Read Lamnso 1 Samuel 15 Bible Online

1 Samuel 15 - Lamnso bible

1 Samuel 15

¹Wìy lòo dzə e ghan símóʼ sí, Samuel suúy e Saul jii, «Dzə̀ mo və̀n wo NYÙY TÀR‑iì tumen ji m yóʼ á wò ji fon wìr və́ veé Isray. Lèn və̀n, yuúrí ri kinyo ke wun woo NYÙY TÀR suuy e wò ki.

²Wun woo NYÙY TÀR woo Taà Mànjòŋ suuy jii, ‹M yíi màʼ ŋgeʼ e wír veé Amalekí kitu, bìʼ téʼ ye áwune‑eè teʼen wír veé Isray e dzəə e ghan se áwune‑eè kóʼ fo Ejiv.

³Dù lèn, e nə̀ə́ wír veé Amaleki e rə́r sí, e laàr áwune wùn à kifá kév kí kidzə̀m. Lá à yòʼ bàvtí kifá fo. Yúyrí vilum wùn à vikìy, à wóné, à wón ve bóri. Yúyrí sá anàʼ wùn aànjìi, aàkameri, à vimbèʼbìy ví.› »[22]

⁴Saul nèn kùm wíri, á báʼtí é Telayim, wù táŋ wír veé Isray nsə̀kì ghii baà, e tàŋ veé Juda nsə̀kì ghvə̀m.

⁵Wùn áwune nèn dù e ŋkàlaʼ Amalek, e làáy e kimbiirìn ke kiwoóy.

⁶Saul tsə́nsí ntum e wír Kene ji áwune fəə́ á fo wír veé Amalekí mvəm, fo wun yiì lòo laàr wír vee fó, e laàr a áwune. Áwune wàá lo á, bìʼ fo atàr véví‑iì dìnèn á koŋ e wír veé Israyi é ghan se vé‑eè kóʼ fo Ejiv. Wír veé Kene nèn fəə̀ fo wír veé Amalekí mvəm.

⁷Saul fùnèn wír veé Amalek, e kèʼ fo Havila, e dù, e mèé e Shur, a kfənér e mbìv Ejiv, e mbìv yee fo shùy yii tó.

⁸Wù koó Fòn Agag woó Amalek e tin, e yùyrí wír və́ adzə̀m adzə̀m.

⁹Saul wùn à wír vəə́ bávtí Fòn Agag, e kfə̀n bàvtí anjiì ve juŋe wùn aànàʼ ve juŋe,[23] à wón nàʼ ve faŋkìné, à vé njiì ve faŋkìné, à kifá kidzə̀m ke kí‑iì dzəə̀n kijuŋ ki. Á yòʼ‑oò ló a kòŋ e laàr kifá ke juŋ ki, á nèn laàr a dzə̀ ke bi kí wùn à ke kí‑iì giikin kí.

¹⁰NYÙY TÀR nèn yòŋ Samuel, e sùúy sho jii,

¹¹«M kér mendzən ji mò‑oò kòʼór á Saul ji fon. Wù bìn ne ndzə̀m e mò, e làa yòʼ dzə́ə a jùmrì kinyo kém.» Samuel yú kinyo kìn, kí bír wun, wù tóŋ e NYÙY TÀR vitsə́ʼ vifur.

¹²Ndzə bvəə́shi jàv, Samuel kóʼ ji wun du yen a Saul, e nèn yù ji Saul dù a ne e ŋkàlaʼ yee Karmel, e tùúy a kifá fo, ke á wáa leéy, a kuumé wun, e nèn tòsín, e sə̀y á e Gilgal.

¹³Samuel sə́y fó, e dù yèn Saul, wù shàʼtì wun jii, «NYÙY TÀR səəvi wò. M yiì ne lim ye NYÙY TÀR ki foon ji m wàá yii.»

¹⁴Samuel dzə́r shó jii, «À yiì, kfən kòóy ka, é bo m wáa yu aànàʼ wùn aànjìi tóŋnin fèsə?»

¹⁵Saul bìnèr jii, «Dzə̀ ve vé rər vémé kì faàsìn fo wír veé Amaleki. Á kì lèm anjiì wùn aànàʼ ve juŋe ji á cu á NYÙY TÀR woo Nyùy wò sho. Vèr áwune nen laàr kibér ke kifa kidzə̀ə́dzəədzə̀m.»

¹⁶Samuel suúy e Saul jii, «Sə́sín, mo‑óò suúy wò kinyo ke NYÙY TÀR‑ii siiyin, e sùúy e mò vitsə́ʼə́.» Saul bínsí jii, «Suúy é m yú.»

¹⁷Samuel nèn a suúy jii, «Mo à fə̀m‑eè dzə́, taʼ kitú ké ntéŋ, bó á yòʼ kù‑uù lo lèm wò ji kitú ke ram seé Isray à? Kí NYÙY TÀR kù‑uù yòʼ wò ji fon woó Isray.

