Read Lamnso 1 Samuel 25 Bible Online

1 Samuel 25 - Lamnso bible

1 Samuel 25

¹Samuel wìy kpù, wír veé Isray adzə̀me báʼtí, e dzəə̀mè wun e wun laʼ e Rama, e nèn a dìy kpú rə́. Á màysì, Davir nèn lò, e sə̀y é woʼ yee Paran.

²Wìr wùmòʼ wáa dzə e Maon, a dzə̀ ŋgaà kav. Wù‑uù kér kéŋ e Karmel, bvə́y nsə̀kì, njiì ansə̀kì ataár ve wù lo, wù wàa kom wuy fo wùn wó.

³Yír rəə́‑əə̀ dzə̀ Nabal, a dzə̀ wír woo Kalev ram, yé wiiy və Abigail. Abigail‑iì kér vifií, e kfə̀n bòŋ e ŋàŋ, a lum və dzə̀ wir shilìv she bi shí, a kfə̀n dzə̀ wir kisaŋ.

⁴Davir lò yù é woʼ ji Nabal kóm a wúy njiì,

⁵e nèn tsə̀nsí wónlě nsùm e ghvə̀m fo Nabal wùn, tsə́nsi bèy, suuy jii, «Vèn kóʼ, e yèn Nabal e Karmel, e shàʼtì wun e mǒ yir.

⁶Vèn suúy shó ji mo woo Davir shaʼtì a wun ji Nyùy səəvi á wùn à kfə́ə rəə́, à kifá kfə́ kí kidzə̀m.

⁷A m yú a ji wù waà sí kóm a wúy njiì. Wù ku kuùmé a ji mo anshìy vəə́‑əə̀ dzəə̀n vèr áwune ghán sidzə̀m, vèr yòʼ‑oò ló a nə̀ʼsì a áwune, a bó kifá kév kí yòʼ‑oò lo lày a e ghan símóʼ sí se áwune‑eè dzəə̀n á e Karmel.

⁸Wù dzə́r á aànshìy vəə́, aá naari á e wun. Vèn nén a wìy a e kishiíy ké ŋkàʼ ben, m wáa yòŋ a ji wù səə́sí á ven kijuŋ. Kii wun, wù ku fò á vé lìm və́ wùn à wan və woo Davir kifá ke wù kérí.»

⁹Wír Daviri meé fó, e tiìsí ntum Davir rə̀n e Nabal, e nèn a tiy, a yuurí.

¹⁰Nabal nèn lò bìnèr jii, «Davir və̀n dzə̀ la? Wan Jessi və̀n dzə̀ la? Akwàn aníne sí nyéŋkir fo atàr véví e ghan fen.

¹¹Bó yòʼ dzə̀ m lì kibán kém wùn à mendzə́v mè, à nyàm ye m seen ji ye aŋkom anjiì vém, e fò e wír ve bó m yòʼ kiìn fo á fəəné.»

¹²Wír Daviri bìnkìr, e kfə̀n é bàm, e naàrì e wun kinyo kidzə̀m ke Nabal yòŋèn.

¹³Davir yòŋ e wír vəə́ jii, «Vèn deevi nyùy sén sí.» Á nèn deèvì nyùy sév, Davir deèvì rə́ə. Wùn áwune nèn lò wír ghii kweè, a koʼ fo. Vee ghii bàá gòʼ e bàm, a shìy vifá.

¹⁴Wìr lìm Nabal wùmòʼ wáa ghay wún wùn Abigail woo wiiy Nabal jii, «À yú kinyo kímóʼ kí á? Davir‑ii tsə́nsí aŋgàa ntum və́ fó woʼ ji á wiy, e shàʼtì a tàr wòsən. Vé‑ee wiy, wù‑uu wáa kuùrì áwune kúurin.

¹⁵Yii bèy, áwune‑eè ló a ker ver kijuŋ, e làa yòʼ a nyàvrì e vèr. Fo ghan se vèr‑iì dzəə̀n é kwaʼ vèr áwune, bó kifá kér kí yòʼ‑oò lo lày.

