Read Lamnso Rut 3 Bible Online

Rut 3 - Lamnso bible

Rut 3

¹Lòo dzə e kishiíy kímóʼ kí, Naomi yòŋ Rut moo yìy à ŋkfə lum və, e sùúy sho jii, «Wan wom, mo‑óò taʼ lúm wò ji à fíʼ a ker a yé yee láʼ, e kfə̀n a ker kirə́ʼ ké a dzə sho kijuŋ.

²Kuúmé ji Boas wo vèn à vé lìm və́ vee vikìyí kì dzəə̀n, dzə̀ á wír woo tàr à lum wò kfəə. Yuúrí, e yù, wù yíi a fetí *barli e ŋkuùr lán e riimé.

³Sù wúné, e sòr, e màʼ ndzə̀y yè ntay, e sə̀y é riimé. À du, mee fo, lá à yòʼ yiì, é wù kiíy ji à waà dzə̀, e dù, e meé mo wù yíi yikír, e màysì, e no kifá.

⁴Wù lóo neèm, à səə̀m fo wù néŋé. Wù lóo buuné, à dù, e ŋàʼár ndzə̀y se wù kfəvsin fo wun wuù, e nèn neèm e wun ghaa wuù. Wù yíi lò, é wù suúy wò kinyo ke à yii.»

⁵Rut bìnèr jii, «M yíi yiì kinyo kidzə̀m kee mo à suuyin.»

⁶Rut nèn kù sə̀y é riimé fóo fèy, e yiì réŋréŋ mo yìy à ŋkfə lum və kì naàrìn.

⁷Boas yiì yìkír, e kfə̀n nò kifá, wún vəə́ bòŋ, wù dù, e neèm e ghaa kikfər ke *barli, e nèn buùné. Rut yiì lò, e nyàʼtí, e dù fo, e ŋàʼár ndzə̀y se wù‑uù kfəvsin fo wun wuù, e nèn neèm e wuù wó.

⁸Lòo dzə e tǐm vitsəʼə́, Boas sàsìn fo mbuùné, e lòo bìnkìr, e yèn wiíy, a wù néŋ e wun wuù.

⁹Wù dzə́r jii, «Dzə̀ wò la?» Wù bìnèr jii, «Dzə̀ mo Rut, tàr à wíri. Mo à dzəə̀n wir kfəə, a dzə̀ wò wo kì dzə̀ à wàa leéy fo mò, lèm ri mo.»[6]

¹⁰Wù suúy jii, «NYÙY TÀR səəvi wò mbà. À kòŋ rú kfəə́ rə̀n e ŋàŋ, a kinyo ke à yiìn lèn ki siì kfə̀n shaà ke wò‑oò yii e yìy à ŋkfə lum wò. A yì‑iì dzə̀ à tàʼ lúm wo dzəə̀n wánlè nsùm woo ghéʼncey kìn woo ŋgaà mbàm.

¹¹Á bèy nà, lá à yòʼ a fàn. M yíi yiì kinyo kidzə̀m ke à taʼà, bìʼ fo wìr dzə̀m woó ntèʼ fen kì ji à dzə̀ á wiíy wo juŋ.

¹²Dzə̀ rú ji m dzə̀ wir kfəə wo kì dzə̀ m lèm wò, yii bèy, wìr kfəə wùmòʼ dzə̀ wo ghay mbìyi dzəə̀n və́.

¹³Gòʼ fen, yì ráné, aá sov ji wìr woo shooy sà‑áà lem wò a. Wù biíme, é kí boŋ. Wù téné, e Nyùy yir, bo m lem wò. Neèm a buuné, e dù, e meé mo ndzə yíi ran.»

¹⁴Rut ku nèn kfə̀n, e neèm fo. Ndzə lòo kaʼ kaʼán, wù nèn lò fó a dù, bìʼ fo Boas yòʼ‑oò ló a kòŋ ji wìr kiíy á ji Rut kì wìy ne a fo.

¹⁵Boas suúy shó jii, «Bvə̀r ndzə̀y sé see fó yuv sí, e sàŋrì fèn.» Wù nèn sàŋrì. Boas nèn màʼ mfìʼ se *barli ntuùfú, e shùr, wù bèʼèy, a kfən fo laʼ.

¹⁶Wù meé fó, yìy à ŋkfə lum və dzə́r shó jii, «À sìíy, e ghàn é le, wan wòm?» Rut nèn fìʼtì kinyo kidzə̀m mo Boas kàʼàn ji wun yíi yiì a e wun,

¹⁷e kfə̀n sùúy ji wù kì sùúy á jii, «Bó yòʼ dzə̀ m kfə̀n é bàm, e yèn wò e wóo. M ko á barli və̀n, a wìy a sho.»

¹⁸Naomi suúy jii, «Wan wom, ku dzə̀ʼə̀m ké ki ji nyaáŋ, a yen mo kinyo kìn ki yíi dù, e jòʼsì. Bó yòʼ dzə̀ wìr və̀n meèmè, a bó wù kwáŋ kinyo kìn lán.»