Read Lamnso 1 Samuel 19 Bible Online

1 Samuel 19 - Lamnso bible

1 Samuel 19

¹Saul yiì lò, e sùŋnín e wan və Jonatan wùn à nsheèlav sə́ sí ji áwune ku yùyrí a Davir. Yii bèy, mo Jonatan‑eè koŋ Davir e ŋàŋ,

²wù nèn tòʼ e Davir jii, «Tàr wor taʼ dzə́ə yée yuyrí wò. Kí nén a dzə jii, à bvəə́shi kijàvndzə, à wàa kiíy mo ghán yée dzəə̀n, e lèéy kirə́ʼ kí, e lìr sho.

³Vèr tàr wor bvəə́shi, e dù e kwaʼ, e tiím fo à dzəə̀n, é m wáa ghay wún é kinyò kee kùm wò. A m lòo dzə e yù kinyo, é m yii, áà kiíy.»

⁴Jonatan nèn bvəə̀shí, a burí Davir e tàr wov Saul si, a suúy jii, «Nyàr káʼ, lá á yòʼ yiì a kinyo ke bi kí e ŋgaà və lìm woo Davir, bó wù yòʼ‑oò yiì ne jày á kinyo e fòn. Kinyo kidzə̀m ke Davir yiìn ne ki sə̀ ne a wun woo fon feyì.

⁵Wù‑uù tàm á wùn Goliat, e yùyrí, a bó wù yòʼ‑oò ló a ci a fó kpu. NYÙY TÀR nèn yiì a wír veé Israyi tòn veé Filistia e dzəə ye ghaʼán, a Fòn‑eè lo yèn á sa, wúné wáa bòŋ wun. Fòn sa kfə̀n a tàʼ e yiì kinyo ke bi kí e wìr woo là jay bèn, e yuyrí wun bìʼ ka á?»

⁶Saul yuúrí kinyo ke Jonatan suuyin kin, e nèn yiì kilìʼ jii, «Mo NYÙY TÀR dzəə̀n shó, bo bó yòʼ dzə̀ á yùyrí Davir.»

⁷Jonatan yiì lò, e jàŋ Davir, e kwèr kinyo kidzə̀m sho, e nèn lì wun, e dù yèn tàr wov Saul sho, wù wáa dzə e ntoʼ, a lìm fo fòn mo wù‑uù lim fo mbìy.

⁸Rə́r sí nèn kfə̀n gbù, Davir fəə́, e dù fùnèn wír veé Filistia, e keèrí áwune é dzəə ye tavín, á léʼkír.

⁹Kí nèn kòóy ji kiyoy ke bi kí wiy, a kàr Saul, a dzə̀ ke NYÙY TÀR tsənsin. Kí wìy, a Saul dzə́ e wun lav, kér kòŋ é kiwo, a Davir dzə́ fo si, kum lúŋ.

¹⁰Saul nèn lò, e màʼ kòŋ ji wun tsə́m á Davir sho, e tàŋ a e wǔn lav, Davir bàʼàr, kòŋé koó wún lav, wù léʼ fó ntoʼ vitsə́ʼ vee shooy.

¹¹Saul ku nèn tsə̀nsí wíri ji á du, e kìy á lav Davir, e yùyrí a wun kijàvndzə. Mikal woo wiiy Davir suúy e wun jii, «Aà dzə̀ là fó sə kitú ké vitsə́ʼ vé lán vi, bo á yíi yuyrí wò kijàvndzə.»

¹²Á bèy, Mikal sə́ʼə́r Davir fo shùu wundu, wù léʼ, e lày.

¹³Wù nèn lì shibvə̀m, e neèr e kikun, e sùm kitú e kifá ke vé‑eè tsəmen e wúy bvəyi, e nèn kfə̀vsí shibvə̀m shìy e ndzə̀y sí.

¹⁴Saul nèn tùm wíri ji á du, e wìy a e Davir. Á dù, wiiy və suúy ji wù waà joyì.

¹⁵Saul yú bey, e siìr áwune é bàm ji á du, e yèn á Davir e síi, e lì e kikun ké yàsí, e wìy a sho, é wun wàá yúyrí.

¹⁶Á dù, e nə̀ə́ e lav, e yèn a dzə̀ shibvə̀m e kikun wùn à kifá ke á tsəmen e wúy bvəyi é kitu wo.

¹⁷Saul nèn yiì dzə̀r e Mikal jii, «À bòʼtí mo, e màʼtì ŋgaà wom vibàn, wù léʼ ben bìʼ ka?» Mikal bìnèr ji wù kì yoŋ a ji a m dzə̀ là fóo màʼtì wun, é wun léʼ, bo wun yúyri a mo.

¹⁸Davir léʼ bey, e dù, e yèn Samuel e Rama, e kwèr kinyo kidzə̀m ke Saul yiìn e wun woo Davir. Kí mày, wùn wun lò, e dù e Nayiot, a dzə fo.

¹⁹Saul nèn lò yù ji Davir waà dzə̀ á e Nayiot e Rama,

²⁰e nèn tsə̀nsí wíri ji á du, e koò á Davir. Á dù[29], e yèn, a ŋgoo aŋgàa ntum Nyùyi yov, táŋ Nyùy, a Samuel dzə̀ kilìmbìy kév. Kiyoy ke Nyùy ki nèn wìy sa fo wír Sauli, áwune nèn a yòv sa, a taŋ Nyùy.

²¹Saul yú, e kfə̀n tsə̀nsí ámóʼ vee wíri, á dú, e nèn kù a yòv, a taŋ Nyùy. Wù kfən tùm wír fo akàŋ vee ataár, kí ku kòóy áwune réŋréŋ bey.

²²Wúnwun kitú kfə́ nèn ŋàʼáy, a dù e Rama. Wù dù, e mèé e ndzəv ye tuŋéné é Seku, e dzə̀r ji Samuel wùn Davir sà bèé á? Á suúy e wun ji áwune dzə̀ á e Nayiot fèy, e Rama.

²³Wù nèn a dù fo, e lòo dù e dzəə, Kiyoy ke Nyùy ki wìy sa fo wun, wù wáa yòv, a taŋ Nyùy. Wù kú a yòv bèy, e dù, e mèé e Nayiot,

²⁴e nèn shòʼóy ndzə̀y fó wùn, a yòv, a taŋ Nyùy e Samuel si. Wù rə́sí, e yòv, e shaà shìíy, a wù néŋ kinshóʼ. Á mo kí‑iì kèʼèn, bo á wáa màʼ ŋgàn jii, «Saul sì sá *ŋgaà ntum Nyùy à?»