Read Lamnso 1 Samuel 11 Bible Online

1 Samuel 11 - Lamnso bible

1 Samuel 11

¹Fòn Nahash woó Ammon nèn lò kòʼ é Jabesh Gilead, e gìm wír vee fó e rə́r sí. Vilum veé Jabesh adzə̀me wáa lon nyaáŋ, a suúy jii, «Gwàr *mensaŋ mè vèsən, é vèr wáa lìm fo wò.»

²Fòn Nahash bìnèr aáwune jii, «A dzə̀ ji vèn taʼ ji m maʼti ven nyaáŋ, vèn biìmé ji m fə́tí sí sén sé yìy sí, e fíʼ shoór wír veé Isray adzə̀m.»

³Atǎr ntèʼ veé Jabeshi suúy e wun jii, «Fó ver vishiíy saàmbà, é vèr tsə́nsí wíri é wòŋ Isray e dzə̀m. A kí kòóy ji lá wìr yòʼ wìy fóo sə ver, é vèr nèn gbù wò.»

⁴Aŋgàa ntume nèn dù e Gibea fo Saul‑iì dzə́, e fìʼtì kinyo kìn e wíri. Á yú, e tòŋ é ŋàŋ.

⁵Wáa dzə e ghan sin, a Saul kì sí tsəə́ne nyám si, wiy sho fo kwaʼ, wù nèn dzə̀r jii, «Kòóy ka wíri, bo á wáa toŋnín toŋnín ben?» Á nèn fèr wun kinyo ke aŋgàa ntume wìyìn shó fo Jabesh.

⁶Saul yú kinyo kìy, Kiyoy ke Nyùy ki wìy e wun wùn, e yiì, wúné kìn wun feyì.

⁷Wù lì anàʼ abaà, e gwàr, e shètì e vintin vintin, e fò, vé ntume wáa ghan sho woŋ Isray e dzə̀m, ghán bèy, suuy jii, «Á mo á yíi gwàtì sa nyám se wìr wo wù tenen fóo fəə e Saul wùn Samuel bàm.» NYÙY TÀR yiì, kindzə́m kí gwàr wíri, á nèn fəə̀, la wìr yòʼ bèr.

⁸Saul báʼtí wir dzə̀m e Besek, a wír veé Israyi dzə̀ ansə̀kì ghii taár, a veé Judàa dzə̀ nsə̀kì mtaár.

⁹Saul wùn à wíri suúy e vé ntum ve á kì wìyìn fó Gilead vìyi ji á du, e sùúy a e wír veé Jabesh Gileadi ji shùy bvəə́shi a lùm kibvəə́shí, aá sə́ á ne áwune. Aŋgàa ntume dù, e fìʼtì kinyo kìy e wír veé Jabeshi, á yú, a sheʼrí feyì.

¹⁰Áwune nèn sùúy e wír veé Ammone jii, «Vèr bvəə́shi, e fo vitú vér e vèn, é vèn yii shó mo vèn koŋè.»

¹¹Wáa dzə vitsə́ʼ vee shooy, Saul jàv vé rər və́ vilíŋ vitaár. Á nəə́ e wír veé Ammoné kilaʼáy, bo ndzə wáa ran. Shùy wáa lùm, aá seérí ne áwune. Wír ve vé‑eè bòyìné táʼrí, a wìr nyéŋ, e làa yòʼ a rəəmé ŋkar.

¹²Wíri nèn dzə̀r e Samuel jii, «Wír ve vé‑eè kinèn ji bó yòʼ dzə̀ Saul wàa saʼ verí dzə̀ ala? Á wiy e wír vee shooyi, é vèr yúyrí.»

¹³Saul bìnèr jii, «Bó yòʼ dzə̀ á yùyrí wír lán, bìʼ fo lán dzəə̀n kishiíy ke NYÙY TÀR bòyìrìn wír veé Isray.»

¹⁴Samuel suúy e wíri jii, «Vèsən du é Gilgal, e bìysí vifon ve Saul.»

¹⁵Á bèy, wìr dzə̀m dù e Gilgal, e bùn Saul ji fon e NYÙY TǍR si, e kfə̀n yiì cu kikòŋnìne. Saul wùn à wíri nèn keèrí ŋkàʼ wo ghaʼáné.