó lì vilaʼày vee kishiíy kifur, e bóo yun taasa saŋ shó e mòʼón, kìn wó ŋgwàsáŋ e taár. Yii bèy, lá à yòʼ lùmèr meŋgvə́r wùn à meluʼ mè.»

⁷Wàn Njiì kfən bày kímóʼ kee kiláy, a sì kee kweè. Fo vifa ve ví tíy e ghaa kàvàʼ, ke kí jòʼsìn ji kweè ki nèn kfə̀n yòŋ jii, «Wìyi.»

⁸M ku nèn yèn, a yìmòʼ yee nyamŋkoʼ fəə́, a yì fə́r ji kwáv, kiʼ e dzə́ʼsín. Wìr wáa dzə e kitu wo, a yír rəə́ dzə̀ ji Kpú. A wùmòʼ woo wír jumrì fo bàm, a rə́ yee yírí dzə̀ ji Wóŋàŋkfə. Á nèn fò vitaáví ji áwune jav wír veé kitu ke nsay vilíŋ vikweè, e laàr a mbìv yee mòʼón. Kìn á kpú a dzə̀ rə́r, kìn koó jíŋ, kìn laar kifə̀ʼ, kìn kfə́r nyám se kwaʼ áwune, aá may adzə̀m.

⁹Wàn Njiì nèn bày kiláy ke kí meen ji tàn. M yén viyoy ve wìr Nyùy ve vé‑eè rə́si yúyri, bìʼ fo vé‑eè fiʼtì kinyo ke Nyùy, tíy feyì ji kù dzə̀ á wùn à Nyùy. A viyoy vee shooy vi néŋ e ghaa kiy cù,

¹⁰rəə́me jii, «Tàr woo Ŋgaà Vitaàví Vidzə̀m, à dzə̀ e ránén, aà kù yii tíy a dzə̀ e wò jì. Ghán sí bèr é le, é bo à sáʼ wír veé kitu ke nsay, e màʼ ŋgeʼ sho, bìʼ fo vé‑eè yúyri ver?»

¹¹Á wáa rəəmé bèy, á nèn jàv vikúm ve fəvír ví aáwune, e sùúy jii, á ku yuùrí shishàr, bó á yòʼ sì á fèn adzə̀m. Á wáa shìy, á wíy maysì afə́r vév ámóʼó ve á lim sa fo Nyùy, yúyri mo vé‑eè yuyrin áwune, é bo á wàá gheén.

¹²M lòo yen, Wàn Njiì bày kiláy ke kí meen ji ntuùfú, nsay sə̀ʼ kitávín, virə́ʼ ví wáa kèrkìr. Shùy bìnkìr, a sən ji máy. Ŋwee tsə́m kirə́m, a bàŋ moo mensə́.

¹³Mejiy mè wáa gbùkìr e nsay moo kicí ke kí koomen a dzə̀ e lùm, shwéri lóo shaà, kí kuùy kidzə̀m.

¹⁴Yúví wáa nyoóy, a lày mo á kaári a dzə̀ gham. Agwane wáa kèrkìr, woŋ se sí dzəə̀n é ntìntìn ndzə̀v sí wáa làykìr.

¹⁵Wíri nèn a sam, a lìr e mbvə̀ʼ si, e kfə̀n a koʼ e virùmèn, a lìr e sar se vilan. Afon veé nsay adzə̀me wáa nyeŋ wùn à wír ve kuʼkìné adzə̀m, à vitú ve rər ví. Atǎr laʼ wùn à vé bùʼu wáa nyeŋ sa. Kìn wìr dzə̀ kwàn, kìn dzə̀ wan nsay, á kù a sam adzə̀m,

¹⁶a fuŋ agwan wùn à vilán vi jii, «Vèn ku keèsì e věr vitu, e kìŋ ver fo ŋgaà wo wù dzə́ e kàvàʼ yén ver, é vèr fíʼ bòy fo ŋgeʼ ye Wàn Njiì sí sə́ti nsay sho rə̀n.

¹⁷Sì kee shó kee kishiíy ke áwune sí shwiiy kilòŋ, e màʼ ŋgeʼ e kitu ke nsay, a bó yòʼ dzə̀ féyì, wìr lùŋ.»