¹⁶Áwune‑eè kiŋsìn ver e shùy, kiŋsìn vitsə́ʼ. Kù bey, ghán sidzə̀m se vèr‑iì leey anjiì vér, a vèr áwune gháné.

¹⁷Ku kwàʼtì, e yèn ó sa ji sà dzə̀ á yèe le á, bìʼ fo a dzə̀ kinyo kìn kí wìy e ŋgeʼ si e tàr wor wùn à kfə́ə rəə́ kitu. Wù dzə̀ kfə́ə wìr wo bó wìr yòʼ suuy kinyo sho, wù yù.»

¹⁸Abigail yú bey, e tùmnín, e boò ntuʼ se kiban ghii baà wùn à meluʼ mè mebaà, aànjiì ve bavíné atàn, à ŋkaà se kimbùr si sitàn wùn à báŋ se vici se saŋèn sí, sé kitiír ké *vayin mentuʼ wií, sé kici ké *fig mentuʼ ghii baà. Wù tátí vifá vìn, e kùr e vimbèʼbìy ví ndzə̀m,

¹⁹e nèn sùúy e və́ vé lìme jii, «Vèn wáa dù sho fo mbìy, é m siíy bó a wìy.» Wù suúy bey, e làa yòʼ yiì, é lum və Nabal kiíy.

²⁰Wù siíy, e kòʼ kfə́ kee kimbèʼbìy, e dù, e lòo bìnkìr e bǎm gwan, e nèn tò e Davir wùn à wír vəə́ wùn, aá sə́y e wun si.

²¹Davir wáa wìy bèy, a wù kì sí rəm jii, «Yì‑iì yiì ka mo, bo m wáa kìŋsìn vifá ve jwè və̀n ji lá kifá ki yòʼ lày feyì? M fèn yiì ne kinyo ke juŋ ki, wù láʼ mo a dzə̀ é ke bi kí.

²²A lòo meé kijàvndzə, a bó m yoʼ laàr vilum vee Nabal kfəə adzə̀m, Nyùy kù màʼ ŋgeʼ ye tavín e mǒ kitu.»[34]

²³Abigail yén Davir, e nèn gìtì, sə̀ʼə́y fo kimbèʼbìy, e tsə̀m ndzəə́, e làʼ kitú fo nsay e Davir si.

²⁴Wù gbú e Davir si bèy, e sùúy sho jii, «Tàr wor, jay kù dzə̀ a dzə̀ e mò vèr mòʼón. Kii wò, ku màʼtì, é m súŋnín e wò, mo woo wánlè wò. Ku yuùrí ji m sà suuy ji ka á?

²⁵Lá tàr wor yòʼ a leéy a kinyo ke kiŋgà ké Nabal, bìʼ fo wù kù yii kiyúŋ kiyúŋ moo yír rə́.[35] Vinyo və́ vidzə̀m vi kù dzə̀ vé kiyuŋ ví. Yii bèy, fo mò woo wánlè wò, m yòʼ‑oò lo yèn wír ve tàr wor‑iì tsənsin.

²⁶M nén a suúy e tàr wor jii, mo NYÙY TÀR kìmèn ne wun fo wù yúyrí wír, e siìr ŋkfə́tír e kiwó kfə́ kí, wù wáa kiíy a jii, mo NYÙY TÀR dzəə̀n shó, a tàr wor dzə̀ shó, aŋgàa vibàn vəə́ kù wíy a ker a ŋgeʼ a dzə̀ yìwun ye Nabal wíy a ker, a kù dzə̀ mo wìr dzə̀m wo wù wóŋ wuú tàr wor wíy a ker.

²⁷Tàr wor ku sə̀ á afómo ve wánlè və fó e wun vìn, e fò áàŋgàa ŋgoo vəə́.

²⁸Kii wun, wù ku làysìn a ajay wánlè və. M kì ji NYÙY TÀR kù wíy fo sáʼ e tàr wor, e tuúy a ji rə́ wùn à yé rám rəə́, bìʼ fo tàr wor funèn rə́r sé NYÙY TÀR, a bó jay yòʼ dzə̀ á e tàr wór kinyò, e kèʼ fo meterí.

