Read Lamnso 1 Samuel 30 Bible Online

1 Samuel 30 - Lamnso bible

1 Samuel 30

¹Vishiíy ví shaà vibaà, Davir wùn à wír vəə́ wáa kfən e bàm é Tsiklag, a wír veé Amaleki nəə́ ne rə́r é virə̀ʼ veé Negev, ǎ Tsiklag. Vé‑eè sùm Tsiklag, e wày və́y shó, fóo shwí,

²á táyrí wir dzə̀m, à ŋgàywìr, à wánlè, e dù sho atin.

³Davir wùn à wír vəə́ meé é Tsiklag, e yèn, aá tón ne fó e və́yí, e koò vikìy wùn à wóné, e dù sho.

⁴Áwune yén bey, e nèn a toŋ, e tòŋ féyì, e nèn lò, a boorí boorín.

⁵A vé‑eè koò ne sa vikǐy Davir vee abaà, vee Ahinoam woó Jesreel wùn Abigail wo yì‑iì dzəə̀n wiiy ŋkfə Nabal woó Karmel.

⁶Davir nèn lò, e nə̀ə́ é ŋgeʼ ye tavín, bìʼ fo wír və́ adzə̀me‑eè sí dzə́ ji á lo, e tsəmrí wun e tíyí. Kí‑iì nyàr áwune féyì mo vé‑eè kuuyin wón vév, e dù sho. Yii bèy, Davir ku tìír a dzə̀ NYÙY TÀR woo Nyùy və fó mbìy, wù távír wun.

⁷Davir lò, e sùúy e Abiyatar woo taà cù woo wan Ahimelek jii, «Dù, e lì shiŋkèéy shé kikum shí,[36] e wìy yèn mo shó.» Wù nèn dù, e lì, e wìy sho.

⁸Davir nèn dzə̀r e NYÙY TÀR ji wun sa nyoòrì wír ve á nəən wun vìn a? NYÙY TÀR biímé ji wù wàá nyoori, wù waà ló koo a áwune, e faàsì a wíri wùn à vifá ve á kuuyin ví.

⁹Davir wùn à wír və́ vee ghií ntuùfuú nèn lò a dù. Á dù bèy, e mèé e kiwoóy ké ndzəv ye á yoŋ ji Besor, wír ámóʼó nèn gòʼ fo,

¹⁰bìʼ fo vé‑eè ghanen ne, e dòr, a làv làvìn, a bó yòʼ‑oò dzə̀ á yù fóo tumsín kiwoóy kee shooy. Ve vé‑eè gòʼòné‑eè dzə̀ ghii baà. Davir nèn lì vee ghii kweè, wùn áwune wáa dù.

¹¹Á lòo dù, e yèn wánlè nsùm woo wír woó Ejiv e kwaʼ, e nèn lì, e wìy yèn Davir sho. Á nèn fò wun mendzə́v wùn à vifá ve yi vi.

¹²Vé‑eè fò wun báŋ se kici ké *fig se saŋèn sí shintuʼ shimòʼón, e fò sé kitiír ké *vayin mentuʼ mebaà, wù yí, sí rəə́ raáné, bìʼ fo wù yòʼ‑oò ló a ker kifá kée yi kìn kée no e bǎm vishiíy vitaár.

¹³Davir dzə́r e wun jii, «Tàr won lìm dzə̀ la? À wìy fo feé?» Wù bìnèr jii, «M dzə̀ wan wìr Ejiv, a m kfə̀n dzə̀ kwǎn wìr woó Amalek. Sì lán ji vishiíy vitaár mo tàr wor lìm‑ee màʼàyìn mo, bìʼ fo mò‑oo joyì.

¹⁴Vèr‑ii nəə́ rə́r é Negev, e faàsì vifá fo wír veé Kereti, e kfə̀n faàsì fo rám Kalev ye dzəə̀n wír veé Judàa, e nèn tòn Tsiklag e və́yí.»

¹⁵Davir dzə́r e wun jii, «A dzə̀ à dìn mo fo ŋgoo rə̀r yee shooy dzəə̀n á?» Wù biímé, e sùúy jii, «Kàn yír Nyùyi ji à yòʼ yíi yuyrí mo, kìn ji à yòʼ yíi siìr mo e tàr wor lìm, é m nèn lì wò, e sə̀y shó fo áwune dzəə̀n.»

