Read Lamnso 1 Samuel 5 Bible Online

1 Samuel 5 - Lamnso bible

1 Samuel 5

¹Mo wír veé Filistiàa faàsìn ŋkùv mensàŋ Nyùy, e nèn lì fo Ebeneser, e dù sho e Ashdod.

²Áwune dù bèy, e nə̀ə́ sho e Dagon woo nyùy wóv lav, e nàŋsín, e tìír e Dagon ghaŋ.

³Wír veé Ashdodi bvəə́shí kijàvndzə, e lòo lò e yuv, e yèn, a Dagon gbú ne, e tsə̀m sí e nsay e mbìy ŋkùv mensàŋ NYÙY TÀR. Áwune nèn shùr, e siìr fo wù‑uù dzəə̀n.

⁴Á kfən bvəə̀shí kijàvndzə, e lòo lò e yuv, e yèn a Dagon kfə́n ne gbù, e tsə̀m sí fo nsay e mbìy ŋkùv mensàŋ NYÙY TÀR, a kitú kfə́ wùn à wó si kóykír ne, a neŋ e kikùr ke shùu lav, Dagon nèn jòʼsì wún wún.

⁵Á kinyo ke kí‑iì yiìn, bo kí wáa dzə jii, kèʼ fo ghan fóo fèy, e wìy shem lán, bó atàá cù Dagon, à wìr dzə̀m wo wù nəə e Dagon lav e Ashdod yòʼ yii láʼ kiwuú e Dagon kikùr ke shùu lav.

⁶NYÙY TÀR nèn kfə̀n màʼ ŋgeʼ ye tavín e wír veé Ashdodí kitu, e kfə̀n màʼ sa e wír vee áwuné ghaŋe, e yiì, vinto vi tó áwune.

⁷Wír veé Ashdodi yén kinyo ke kí kooyì, e nèn a suúy jii, «Lá vèsən yòʼ dzəə màʼtì ŋkùv mensàŋ Nyùy woó Isray e vèsə́n mvəm. Wù màʼ ne ŋgeʼ ye tavín e vèsə́n kitu, e kfə̀n màʼ sa e Dagon woo nyùy wòsən.»

⁸Áwune nèn beè atǎr saʼ veé Filistia. Á báʼtí adzə̀m, áwune dzə́r jii, «Vèsən lo, e yèe le e ŋkùv mensàŋ Nyùy wìr veé Isray?» Atǎr saʼa bìnèr jii, «Vèsən tsə́nsí é Gat.» Á nèn tsə̀nsí ŋkùv mensàŋ Nyùy wìr veé Isray e Gat.

⁹Mo wù meen é Gat, NYÙY TÀR màʼ ŋgeʼ ye tavín é ŋkàlaʼ foo fèy, e yiì, vinto vi tó wír vee fó, à ŋgàywìr, à wánlè. Fan ye tavíné wáa dzə fo.

¹⁰Á nèn tsə̀nsí ŋkùv mensàŋ Nyùy e Ekron. Wù meé fó, wír vee fóo nèn a taŋnín taŋnín, a suúy jii, «Á wìy ne e ŋkùv mensàŋ Nyùy wìr veé Isray e věr nsay ji wù tátí á ver, e yùyrí.»

¹¹Áwune nèn beè atǎr saʼ veé Filistia. Á báʼtí adzə̀m, wíri suúy aáwune jii, «Vèn siir ŋkùv mensàŋ Nyùy woó Isray fo wù‑uù loòn, fo wù tátí ver, e yùyrí.» Nyùy‑iì lo màʼ ŋgeʼ ye tavín fó, fan ye vé‑eè fan kpúu wáa dzə mvəmlaʼ yee shooy e dzə̀m.

¹²Vinto vi‑iì koò wír ve á yòʼ‑oò lo kpùkír, á wáa bùr tóŋ, kiléŋléŋ kí wáa koʼ e yuv.