²⁹A wíri ŋàʼáy, e shèm e tàr wór bàm ji á yúyrí wun, bo NYÙY TÀR woo Nyùy və yíi kìŋsìn a dzəʼə̀m rə́, e rə̀ŋ aŋgàa vibàn və́ mo á rə̀ŋ tíy fó kiŋkoʼ.

³⁰NYÙY TÀR wíy yiì vinyo ve juŋ ve wù‑uù kàʼàn tàr wor shó, e lèm a wun ji fon woó Isray,

³¹é la kitú ki yòʼ wìy a saʼ tàr wor á ji wù‑uù yùyrí á wír kisáŋ, kìn ji wù‑uù siìr á ŋkfə́tír. Kii wò tàr wor, NYÙY TÀR wíy kóʼor wun ji fon, wù kù kuùmé a mo woo wánlè və.»

³²Davir nèn sùúy e Abigail jii, «Búríi wáa dzə fo NYÙY TÀR woo Nyùy wìr veé Isray wo wù kì tsənsin wò lán fo mǒ wùn.

³³Nyùy ku səə̀vì wò fo ntir ye juŋ ye à foon e mò. Yì yiì ne, la m yòʼ yùyrí wír lán, e siìr ŋkfə́tír e kiwó kém kí.

³⁴Rúrú, mo NYÙY TÀR woo Nyùy wìr veé Isray dzəə̀n shó, a là fo à kì tavin a wìy, bo ndzə kì yíi a ran, a bó wìr woo Nabal kfəə woo lumèn e mòʼón yòʼ dzə̀ə́ sho e tin. Kù kìm wun mo fo m lémér wò.»

³⁵Davir nèn sə̀ vifá ve wù kì wiy e fo e wun, e sùúy e wun jii, «Á kfən fo laʼ ji nyaáŋ. M yù ne kisúŋnìn ké, a m yíi yiì mo à lóné.»

³⁶Abigail kfə́n fó laʼ, e yèn Nabal, a wù kér ŋkàʼ wo yii kér afon, a wù nó ne feyì, wúné wáa bòŋ wun bóŋen, la Abigail yòʼ dzəə sùúy kinyo sho, e dù meé mo ndzə‑əə̀ ranen.

³⁷Lòo dzə kijàvndzə, a meluʼ mè raáné ne fo si wo, wiiy və nèn sùúy vinyo vìy sho. Tímé kpú wun, wù nèn tàvtí tavtín moo tíy.

³⁸Vishiíy ví wáa meé e ghvə̀m, Nyùy nèn dzə̀v Nabal, wù kpú.

³⁹Davir yú kpú Nabal, e nèn yòŋ jii, «Búríi wáa dzə fo NYÙY TÀR wo wù kìmèn ŋgaà lìm və fó jay. Wù siìr ne ŋkfə́tír e Nabal fo kuù ye wù‑uù kuùn mo.» Davir nèn lò, e tsə̀nsí ntum e Abigail ji wun koŋ a ji wù wiy a dzə a wíiy və.

⁴⁰Vé ntum Daviri meé é Karmel, e sùúy e Abigail jii, «Davir tùm ver ji vèr wiy, e lì a wò ji à wáa dzə a wíiy və.»

⁴¹Abigail tsə́m ndzəə́, e làʼ kitú e nsay, e sùúy jii, «Wánlè lìm tàr wor və̀ne, a wù dzə̀ kibáʼtín fó yìi dù, a sù wuú vé lìm və́.»

⁴²Abigail túmnín, e kòʼ kimbèʼbìy, wón və́ lìm vee atàne tátí wun, wùn aàŋgàa ntum Daviri nèn a kfən. Wù nèn dù a dzə wíiy Davir.

⁴³A Davir‑iì sí kér Ahinoam woó Jesreel e lav ji wiíy. Wùn Abigail nèn tàtí, a dzə vikìy və́.

⁴⁴Ké wíiy və woo Mikal wo dzəə̀n wan Saul ki‑iì sì ji Saul‑iì sə̀ ne, e fò e Palti woo wan Laish woo wír woó mvə̀mlaʼ yee Gallim.