Read Lamnso Ŋgaà Yen 9 Bible Online

Ŋgaà Yen 9 - Lamnso bible

Ŋgaà Yen 9

¹Nshìylav Nyùy ye yì meen ji tàn tóŋ rə́ yee sóŋ. M yén wír wo wù‑uù gbuùn fó yuv moo shijiy, a ghan e nsay. Á nèn fò kimbàʼ sho, a dzə̀ ke kí mvəʼ shúu biíntùr wo dzəə̀n láʼ *anyùy.

²Wù mvə̀ʼ, kindzə́ʼ ki dzə̀m fo fo mo á tòn Mbokam, a koʼ, a sətí sí shùy, mbàʼ wáa sən.

³Ŋguùmé sí nèn fəə̀ fó mbàʼ foo fèy, e sə̀tí nsay ji dzə̀v. Á fó nsəə̀ shó, a dzə̀ ye ŋgamvìsíy.

⁴Á suúy e ŋguùmé siy si jii, lá sí yòʼ yì á vikwiíy wùn à vicí ví. Kifá ke kí teʼ tèʼèn, lá sí waà kùm. Sí ku ròn a dzə̀ á wuú wìr ve bó á yòʼ kér kisəəm ké Nyùy aáwuné yírvishi.

⁵A bó á yòʼ‑oò fó nsəə̀ rə̀n bèy, ji sí té wír, e wù ku nèn kpù kpuún. Kù‑uù dzə̀ ji sí wáa nyàvrì e wìr nyávrin, é wù wáa saŋrí e bǎm ŋwee e tàn, a yu nyár, réŋréŋ mo tè ŋgamvìsíy.

⁶A wíy lòo dzə fo ŋwee woo tàn və̀n, aá wáa tàʼ kpú ye yí li áwune, e làa yòʼ a ker. Á wíy a siimé kpú, é yí wáa nyeŋ áwune nyéŋén.

⁷Ŋguùmé sin si‑iì dzə̀ moo nyám se ŋkoʼ se á naŋsin, sí wáa dù e shùu rər. Vishí vi wáa dzə vé wìr, a sí sóv ntáráʼ é vitu, aá fér e *kisha ke mbàm ki.

⁸Sí kfə́n a ker nə́ŋ moo sé wiíy. Sóŋé wáa bàŋ fo shuù wo moo yé bvərə̀ʼ.

⁹Vikàkàŋ vi wáa dzə ŋgáʼ ŋgáʼ, a dzə̀ visha. Sí lóo feŋ, sí wàa dzə̀m moo nyám se ŋkoʼ se sí líy sineénín e shùu rər, səŋ *viténtén vé rər.

¹⁰A sí kér kún e nsəə̀ é kitu wo moo wó ŋgamvìsíy, a dzə̀ kún woo shooy wo áwune té wír sho, wù wàa saŋrí e bǎm ŋwee e tàn.

¹¹Fòn wo wù kér áwune dzə̀ nshìylav ye yì sáʼ biíntùr vəy, a yír rəə́ dzə̀ é Lǎm Hibru ji Abadon, e kfə̀n a dzə e Lǎm Grik ji Apoliyon, a nsàv dzə̀ ji ŋgaà laàr.

¹²Á ŋgeʼ mbìy fo se lùŋ wo wiy kì yíysi sìy si, a see sibaà sí dzəə́ wiyì.

¹³Nshìylav Nyùy ye yì meen ji ntuùfú nèn tòŋ rə́ yee sóŋ. M yú, a jì súŋnín fó buu se kiy cù see sikweè wo á fèrìn e kisha ke mbàm ki, wú wáa tiy e Nyùy si.

¹⁴A jì yee shooy súŋnin a dzə̀ e nshìylav Nyùy ye yì meen ji ntuùfú rə̀n, suuy jii, wù du, e bvə̀tì a nshèelav see sikweè se vé‑eè kurin, e neèr e ghaa ndzəv ye á yoŋ ji Yufret.

¹⁵Wù nèn dù, e bvə̀tì. A vé‑eè kùr, e neèr fo bèy, a shìy a dzə̀ ghán se Nyùy‑iì sìysìn ji á wíy bvə̀r sìn. Wù‑uù sìysì kiyá kee shó, e sìysì ŋwee, e sìysì kishiíy, e kfə̀n sìysì fìʼ woó kishiíy wo á wíy bvə̀r, aá fəə́, a yuyrí wíri, e jàv kitú ke nsay vilíŋ vitaár, e laàr mbìv yee mòʼón.

¹⁶Mo á bvə̀tìn bey, áwune nèn wìy e vé rərí, aá ghán a dzə̀ é vitu ve nyàm. Á wáa suúy e mò jii, vé rər víyi kì dzə̀ á wír nsə̀kì, kirə́ʼ nsə̀kì, kàŋ ghii baà (200,000,000).

¹⁷M wáa yen vinyo vee shooy moo vinjeenjèm, a yen mo vé rər viy wùn à nyám sév sí kiʼì. Áwune wáa dzə e vitu ve nyàm, aá kúr visha, e sə̀tí vikàkàŋ vév shó, a ví baŋ moo və́y, kfə̀n səə́ne moo shinsəʼ, e bóo kfə̀n a baàŋè baàŋèn. Vitú ve nyàm vi shwínin vé bvərə̀ʼ, a və́y wùn à kindzə́ʼ ki, à kintoŋ ke ŋgar ki fəə́ fo shuù wo.

¹⁸Vifá vee vitaár ve ví fəə́ fo shuù wo vìn vi wáa teè wíri, á wáa kpukír. Wáa dzə ji á jav ndzə mbìv sitaár, bo yee mòʼón kpù, e mày.

¹⁹Vitaáví ve nyám sìy si‑iì laar wíri shó vi dzə̀ aáwuné shuù, e kfə̀n a dzə sa e kùn. A kúné dzə̀ moo yó, kér kitú, té wíri shó.

²⁰Wíri fòy bèy, la kibér ke kí bòyìn kí yòʼ fə̀m fìír, e bìnèr melív mev gheéy. Á kú a yòm *anyùy ve á ghán e shwer, e kfə̀n a cù vifá ve á fer e wó yéví, yoŋ ji anyùy. Fer vímóʼ ví a dzə̀ e kisha ki, kìn dzə̀ ké mbàm ke baar kí, kìn ke fəvír kí, kìn dzə̀ kiné kí. Lo, á sèm kímóʼ kí a dzə̀ tíy, kìn kicí. A bó yòʼ dzə̀ anyùy vìne yèn kirə́ʼ, a bó yòʼ dzə̀ á yù kinyo, a bó yòʼ dzə̀ á ghàn.

²¹Á kú a yiì bèy, e nèn tèn fó màʼtì fó a yuyrí wíri, a senín sə́m, a jàŋ kinjàŋ, a shoŋ vishóŋ.