¹⁸Wù wìy lò, e tùm wò ji à du, e fùnèn, e laàr a wír veé Amalek ve bi víne adzə̀m, é la wìr yòʼ à bèr.

¹⁹Yiì ka lèn, bo à tén fóo yu NYÙY TÀR? À lì kifá fo kwaʼ rər, e wìy sho bìʼ ka? Bìʼ ka mo à yiìn kinyo ke bi kí e NYÙY TÀR?»

²⁰Saul suúy jii, «M dzə̀ a m lo yùnín NYÙY TÀR, e yiì kinyo ke wù kì yòŋèn ji m yii. M kì dù rə́r mo wù kì tumen mo, e laàr wír veé Amalek adzə̀m, e wìy a dzə̀ e fòn wov woo Agag.

²¹Vé rərí kfən bàvtí anjiì wùn aànàʼ ve juŋe, e lì, e wìy sho e Gilgal fèn ji á cu á NYÙY TÀR woo Nyùy wò sho.»

²²Samuel dzə́r e wun jii, «Ke NYÙY TÀR koŋ e ŋàŋ kí dzə̀ ka? Wù koŋ a dzə̀ cu ye tonèné kìn ye seeríné mo wù koŋ ji wìr wáa yunín jí rə á? Ghvə́m ye á ghvə́m Nyùyi bòŋ e shaà cu ye á cu wun, réŋréŋ mo yúníne bòŋèn, e shaà fóm se njiì se á tonè.

²³Kitú ke tavín kí bìr réŋréŋ moo fú wo shweŋéné, kiŋkoʼòrwùn kí bír sá réŋréŋ moo mebvə̀m me cuùn mè. À tèn ne fóo yu jí NYÙY TÀR, wù nen mèŋ wò fo fòn.»

²⁴Saul nèn sùúy e Samuel jii, «M dzə̀ a m jáy rú. M yoʼ yiì mo NYÙY TÀR kì yòŋèn, a m yoʼ yiì sa mo à kì suuyin. M kì fàn wíri, e nèn yù a dzə̀ kinyo kév.

²⁵M nén a buʼ wó fo wò ji à laysin á jay wom. Wòsò ku kfə̀n é bàm, é m fiʼ dù, e cù NYÙY TÀR.»

²⁶Samuel sháʼnín shó jii, «Àáy, bó yòʼ dzə̀ m wàa kfən e bàm wòsò, bìʼ fo à tenen fóo yu jí NYÙY TÀR, NYÙY TÀR nen mèŋ sá wò fo fòn woó Isray.»

²⁷Kù mo Samuel bìnkìn ji wun waà sí du, Saul nèn tò, e bàm ndzə̀y sə́, sí saásí.

²⁸Samuel suúy e wun jii, «Kù dzə̀ bey mo NYÙY TÀR faàsìn ne sáʼ yeé Isray lán fo wò kiwo, a wù fò ne e wìr wo sən, wo dzəə̀n wír woo réŋ, a wù kfə̀n shaà wò.

²⁹Nyùy wo dzəə̀n viwìr veé Isray yòʼ yii bóʼti kimboʼtì, a bó yòʼ dzə̀ wù kùvsín kwaʼtì rə́, bìʼ fo wù yòʼ dzə̀ moo wir msòŋ, wo wù yii kúvti kwaʼtì.»

³⁰Saul biímé jii, «M dzə̀ a m jáy. Kii wò, ku yòʼ ghvə̀m mo e kfə́m sé wìr vém sí si, e kfə̀n ghvə̀m e wírí si, é wòsò kfə́n é bàm, é m fiʼ dù cù NYÙY TÀR woo Nyùy wò.»

³¹Á bèy, Samuel kfə́n é bàm wùn Saul, Saul dù, e cù NYÙY TÀR.

³²Samuel nèn lò, e sùúy kitávín jii, «Vèn wiy e Agag woo fon wìr veé Amalek.» Agag wáa wìy feyì tèéter, a kwàʼtì ji ŋgeʼ kpu waà shaà a ne.

³³Yii bèy, Samuel suúy jii, «Mo nyùy yè yiìn ne, vikìy wáa dzə là wón, bo yè won yíi a dzə sa là wán e vikǐy mvəm.» Samuel suúy bey, e nèn gwàtì Agag e vinsher vinshèr e NYÙY TǍR kirə̀ʼ ké cù e Gilgal.

³⁴Samuel nèn lò, e dù e Rama, Saul kfə́n kfə́ e wun laʼ e Gibea.

³⁵Samuel yòʼ kfə̀n‑eè dzəə ghàn yèn Saul, e dù, e meé e wun woo Samuel ghan sé kpu. Yii bèy, wù wáa sòv kitú bìʼ Saul, a NYÙY TÀR rəm ntéŋ ji wun‑eè kòʼór á Saul ji fon woó Isray.