Read Lamnso 1 Samuel 20 Bible Online

1 Samuel 20 - Lamnso bible

1 Samuel 20

¹Davir nèn lò, e nyèŋ fó Nayiot e Rama, e dù, e yèn Jonatan, e dzə̀r e wun jii, «M yèe le? Jay wom dzə̀ ka? M jày ka e tàr won, é bo wù wáa tàʼ ji wun yúyrí mo?»

²Jonatan bìnèr jii, «Bó yòʼ dzə̀ kee shooy kí kòóy. Wù yòʼ yíi yuyrí wò. Leéy, e yèn, bó yòʼ dzə̀ tàr wor yiì kinyo ke kí meen é kinyò, kìn kee fó tèr, a bó wù bí mo. A dzə̀ wù ghàn é le, e bóo lìtì kin fo mò? Kí yòʼ dzə̀ bey.»

³Davir nèn sùúy jii, «Tàr won kì kijuŋ feyì ji à koŋ a mo. Á kifá ke kí yiìn, la wù yòʼ yiì ji à kiíy á kinyo ke wù taʼ e yiì, bìʼ fo kí yíi a nyar wò. M wáa suúy e wò, a kàn yír NYÙY TÀR ji kpú yémé sì á e kiwo.»

⁴Jonatan suúy e Davir jii, «M yíi yiì kinyo kidzə̀m ke à taʼ ji m yii, e fò e wò.»

⁵Davir nen sùúy e Jonatan jii, «Kibvəə́shí kí dzə̀ *Ŋkǎʼ Ŋwee wo Fíyi, a dzə̀ kishiíy ke m kì kér fóo yikír vèr fòn. Ku màʼtì, é m du, e lìr e kwaʼ, e dzə̀ʼə̀m fo e dù meé e bǎm kibvəəshí e ŋkuùr.

⁶A tàr won tàʼ mo ntéŋ, a dzər ji m sà bèé á, à sùúy ji m kì bùʼ á wó fo wò ji à ku màʼtì, é m nyéŋ, e dù a e Betlehem e věr laʼ, bìʼ fo kfə́ə yér e dzə̀me yíi a cu yeé kiya.

⁷A wù bìnsí ji dzə̀ á kinyo ke juŋ ki, bo ŋgaà wò lìm bòy ne. Yii bèy, a wù lòo dzə, e yù a dzə̀ nyár, à kìíy ji wù wày á ne wáyín ji wun‑éè lémér á mo.

⁸Kii wò, ku dìn koŋ yée e mò, e yùŋrì *mensaŋ me wòsò‑oò gwàrìn e Nyùy si mè.[30] A jày mo, wówò kitú ké, à yùyrí mo. Shií wo à kfən lì mo, a fo a dzə̀ e tàr won ji wù yúyrí dzə̀ wo gha?»

⁹Jonatan suúy jii, «Bó yòʼ dzə̀ kee shooy kí kòóy. A m lòo dzə, e kìíy rúrú ji tàr wor taʼ e yuyrí a wò, la m yòʼ sùúy e wò à?»

¹⁰Davir nèn dzə̀r jii, «A tàr won bìnèr ji shwáv, bo yíi yiì la ji m kiíy?»

¹¹Jonatan suúy e wun jii, «Wìy é wòsò du é kwaʼ.» Áwune nèn dù e kwaʼ.

¹²Á dù bèy, Jonatan suúy e Davir jii, «M suuy bèn, kan yír NYÙY TÀR, wun woo Nyùy wìr veé Isray. M bvəə́shi e dzətí vinyo e tàr wor kibvəə́shí, e kfə̀n dzətí e bǎm kibvəəshí. A m yèn, a shilív sə́ shí dzə̀ shijuŋ kùm wò, é m yii, áà kiíy.

¹³A tàr wor kù lò, a dzə ji wun‑éè lémér á wò, m tén fóo yiì, áà kiíy, e fíʼ leʼ, e bòy, NYÙY TÀR kù màʼ ŋgeʼ e mǒ kitu, e kfə̀n dzə̀sì. NYÙY TÀR kú a dzə vèn wun mo wù‑uù dzə́ wun tàr wor.