¹⁶Wù lì Davir, e sə̀y shó fo ŋgoo rə̀r‑iì dzəə̀n, a yì sáŋrí fó e dzə̀m, a yikír, a nonín, a cèŋ, bìʼ vifá ve vé‑eè kuuyin vigháʼán fó wòŋ woo Filistia wùn à woo Judàa.

¹⁷Ndzə bvəə́shi, e jàv, Davir nəə́ áwune e rə́r sí, e màʼ, e dù mèé e ŋkuùr. Wìr mòʼón fo áwune yòʼ‑oò lo lèʼ, kù‑uù jòʼsì wónlě nsùm vee ghii kweè ve vé‑eè koʼon akamer, e lèʼ.

¹⁸Davir sə́ vifá vidzə̀m ve wír veé Amaleki‑iì kuuyin wùn à vikìy və́ vee abàá.

¹⁹Wìr mòʼón fo áwune yòʼ‑oò lo lày, fə̀m à ŋgàywìr, à wánlè, fə̀m à wánlè lùmèn, à wánlè wiíy, fə̀m à ka kí shó ke wír veé Amaleki‑iì liìn. Davir‑iì wìy e kifá kidzə̀m ki, a bó kifá ki yòʼ‑oò lo lày.

²⁰Davir‑iì faàsì sá bvə́y wùn à nàʼ wìr veé Amalek e dzə̀m, e nèn lèm jeéy. Wír vəə́ wáa jùm, a dù sho fo mbìy,[37] du bèy, suuy jii, «Vin vi dzə̀ vifá ve Davir ve wù kuuyin fó kwaʼ rər.»

²¹Davir kfə́n fo wír vee ghii bàá‑aà dzəə̀n, ve vé‑eè gòʼòn é Kiwoóy ké Besor bìʼ dór ye vé‑eè dorin. Áwune nèn fəə̀ ji wùn à Davir, à wír ve wùn áwune‑eè duùné wàá tárnín. Á tárnín, Davir shàʼtì áwune kijuŋ.

²²Yii bèy, a wír ámóʼó ve vé‑eè duùn wùn à Daviri‑iì dzə̀, aá kér liì wo bi, aámóʼó kér ŋgeʼ e bvə̀m. Á nèn lò, a suúy jii, «Bó yòʼ dzə̀ vèr jàv vifá veé kwaʼ rər vèr à wír vìne, bìʼ fo áwune yoʼ lò dù rə́r vèr áwune. A dzə̀ wìr kù lì a dzə̀ wiíy və wùn à wóné, a dù sho.»

²³Davir sháʼnín jii, «Àáy, afə̀r vem, lá vèn yòʼ a kàm kifá ke NYÙY TÀR foon e vèsən. NYÙY TÀR kìŋ vèsən, e yiì, vèsən tón wír ve á kì nəən vèsən e rə́r sí.

²⁴A dzə̀ yuùrí la kinyo ke vèn suuy kìn? Wír ve á kì gòʼòn, a shìy vifá e kilaʼáy wùn à ve á kì duùn é shùu rərí kù lo, e jàv réŋréŋ.»

²⁵Davir nèn wày kinyo kìn ji nsər. Á ku nèn a jùmrì nsər yee shooy e Isray, e kèʼ fo ghan fóo fèy, e wìy shem lán.

²⁶Davir meé é Tsiklag, e nèn tsə̀nsí vifá vímóʼ ví e ŋkar sə́ sí, se yì‑iì dzəə̀n kfə́m sé wìr veé Juda. Wù wáa tsə́nsi bèy, a suuy jii, «Fómo won və̀ne, a dzə̀ vifá ve m faàsìn fo aŋgàa vibǎn NYÙY TÀRí.»

²⁷Wù‑uù tsə̀nsí e veé Beteli, e tsə̀nsí e veé Ramot wo wù dzəə̀n é mbìv Juda yee tsə́n, e kfə̀n tsə̀nsí e veé Jattiri,

²⁸à veé Aroyeri, à veé Sifmoti, à veé Eshtemoàa,

²⁹à veé Rakali, à veé ŋkà se laʼ seé Jeraameeli, à veé Kene,

³⁰wùn à veé ŋkà se laʼ see Horma wùn à Borashan, à yee Atak,

³¹e lì yeé Hebrone. Wù‑uù tsə̀nsí é virə̀ʼ vidzə̀m ve wùn à wír vəə́‑əə̀ ghán sho.