Read Lamnso 1 Samuel 12 Bible Online

1 Samuel 12 - Lamnso bible

1 Samuel 12

¹Samuel suúy e wír veé Isray adzə̀me jii, «M yiì ne kinyo kidzə̀m e věn jì réŋréŋ mo vèn‑ee yòŋèn, e kòʼór fon wo wù wáa saʼ ven.

²Vèn sí kér wun lèn ji kilìmbìy kén. M dzə̀n ne kém, e fə̀r fə́rín, a wón vémé dzə̀kìr fen vèn áwune. Mò‑oò dzə̀ kilìmbìy kén, e kèʼ fo meterí, e wìy shem lán.

³Mo və̀ne a m tíy e věn si. Vèn tóʼ ri lòn wómé e NYÙY TǍR si wùn à e fòn wo wù yoʼón si. Mò‑oò kùvrì nàʼ la? Mò‑oò kùvrì kimbèʼbìy ké la? Mò‑oò bòʼ la? Mò‑oò nə̀ʼsì la? Mò‑oò sə̀ kòyàr fo la wo wù yii, é la m yòʼ dzəə yèn jay və. A dzə̀ ji mò‑oò lo yiì kinyo fo vinyò vìn, vèn yòŋ é m siysi.»

⁴Áwune bìnèr jii, «À yòʼ‑oò lo bòʼ wír, à yòʼ‑oò ló a nə̀ʼsì ver, aà yòʼ‑oò lo sə̀ kòyàr fo wìr kiwo.»

⁵Samuel suúy jii, «NYÙY TÀR dzə̀ a yú kinyo ke vèn suuyin, a wù dzə̀ njen lán ji vèn yèn á ji m dzə̀ là njò, a fòn wo wù yoʼon dzə̀ sá njen.» Áwune bínsí ji NYÙY TÀR dzə̀ njen.

⁶Samuel kfən sùúy e wíri jii, «Dzə̀ wun woo NYÙY TÀR wo wù‑uù shoʼon Mooser wùn Aaron, e tùm, á dù, e fə̀ə́r atǎr atàr vén fó Ejiv.

⁷Vèn ku tìím bèn e NYÙY TǍR si, é m din ji vèn jày á ne kinyo. A m kù yíi remrí a dzə̀ vinyo ve ru ví ve NYÙY TÀR‑iì rə́si yii e vèn, yii aàtǎr atàr véné, é vèn yén ji vèn jày rú á kinyo.

⁸Yì‑iì dzə̀ é ghan se Jakov wùn à kfə́ə rəə́‑əə̀ duùn é Ejiv, wír veé Ejivi wáa nə̀ʼsì áwune,[15] atǎr atàr véné tóŋ ji NYÙY TÀR sə́ á áwune. NYÙY TÀR nèn tsə̀nsí Mooser wùn Aaron, á dù, e fə̀ə́r áwune fó Ejiv, e wìy sho e nsay fèn.

⁹Yii bèy, áwune láysín NYÙY TÀR woo Nyùy wov. Wù nen màʼtì wír veé Filistia wùn à fòn woó Moav, à Sisera wo wù‑uù wám vé rər veé ŋkàlaʼ yee Hasor, á wáa fùnèn atǎr atàr vén, a tòn áwune.

¹⁰Á wáa toŋ e NYÙY TÀR, a suúy jii, ‹Vèr jày ne, bìʼ fo vèr meŋen ne NYÙY TÀR, a ghvəm a dzə̀ mebvə̀m me *Baal, à mee *Ashtoret. Lèn, ku sə̀ ver fo aŋgàa vibàn vérí wo, é vèr yiì a cù a dzə̀ wò.›

¹¹Nyùy nèn tsə̀nsí Gidiyon,[16] e tsə̀nsí Barak[17], e tsə̀nsí Jefta, e nèn lò tsə̀nsí mo fó bàm. Vèr áwune‑eè sə̀ ven fo aŋgàa vibàn véné wo, vèn wáa dzə kijuŋ.

¹²Yii bèy, e ghan se vèn‑eè yenen ji Nahash woo fon woó Ammon waà sí nəə a ven e rə́r sí, vèn nèn mèŋ NYÙY TÀR woo Nyùy won fo věn fòn, e nèn a suúy e mò jii, ‹Vèr taʼ fon wo wù wáa saʼ ver.›

¹³«Á bèy lèn, fòn wo vèn shoʼon və̀ne. Vèn‑eè dzə̀r fon, a NYÙY TÀR fò ne e vèn.

¹⁴Vinyo vén vidzə̀m vi yíi a dù kijuŋ, a vèn à fòn won fèn jumrì NYÙY TÀR, ghvə́m wun, lim fo wun, yú wun, kfə̀n yúnin sa nsər sə́.

¹⁵Yii bèy, a vèn dzə̀ làa yòʼ a yu NYÙY TÀR, e kfə̀n tèn fó a yunín nsər sə́, bo wù yíi meŋ ven réŋréŋ mo wù‑uù meŋen atàr vén.

¹⁶Lèn və̀n, vèn tiím fo vèn tíyí, a leéy kiŋgaʼnìn ke kinyò ke NYÙY TÀR lo, e yiì e věn si ki.

¹⁷Bó lèn yòʼ dzə̀ lùm à? Yii bèy, m lo, e bùnrì NYÙY TÀR é wù tsə́nsí wuú wùn à kishèv ki, é vèn nèn kìíy ji dzə̀ á kinyo ke biibí kí féyì ke vèn yiìn e NYÙY TÀR e tàʼ fon.»

¹⁸Samuel nèn bùnrì NYÙY TÀR é kishiíy fóo fèy, wù tsə́nsí wuú. Á bèy, wìr dzə̀m wáa fàn NYÙY TÀR wùn Samuel e ŋàŋ.

¹⁹Á nèn a suúy e Samuel jii, «Bùnrì NYÙY TÀR woo Nyùy wò fo aŋgàa lìm vée, fo á kpúkír. Vèr kfə̀n yiì ne kinyo ke bi kí mó a tàʼ fon, e tatí vímóʼ ví ve vèr‑iì sí yii.»

²⁰Samuel bìnèr jii, «Lá vèn yòʼ a fàn. Fə̀m mo vèn yiìn kinyo ke bi kí ben, lá vèn yòʼ màʼày NYÙY TÀR. Vèn wáa ghvəm wun vèn à shilív shén shí shidzə̀m.

²¹Lá vèn yòʼ bìn aànyùy kisaŋé bàm. A yòʼ dzə̀ á sə̀ ven, a bó yòʼ dzə̀ á lùŋèr ven, bìʼ fo á yòʼ ŋeʼè.

²²NYÙY TÀR yòʼ wíy ten wír və́, bìʼ fo yír rə́ ye ghaʼáné kù wíy a tiy fo. Yì‑iì kòŋ wun woo NYÙY TÀR, e bóo lì ven ji və́ vee wír.

²³Fo kém kí, Nyùy wáa teér mo fo m jáy e wun, e làa yòʼ a bùnrì fo vèn. M kù wíy a dùŋrì ven dzə́ə ye juŋ wùn à yee tìítiy.

²⁴Vèn kú a fàn a dzə̀ NYÙY TÀR, a lim fo wun kijuujùŋ vèn à shilív shén shí shidzə̀m. Vèn kuúmé vinyo ve ghaʼtín ví ve wù yiìn e vèn.

²⁵A vèn kù gòʼ, a jay jayín, bo wù yíi laàr vèn, e kfə̀n laàr fon won.»