Read Lamnso Ŋgaà Yen 7 Bible Online

Ŋgaà Yen 7 - Lamnso bible

Ŋgaà Yen 7

¹Kee shooy ki shaà, m yén, a nshèelav se Nyùy si tíy e buu se ndzə see sikweè, baʼ shwér wo wú yii wiy fo virə̀ʼ fóo fèy. Wú nèn tìím, e làa yòʼ dzə́ə a shaà e virə̀ʼ, kìn é kitu ke ndzəv, e làa yòʼ kfə̀n a sə̀ʼ sa kicí.

²M kfən yèn yìmòʼ yee nshìylav Nyùy, a yì fəə́ fo shùy yii tó, kér kifá e wun kiwo a dzə̀ ke wù du, e səə̀m wir Nyùy wo wù gòʼòn kàŋ mòʼón sho. Wù nèn yòŋ nshèelav se Nyùy see sikweè sìy kitávín, a dzə̀ áwune ve Nyùy foon vitaáví shó ji á bívír vifá ve ví dzəə̀n é nsay wùn à veé ndzəv ví.

³Wù yòŋ bèy, e sùúy jii, «Lá vèn yòʼ kùm nsay, lá vèn yòʼ kùm vicí, lá vèn yòʼ kùm ndzə́v, a bó vèr tár wír ve dzəə̀n aŋgàa lìm Nyùy, e sàŋ nsáŋti Nyùy aáwuné yírvishi.»

⁴Á nèn sùúy e mò jii, wír ve á səəm vee shooyi dzə̀ á wír nsə̀kì nshòv sikweè e mkweè e wiì (144,000). Aá shòʼtí wír vìn fo rám wìr veé Isray e dzə̀m.

⁵Rám e mòʼón mòʼóne wáa ker wír nsə̀kì nshòv sibaà e ghvə̀m, nsə̀kì nshòv sibaà e ghvə̀m (12,000). A rám yee shooyi dzə̀ jii, rám Juda, rám Ruben, rám Gad, rám Asher, rám Navtali, rám Manasse, rám Simeon, rám Levi, rám Issakar, rám Sebulun, e lì yé Joosev wùn à Benjamine.

⁹Kee shooy ki lòo shaà, m leéy, e yèn màŋgòŋ wìr nyanyày, a bó yòʼ dzə̀ wìr tàŋ. Aá ló vitúm vidzə̀m, kìn dzə̀ ke kí súŋnin lám vəné, e lò woŋ sidzə̀m, e kfə̀n lò rám wìr msòŋ e dzə̀m. Á wáa tiy e kàvàʼ wùn Wàn Njiì si, aá máʼ ne vikúm ve fəvír ví, a ker viyáŋ aáwuné wo.

¹⁰Aá ndzə́ʼ kitávín jii, «Nyùy wor wo wù dzəə̀n é kàvàʼ və̀n dzə̀ wo wùn Wàn Njiì tinen ver fó lòn, vèr lúŋ.»

¹¹Nshèelav se Nyùy si báʼtí fó sidzə̀m, e tìím, e gìm kàvàʼ wùn à vifá vee vikweè ve ví tíy e ghaŋ wo vi, à kfə́m sé wìr sìy si, e wày fó ntìntìn. A sí wiy e shùu kàvàʼ, gbu e Nyùy si, fó ghvə́m sho,

¹²kwá jii, «Amen. Á wáa sùyrì Nyùy wòsən, a koʼór yír rə́ ghán sidzə̀m, e dù, e mày. Á wáa burí vifií və́ ve ghaʼán ví, a beèrì wun, a ghvəm wun. Dzə̀ wun vitú ve saʼ, a kér wun vitaáví vidzə̀m. Amen.»

¹³Kfəm wìr wùmòʼ nèn yòŋ mo, e dzə̀r jii, «A sà dzə̀ m kìíy màŋgòŋ wo wù màʼàn vikúm ve fəvír ví və̀sə a? Á sà lò fo feé á?»

¹⁴M bìnèr jii, «Tàr, bó m yòʼ kì. Kù kì wò.» Wù nèn a naàrì jii, «Wír vee shoone dzə̀ á ve vé‑eè dzəə̀n é ghan sé ŋgeʼ ye tavín, e bóo bòy fo fo. Aá sù ne vikúm vév e mensə́ me Wàn Njiì mè, ví wáa ran, a fər.

¹⁵Á nén a tiy lèn e Nyùy shùu kàvàʼ, a kwa wun e wùn lav foo fèy e shùy, a kwa vitsə́ʼ, a wun woo Nyùy wo wù dzə́ e kàvàʼ yíi a kfəvsí áwune.

¹⁶A bó jìŋ yòʼ dzəə́ wìy a yar áwune, a kilòŋ kí yòʼ dzəə́ wìy a yum áwune. A bó yòʼ dzə̀ sá áwune dzəə wìy a yu shúy, a virə́ʼ ví yòʼ wíy a tònnìn,

¹⁷bìʼ fo Wàn Njiì wo wù dzə́ e shùu kàvàʼ wíy a shìy áwune, a dànèr áwune moo njiì, a dù sho fo adàn ve á fəər mendzə́v me mè fó dzəʼə̀m yee là mayi dzəə̀n. A Nyùy wíy sòr mensíy medzə̀m fo wír vìné si.»