Read Lamnso 1 Samuel 29 Bible Online

1 Samuel 29 - Lamnso bible

1 Samuel 29

¹Wír veé Filistiàa nèn lò, a baʼtí vé rər vév adzə̀m e Afek, wír veé Israyi wáa tam kév é ghaa ntoò ndzə̀v yeé ghaa Jesreel.

²Afon veé Filistiàa wáa tuy shwín, a wìy wùn à ŋgoo sév sí, see wír ghvə̀m ghvə̀m wùn à see wír wií wií, à see wír nsə̀kì nsə̀kì si. Davir wáa tuy, a wìy fo bàm wùn à və́ vee wíri, à Fòn Akish.

³Amfòómé veé Filistiàa dzə́r jii, «Viŋgà vé wìr veé Hibru vìn vi yii ka fen?» Akish bìnèr jii, «Kí dzə̀ wír Davir wo wù‑uù dzəə̀n wír wo kuʼùn Fòn Saul woó Isray, e bóo leʼ, e wìy, a dzə vèr wun. Vèr wun sì kiyá e kifá ki, a bó m yoʼ yèn jay və, e kèʼ fo ghan se wù‑uù màʼtìn Saul, e wìy, e meé lèn.»

⁴Yii bèy, amfòómé veé Filistiàa kú a bvəərí wùn à Akish, a suúy sho jii, «Tsə́nsí jwè woo shooy e bàm é mvə̀mlaʼ ye wò‑oò lèmèn áwune shó. Lá à yòʼ màʼtì, é wù du rə́r vèr áwune, bìʼ fo a wù dù, rə́r sí lòo màʼ, tam wù kfə̀n bìnkìr, e kìʼ vèsən. Kinyo ke a dzə̀ wù yiì bo tàr wov wáa kòŋ wun ki dzə̀ ka, e shaà ji wù yúyrí á wír vesən?

⁵Bó yòʼ dzə̀ wun woo Davir wo vikìy‑iì ceŋ, yov, táŋé ji Saul yúyrí wíri ansə̀kì, Davir yúyrí kfə́ ansə̀kì ansə̀kì à?»

⁶Á bèy, Akish toóy Davir, e sùúy sho jii, «M suuy kin, a Nyùy kì, wò‑oò ló a lìm fo mo kijuŋ. M koŋ ji à wáa tom a mo, é wòsò wáa màʼ rə́r. M yoʼ yèn jay wùmòʼ e wòsò nsàn, e kèʼ fo kishiíy ke wò‑oò wìyìn, e yèn mo. Yii bèy, afon ámóʼó yoʼ biìmé wò.

⁷Bìnkìr ji nyaáŋ, a kfən e bàm. Lá à yòʼ yiì kinyo ke kí tén afon veé Filistia.»

⁸Davir dzə́r jii, «M bùʼ a dzə̀ ka? M jày a dzə̀ ka, e kèʼ fo kishiíy ke mò‑oò wìyìn fo wò wùn, e wìy meé lán? Kòóy ka, bo kí wáa dzə ji bó yòʼ dzə̀ m dù, e fùnèn aŋgàa vibǎn fòn woo taàtá wom?»

⁹Akish bìnèr jii, «M kì ji à yú a mo réŋréŋ mo nshìylav Nyùy yii yú Nyùy, yii bèy, amfòómé veé Filistiàa nen shàʼnín ji bó yòʼ dzə̀ vèsən áwune dù á rə́r.

¹⁰Kí nén a dzə jii, à bvəə́shi, à lò é yuv, a ndzə dzə̀ə́ ji ndzə̀vrì ndzə̀vrì, a kfən e bàm vèn à wìr dzə̀m wo wù‑uù màʼtìn Saul, e lò e wò bàm.»

¹¹Á bèy, Davir wùn à wír vəə́ bvəə́shí, e lò e yuv kijàvndzə, e nèn a kfən e bàm é nsay Filistia, wír veé Filistiàa wáa dù e Jesreel.