Read Lamnso 1 Samuel 23 Bible Online

1 Samuel 23 - Lamnso bible

1 Samuel 23

¹Davir wìy yù ji wír veé Filistiàa waà sí funèn a wír veé ŋkàlaʼ yeé Keyla, kuuy a vifá ve yi fo áwuné riimé,

²wù nèn beè NYÙY TÀR, e dzə̀r jii, «A dzə̀ m dù, e fùnèn wír veé Filistia a?» NYÙY TÀR biímé, e sùúy e wun jii, «Dù, e fùnèn, e bòyìr wír veé Keylàa.»

³Wír Daviri nèn sùúy e wun jii, «Vèsən dzə́ e Juda fèn fan fan, bo a dzə̀ ji vèsən du é Keyla ji á funen wír veé Filistia, kí wàa dzə e le?»

⁴Á bèy, Davir kfən beè NYÙY TÀR, NYÙY TÀR suúy e wun jii, «Sə́y é Keyla, bìʼ fo m yíi yiì, é vèn ton wír veé Filistia.»

⁵Davir wùn à wír vəə́ sə́y é Keyla, e fùnèn wír veé Filistia, e yùyrí áwune wír nyanyày, e kùúy nyám sév, e nèn bòyìr wír veé Keyla.

⁶A kù‑uù dzə̀ é Keyla fèn fo Abiyatar woo wan Ahimelek‑iì wìyìn, e tàtí Davir, a wù kér shiŋkèéy shé kikum[32] shé taà cù she wù‑uù lóo leʼ Saul, e lì, e wìy sho.

⁷Á suúy e Saul ji Davir dù a ne e Keyla, Saul bínsí jii, «Nyùy fèn wày ne wun e mǒ kiwo. Mo wù nəən é ŋkàlaʼ ye yí kér kay wùn à shuu se finèn sí, bo wù wày ne kitú kfə́ é sháŋ.»

⁸Saul nèn tòóy və́ vé rərí adzə̀m ji á sə́y á e Keyla, e tòn a Davir wùn à wír vəə́.

⁹Davir yú ji Saul bàʼtí a ne ji wun nəə́ wun e rə́r sí, wù suúy e Abiyatar woo taà cù ji wù wiy á e shiŋkèéy shé kikum shí.

¹⁰Davir nèn a yòŋ jii, «Éè NYÙY TÀR, Nyùy wìr veé Isray, m yú kinyo kímóʼ kí ji Saul sí báʼti a fóo nəə́ e Keyla, e tòn a fó bìʼ mo woo ŋgaà lìm wò.

¹¹A dzə̀ wír veé Keylàa yiì shwèy mo e Saul a? Saul kù yòʼ yíi wìy rú mo m yuun ben a? Éè NYÙY TÀR, Nyùy wìr veé Isray, ku bìnèr mo.» NYÙY TÀR bìnèr jii, «Saul yíi wìy.»

¹²Davir kfən dzə̀r jii, «Wír veé Keylàa yíi shwèy vèr à wír vémé e Saul a?» NYÙY TÀR bìnèr jii, «Á yíi shwèy.»

¹³Davir wùn à wír vəə́ nèn lò fo Keyla, aá dzə̀ moo ghií ntuùfú bey, a ghan, a beè e virə̌ʼ virə̀ʼ. Á nèn yòŋ e Saul ji Davir lèʼ á ne fo Keyla, la wù yòʼ dzəə dù fo.

¹⁴Davir ku nèn a lìr aàgwan veé woʼ yee Tsiv, a Saul jwímer wun vishiíy vishiíy. Yii bèy, la NYÙY TÀR yòʼ wày Davir e wun kiwo.

¹⁵Davir wáa dzə e Horesh e woʼ yeé Tsiv fèy, e nèn yèn ji Saul fəə á ne, a tàʼ wun, a wìy ji wun laar á dzəʼə̀m rə́.

¹⁶Jonatan woo wan Saul nèn lò dù, e yèn Davir e Horesh fèy, a tavír wun, a suúy ji Nyùy yíi a kìŋsìn a wun.

¹⁷Jonatan kfə́n a suúy jii, «Lá à yòʼ a fàn. Bó yòʼ dzə̀ tàr wor Saul wàa ker dzə́ə yée yiì kinyo e wò. À kù wíy a dzə fon woó Isray, é m wáa dzə ntom yè, a tàr wor kì sá bèy.»

¹⁸Áwune vee wír abàá nèn yùŋrì mensaŋ me kikòŋnìn[33] e NYÙY TǍR si. Davir nèn gòʼ e Horesh, Jonatan kfə́n fó laʼ.

¹⁹Wír veé Tsiv ámóʼó nèn dù, e yèn Saul e Gibea, a bi sho jii, «Bó Davir yòʼ lir e věr wòŋ à? Wù laay e virə̀ʼ vé kilìr veé Horesh, lèn, a wù dzə̀ é gwan woó Hakila wo wù dzəə̀n é mbìv Jeshimon yee tsə́n.

²⁰Nyàr, aá kòŋ, á kù a səy a lèn, é vèr koó wun, e wày á e fòn kiwo.»

²¹Saul suúy jii, «Nyùy ku səə̀vì ven bìʼ koŋ ye vèn kér fo mò.

²²Vèn du, e tàr kijuŋ fo wír ve á lo, á wàa yen wune, e kfə̀n səə̀m fo wù lo, wù wàa dù, a lìr. Wíri suuy e mò ji wù dzə̀ ben, a dzə̀ á tòŋ.

²³Vèn du, e tàr virə́ʼ vidzə̀m ve wù lo, wù wàa lìr sho vi, e wìy, e sùúy e mò. Lóo dzə a wù dzə̀ fó, é vèsən du, é m koó, a fə̀m dzə̀ ji m yíi jwim wun fo mvə̀m màŋgòŋ woó Juda e dzə̀m.»

²⁴Á bèy, wír veé Tsiv vìyi nèn lò, e kfə̀n é bàm é Tsiv, bo Saul yiì sìíy a wìy, a Davir wùn à wír vəə́‑əə̀ dzə̀ é woʼ yeé Maon, e kiwoóy kímóʼ kí e mbìv Jeshimon yee tsə́n.

²⁵Saul wùn à wír vəə́ nèn dù, a tàʼ Davir. Davir yú, e nèn dù lìr e gwan vilan wo wù‑uù dzəə̀n é woʼ yeé Maon fèy, a dzə fo. Saul yú, e nèn a jùmrì Davir fo.

²⁶Saul wìy, a wav fo mbìv gwan yìmòʼ, a Davir wùn à wír vəə́ wáv fo yìmòʼ, wáv bèy, gitì ji á nyéŋ á fo Saul koó áwune. Saul wùn à wír vəə́ nèn a giìmè Davir, e lò ji á waà sí koó,

²⁷ŋgaà ntum wíy fó bàm, e sùúy e Saul ji wù wáa kfən a fo laʼ cércér, bìʼ á fo wír veé Filistiàa siiyin ne, e nə̀ə́ a áwune e rə́r sí.

²⁸Saul nèn màʼtì jum ye wù‑uù jum Davir, a kfən ji wun du, a fùnèn a wír veé Filistia. Á kinyo ke kí‑iì yiìn, é bo á siíy, a yòŋ fó ji Gwan Njàvsìn.

²⁹Davir nèn lò kfə́, e dù e virə̀ʼ vé kilìr veé mbìv En‑Gedi.