¹⁴Yii bèy, kú a dìn koŋ yé ye ruú e mò, kù moo yé NYÙY TÀR, mo m wíy dzə̀ʼə̀m, e dù, e meé. Lá à yòʼ yùyrí mo.

¹⁵Lá à yòʼ wìy màʼtì fó a dìn koŋ yé e kfə́ə yémé e ghan símóʼ sí, a fə̀m dzə̀ é ghan se NYÙY TÀR màysìn ne, e laàr aŋgàa vibàn vé fo kitu ke nsay.»

¹⁶Á bèy, Jonatan wáa gwàr mensaŋ wùn à kfə́ə Daviri, a suúy jii, «NYÙY TÀR kù wíy ghar aŋgàa vibǎn Davir, aá fiʼti.»

¹⁷Jonatan kfən yiì, Davir yùŋrì mensaŋ me kikòŋnìn wùn wun, bìʼ fo Jonatan‑eè koŋ Davir mo wù‑uù koŋ kitú kfə́.

¹⁸Jonatan nèn lò, e sùúy e wun jii, «Kibvəə́shí kí dzə̀ Ŋkǎʼ Ŋwee wo Fíyi. À bvəə́shi e gòʼ fo ŋkàʼ, é kí kiíynín wún, bìʼ fo ntaʼ wò bvəə́shi a tiy kisáŋ.

¹⁹Bvəə́shí lóo dzə e bǎm kibvəəshí e ŋkuùr, à dù fo wò‑oò laayin é ghan se ŋgeʼ rə̀n‑eè kèʼèn, e làáy lèn e ghaa tiy ye á yoŋ ji Esel.

²⁰M bvəə́shi, e màʼ mvən fo e taár moo ji m té a dzə̀ á tíy yee shooy bèy.

²¹Fo bàm, é m nèn tsə̀nsí shiwán shee lumèn, é shí du, a tàʼ mvən sìy. A m lòo dzə, e sùúy sho jii, ‹Leéy, mvən si dzə̀ e wò ghaŋ fèn, lì wìy sho,› bo dzə̀ ji à bòy a ne. Á bèy, à nèn a fəə fo fo. M suuy, kfə̀n kan a dzə̀ yír Nyùy wo wù dzəə̀n shó ji bó yòʼ dzə̀ à yiì nə̀ə́ a e ŋgeʼ.

²²Yii bèy, a m sùúy sho jii, ‹Leéy, mvən si dzə̀ e wò mbìy,› bo NYÙY TÀR yòŋ ne ji à wáa dù.

²³Kee kùm ŋkàʼmé wo wòsò kì yiìn, á kuumé ji NYÙY TÀR tíy a vinjen, e wìy dù, e mày.»

²⁴Davir nèn dù, e làáy e kwaʼ fèy. Kishiíy ké Ŋkǎʼ Ŋwee wo Fíyi kí gheén, fòn nèn dzə̀ʼə̀m, a yikír.

²⁵Wù‑uù dzə́ e kàvàʼ e wǔn ntoʼ fo wù yii rə́si dzə́, a Jonatan dzə́ e fòn ŋkìʼnìn, a Abner dzə́ e fòn ghaŋ. Kirə́ʼ ké Davir ki nèn a dzə kisáŋ.

²⁶Yii bèy, la Saul yòʼ ghày kinyo e kishiíy fóo fèy, bìʼ fo wù‑uù kwaʼtì ji dzə̀ a Davir lì ne a *kifàn, a bó yòʼ dzə̀ wù wìy á fo ŋkàʼ.

²⁷Kfə́n a dzə e kishiíy ké ŋkàʼ ke kí‑iì batin, kirə́ʼ ké Davir ki kú a dzə kisáŋ. Saul nèn dzə̀r e Jonatan jii, «Yì‑ii yii ka, bo wan Jessi və̀y buú fó viyikìr e yooné, e kfə̀n bùú lán?»

