Read Lamnso 1 Samuel 28 Bible Online

1 Samuel 28 - Lamnso bible

1 Samuel 28

¹Yì‑iì dzə̀ é ghan fóo fèy, wír veé Filistiàa báʼtí vé rər vév ji á du, e fùnèn a wír veé Isray. Akish suúy e Davir jii, «Kú a kiíy ji vèn à wír vée yíi tatí mo, aá du rə́r.»

²Davir bìnèr jii, «Dzə̀ rú. M dzə̀ ŋgaà lìm wò, aà yíi yen e sí yée kifá ke dzə̀ m yiì.» Akish suúy jii, «Beerì feyì, kèʼ fo lèn, m lèm ne wò ji wir rə̀r wom wo wù wáa shìy mo.»

³Yì‑iì dzə̀ é ghan sin, a Samuel kpú ne, á dzəə́mé wun e wun ntèʼ yee Rama, e dìy kpú rə́. A Saul júm ne vé ŋgàŋe wùn à wír ve á mbaa aŋkfəə, á fəə́ fó Isray.

⁴Wír veé Filistiàa nèn bàʼtí, e wìy, e tàm kiláʼáy é Shunem. Saul báʼtí wír veé Isray adzə̀m, á tám kév kee kiláʼáy é Gilboa.

⁵Saul yén vé rər veé Filistia, e nèn a fàn, a yàʼ.

⁶Wù beè NYÙY TÀR shó, la NYÙY TÀR yòʼ fə̀m bìnèr wun e njèm, kìn e Urim wùn Tumim, kìn ji wù shaa fo aŋgàa ntum vəə́.

⁷Saul nèn sùúy e nsheèlav sə́ sí jii, «Vèn taʼ wiíy wo wù shóʼ ŋgàŋ, é m du tàr fo wun.» Áwune suúy jii, «Wùmòʼ dzə̀ é En‑Dor.»

⁸Á bèy, Saul nèn kùv wún və́, e màʼ ndzə̀y se sən sí, wùn à vilum abàá nèn dù fo wiíy və̀y wùn vitsə́ʼə́. Saul yòŋ sho jii, «Shwéŋ ó, e sùúy mo kinyo ke kí yíi koóy, e jàŋ ŋkfəsày wo m lo yòŋ yír rə́.»

⁹Wiíy və̀y suúy e wun jii, «Rúrú, à kì kinyo ke Saul yiìn. Wù jùm ne vé fùú wùn à vé ŋgàŋe fó wòŋàn. À kóʼor kitám ji m li shó, e ràn dzəʼə̀m yém bìʼ ka?»

¹⁰Saul nèn lìʼ e wun jii, «Mo NYÙY TÀR dzəə̀n shó, à yòʼ yíi a ker ŋgeʼlàʼ bìʼ kinyo kìn.»

¹¹Wiíy və̀y nèn dzə̀r jii, «M jaŋ a dzə̀ la, e fò e wò?» Saul bìnèr jii, «Samuel.»

¹²Wiíy və̀y sásín, e yèn rú Samuel, e tòŋ kitávín, e sùúy e Saul jii, «À bòʼtí mo ji ka? Kí dzə̀ wò Saul.»

¹³Fòn Saul suúy shó jii, «Lá à yòʼ a fàn. À yèn a dzə̀ ka?» Wiíy və̀y suúy jii, «M yèn a dzə̀ ŋkfəsày, a wù fəə́ fo nsay.»

¹⁴Saul dzə́r jii, «Wù kiʼ e le?» Wù bìnèr jii, «Dzə̀ kindzə̀n ke taàta wìr, a kí máʼ vikúm ve da vi.» Saul nèn kìíy ji dzə̀ á Samuel, e nèn tsə̀m ndzəə́, e làʼ kitú fo nsay.

¹⁵Samuel dzə́r e Saul jii, «À jívir mo bìʼ ka? À jaŋ mo fo aŋkfəə́ wòŋ bìʼ ka?» Saul bìnèr jii, «M dzə̀ é ŋgeʼ ye tavín. Wír veé Filistiàa taáme mo e rə́r sí, a NYÙY TÀR bín ne ndzə̀m e mò. Bó wù yòʼ dzəə́ binèr kinyo kém, fə̀m à shishàr sho, kìn wù shaa fo *ŋgaà ntum və, kìn é njèm. Á kinyo ke kí yiìn, bo m waá jàŋ wò ji à ku sùúy a kinyo ke a dzə̀ m yiì.»

¹⁶Samuel suúy shó jii, «À jaŋ mo é gha lèn? NYÙY TÀR bìn ne ndzə̀m e wò, a sì ŋgaà vibàn wò.

¹⁷NYÙY TÀR yiì ne a dzə̀ kinyo ke wù‑uù shaàn fo mò, e sùúy e wò. Wù faàsì ne sáʼ fo wò kiwo, e fò e wìr wo sən, a dzə̀ Davir.

¹⁸Mo wò‑oò tenen fóo yu jí NYÙY TÀR, e tèn fóo laàr wír veé Amalek wùn à kifá kév kí kidzə̀m, NYÙY TÀR nen yiì kinyo ke wù yiìn kin lèn e wò.

¹⁹NYÙY TÀR yíi way vèn à wír veé Israyi e wír veé Filistiàá wo. Bvəə́shi lòo dzə kibvəə́shí, é vèn à wón vén vee vilume tátí mo áàŋkfəə́ wòŋ. NYÙY TÀR kù yíi way vé rər veé Isray adzə̀m e veé Filistiàá wo.»

²⁰Kù mo Samuel suuyin e Saul bèy, Saul nèn fàn, e gbù fo nsay tèéter. Vitaáví ví yòʼ‑oò dzə̀ə́ e wùn wó, bìʼ fo wù yòʼ‑oò lo yì kifá e kishiíy fóo fèy.

²¹Wiíy və̀y dù fo Saul‑iì néŋé, e yèn ji wù waà fan a e ŋàŋ, e nèn sùúy sho jii, «Kii wò, yuúrí ŋgaà lìm wò, m lo biìmé kpú, e yiì kinyo ke à kì lonen.

²²Kii wò, ku yù kinyo ke ŋgaà lìm wò yoŋ ki. M lo fèr vifá ve yi, e fo, áà yí, e keèrí vitaáví, a dù du yé.»

²³Saul sháʼnín ji wun yòʼ yí a kifá. Wír vəə́ tátí wùn à wiíy və̀y, e lòn wun, wù biímé, e nèn nànèn fo nsay, e dzə̀ʼə̀m e kikun.

²⁴Wiíy woo shooy nèn gìtì, e seè wan nàʼ wo wù‑uù kóʼor e wun laʼ, e lì meŋkfəŋ, e tòv, e tòn kibán kee là nyaà shó,

²⁵e lì vifá ve yi vee shooy, e tìír e Saul wùn à wír vəə́ si. Á yí, e nèn lò vitsə́ʼ vee shooy.