Read Lamnso Ŋgaà Yen 8 Bible Online

Ŋgaà Yen 8 - Lamnso bible

Ŋgaà Yen 8

¹Wàn Njiì yiì lò, e màysì kiláy ke kí meen ji saàmbà, e bày fo ŋwàʼ fèy, yúví sə́sín, a tiy ji nyoòŋ, e dù kwaʼda moo kintoʼnìn ke hawa bèy.

²M yén, aá fó sóŋ saàmbà e nshèelav se Nyùy se sí yii tíy e Nyùy si saàmbà si.

³Yìmòʼ yee nshìylav nèn wìy, e tìím e ghaa kiy cù, a yì kér láŋ wo á yii wáy kiláy shó e kiwo, aá fér e *kisha ke mbàm ki. Á nèn fò kiláy shó kikuʼùn ji wù wàá ton é kiy cù wo á fèrìn e kisha ke mbàm ki, wú wáa tiy e shùu kàvàʼ. A yì yíi lòo tòn, é kirəm ki wáa tatí wùn à bunrì ye wíri bunrì Nyùyi, é kí wáa shàŋ, a rə̀ʼtìn.

⁴Wù nèn tòn, kindzə́ʼ ki tátí wùn à bunrì wìr Nyùyi, a koʼ e Nyùy wùn.

⁵Nshìylav Nyùy rə̀y nèn yiì lò, e kùúy və́y fó kiy cù, e wày é láŋ fóo fèy, e màʼ fo yuv, wú gbù e kitu ke nsay. Kishèv ki ku nèn njàʼàm fo fo, a baykír, virə́ʼ ví wáa dzə̀mkìr, nsay wáa sə̀ʼ, virə́ʼ ví wáa kèrkìr.

⁶Nshèelav se sí kér sóŋ see saàmbà sìy si nèn bàʼtí lèn ji sí tóŋ sóŋ rəy.

⁷Ye mbìy tóŋ rə́ yee sóŋ, nèn a gbù mentíy wùn à və́yí é kitu ke nsay, a wú tátí ne wùn à mensə́ mè. Və́yí sə́tí kitú ke nsay kidzə̀m. Vifá vi lóo dzə vitaár, kee kimòʼón ki shwì. Vicí ví shwí sá bèy, vikwiíy ví nèn shwì kfə́ vidzə̀m.

⁸Nshìylav Nyùy ye yì meen ji baà tóŋ rə́ yee sóŋ, kifá ki ku nèn gbù fo yuv kikuʼùn moo lúm gwan, a shwi, e dù, e gbù e rìbà ndzə̀v.

⁹Mbìv ndzə̀v yìmòʼ nèn bìnkìr ji mensə́. Wáa dzə ji á jav rìbà ndzə́v mbìv sitaár, bo yee mòʼón dzə̀ mensə́. Nyám se sí dzəə̀n é mbìv fóo fèy si kpúkír sidzə̀m, vikóŋ vi làykìr sa vidzə̀m.

¹⁰Nshìylav Nyùy ye yì meen ji taár tóŋ sá rə́ yee sóŋ, lúm shijìyi mènèn fo yuv, a baarí moo kiliímé ke və̀y, a taʼrí, a gbùkìr e ndzəv sí, e kfə̀n a nəə́ e ntòŋ sé ndzəv. Ndzə́v sí lóo dzə sitaár, wú nə̀ə́ e yee mòʼóné.

¹¹A yír shijìy shee shooyi dzə̀ ji lúylúy. Ndzə́v se shijiy shìn shi nəən shó si nèn bìnkìr, a shiʼír shiʼirín. Wíri nó ndzə́v see shooy, e kpù nyanyày.

¹²Nshìylav Nyùy ye yì meen ji kweè tóŋ rə́ yee sóŋ. Sí shùyi ku nèn jàv mbìv sitaár, mbìv yee mòʼón bìnkìr, a sən sənén. Ŋwee wùn à mejiy mè kú a sən réŋréŋ sá bèy, la kifá ki yòʼ dzə́ə a ran e yuv fó ghan símóʼ sí gheéy. Wáa dzə ji á jav kishiíy, e kfə̀n jàv vitsə́ʼ virə́ʼ vitaár, bo kirə́ʼ kee kimòʼón ki sə́n sənén.

¹³M kfən lòo leéy, e yèn lùŋ wo wiy, a wù sə́ŋ e ntìntìn yùv, tóŋ jii, «Ŋgeʼ, ŋgeʼ, ŋgeʼ wiyì. Yì sə́ti wír veé kitu ke nsay adzə̀m. Nshèelav se Nyùy see sitaár si yíi màysì yév yee sóŋ, tóŋé, é kí foy fóyin.»