²⁸Jonatan bìnèr jii, «Davir‑ii li ghán, e lòn dzə́ə fo mò ji m ku màʼtì, é wun du á e Betlehem.

²⁹Wù‑uu lón, suuy ji m maʼti á, é wun du, bìʼ fo kfə́ə yéví yíi a cu e mvə̀mlaʼ, a fər və yoŋ a ji wun kú a dzə a fo. A m fèn koŋ wun, m màʼtì á, é wun du, e yèn á afə́r və́. Á kinyo ke kí yiìn la Davir yòʼ a dzə a fóo yikír wùn fòn.»

³⁰Kilòŋ kí nèn shwìíy Saul, wù ŋáʼáy e Jonatan wùn, a suúy jii, «Kinyo ke yè won kí kù dzə̀ e wò bvə̀m. M yèn ne ji à suùsín ne a wó vèn wan Jessi və̀y, e nèn shòór kitú ké, e shòór yè won woo dzəə́ wò.

³¹À yòʼ kì ji mo wan Jessi dzəə̀n shó, yòʼ dzə̀ à dzəə wìy yì vifon à? Dù, e lì, e wìy sho fèn. Wù kér fóo kpu.»

³²Jonatan dzə́r e tàr wov jii, «Wù kér fóo kpu bìʼ ka? Wù bùʼ ka?»

³³Saul nèn màʼ a dzə̀ kòŋ ji wun tsə́m á Jonatan sho. Jonatan nèn kìíy ji Saul wày á rú wayín ji wun yúyrí á Davir.

³⁴Jonatan ŋáʼáy fó kitu ke vifa ve yi, e kilòŋ ke shwiiyín kí, e làa yòʼ dzə́ə yikír e kishiíy fóo fèy, kishiíy ke yì‑iì dzəə̀n ji vishiíy vibaà fó ŋwee. A wù yú nyár bìʼ fo kinyo ke tàr wov‑iì yii e Davir ki‑iì shoor wun woo Jonatan.

³⁵Ndzə bvəə́shi, e ràn, Jonatan wùn à shiwán shee lumèn shìy shi dù e kwaʼ e wùn Davir ŋkàʼnín.

³⁶Wù suúy e wan və̀y jii, «Á leʼ, a dù, a tayrí mvən se m maʼ si.» Mo wàn loòn a leʼ a dù, wù màʼ mvən, yí yáʼáy wun.

³⁷Wàn léʼ, e dù, e mèé fo mvəne‑eè gbuùn, Jonatan jàŋ fo bàm jii, «Mvəne yòʼ dzə̀ e wò mbìy fèy à?»

³⁸Wù kfən jàŋ kitávín jii, «Á dù cércér, lá à yòʼ tìím.» Wàn nèn dù, e lì mvən, e wìy sho, e fò e tàr wov lìm.

³⁹Wàn yòʼ‑oò kiiy kinyo ke kí kooyì. Kù‑uù kiiy Jonatan wùn Davir.

⁴⁰Jonatan nèn fò vifá və́ vé rər e wàn, e sùúy sho ji wù wáa kfən a sho fo laʼ.

⁴¹Wàn lò, Davir nèn ŋàʼáy fo mbìv tsə̀n tìy, e tsə̀m ndzəə́ e Jonatan si, e làʼ kitú fo nsay akàŋ ataár. Áwune bámnín, e tòŋnín, yii bèy, Davir tóŋ kfə́ é ŋàŋ.[31]

⁴²Jonatan nèn sùúy e Davir jii, «Dù kijuŋ. Wòsò gwàr ne kikoŋnìn, e lìʼ e NYÙY TǍR yir ji wù kù wíy a tiy a vinjen e wòsò nsàn, e dù, e mày, a tiy bèy sa e rám sesò sí nsàn.» Á bèy, Davir nèn lò, a dù, Jonatan wáa kfən e bàm é laʼ.