Read Lamnso 1 Samuel 6 Bible Online

1 Samuel 6 - Lamnso bible

1 Samuel 6

¹Ŋkùv mensàŋ NYÙY TÀR wáa dzə e wòŋ woo Filistia, kí meé ŋwee saàmbà,

²wír vee fóo nèn kùm atàá cù wìr ve á shwéŋ vinyo, e dzə̀r aáwune jii, «Vèr yíi yèe le e ŋkùv mensàŋ NYÙY TÀR? A vèr lò ji á tsə́nsí fo wù‑uù loòn, á tsə̀nsí é dzəə yeé le?»

³Á bìnèr jii, «A vèn tsə́nsi ŋkùv mensàŋ Nyùy wìr veé Isray e wun woo Nyùy, la vèn yòʼ tsə̀nsí kisáŋ. Vèn kù mùm, kìn é dzəə yeé le, e tsə̀nsí wùn à vifá ve cù ye yí su ajay vi. Vèn yii bèy, é vèn nèn bònén, e kfə̀n kìíy kinyo ke kí yiìn, é bo Nyùy dzə làa yòʼ tav tsə̀ʼ ŋgeʼ fo věn wùn.»

⁴Wíri kfən dzə̀r jii, «Vifá ve cù ye yí su ajay ve dzə̀ vèr tsə̀nsí ví dzə̀ vika?» Atàá cù wùn à vé fùú bìnèr jii, «Vèn li *kisha ke mbàm ke baar kí, e fèr vimfìʼìr ve vintokìr vi shó vitàn, e fèr sa vimfìʼìr ve mbàv sí vitàn. Á ku fèr vitàn vitàn mo atǎr saʼ veé Filistiàa dzəə̀n, bìʼ fo ŋgeʼ ye yì‑iì gbuùn e věn kitu kù dzə̀ yìwun ye yì‑iì gbuùn áàtǎr saʼ véné kitu.

⁵Vèn ku fèr vimfìʼìr ve vintokìr wùn à vé mbàv ve ví bívir woŋ wón, e fíʼ dìn ji vèn gbù a ne Nyùy wìr veé Isray, ghanmóʼ, é wù yar fó a màʼ ŋgeʼ e věn kitu, e yàr fóo màʼ aànyùy véné kitu, e màʼtì sa nsay yen nyaáŋ.

⁶Vèn kù táv kitú tavín, yii moo wír veé Ejiv wùn à Farao bèn ji ka? Bó NYÙY TÀR yòʼ‑oò lo keèrí áwune e wó ye tavíné, á màʼtì wír veé Isray ji á wáa dù à?

⁷«Vèn fer kiténtén ke fíy ki ke yii səŋ nyám si, e tàʼ anàʼ abaà ve á liy wón, a bó á yòʼ‑oò yiì ne sə̀ŋ kiténtén, e kùr kiténtén kiy aáwuné wùn, e nèn tsə̀ʼ wón, e dù wày é kày.

⁸Vèn yíi lì ŋkùv mensàŋ, e tiír e kitentén, e wayrí vifá ve cù ye yí su ajay e shiwan shé ŋkùv fo ghaŋ, e nèn màʼtì kiténtén, é kí wáa dù.

⁹Kí lóo dù, vèn wàa leéy. A kí lò a koʼ e dzəə yeé Bet‑Shemesh, a kfən e nsay Isray, bo yiì ŋkùv Nyùy wìr veé Isray kinyo ke biibí kin e vèsən. Kí dzə̀ làa yòʼ a dù bèy, é vèsən nèn kìíy ji ŋgeʼ sesən sí yòʼ lò a dzə̀ á fo fo, bo sí lò a dzə̀ á fo səné.»

¹⁰Wíri ku nèn yiì bèy, e lì anàʼ vee shooy, e kùr kiténtén aáwuné wùn, e tsə̀ʼ wón, e dù wày é kày,

¹¹e nèn tìír ŋkùv mensàŋ NYÙY TÀR é kitentén, e kfə̀n lì shiŋkùv she shí kér vimfìʼìr ve mbàv wùn à vé vinto vi, e tìír sa fo.

¹²Anàʼa ku nèn lò, a dù, a dù tìítiy e dzəə yeé Bet‑Shemesh, e làa yòʼ bìn e kirə̀ʼ, du bèy, tóŋé. Atǎr saʼ veé Filistiàa wáa jùmrì anàʼ vìy, e dù, e mèé e bìíy yeé Bet‑Shemesh.

¹³A wír veé Bet‑Shemeshi tín kfə́ə saŋ yee *wit e kiwoóy. Á lòo màʼ sí, e yèn ŋkùv mensàŋ, e nèn a sheʼrí ji wù sà yènsín a?

¹⁴Anàʼa sə̀ŋ kiténtén bey, e dù, e mèé e Joshua woo wír woó Bet‑Shemesh sum, e nèn tìím e ghaa lum kilan. Wíri nèn shètì kiténtén, e nèn lì anàʼ vìy, e tòn, a cù NYÙY TÀR shó.

¹⁵Kí wáa koóy bèy, a wír veé ram Levi ámóʼó dzə̀ fó. Kù‑uù sə̀ʼə́r áwune ŋkùv mensàŋ NYÙY TÀR wùn à shiŋkùv she vimfìʼìr ve vifa vi‑iì dzəə̀n shó, vee kisha ke mbàm ke baar kí, e tìír e kitu ke lum kilan fèy. Wír veé Bet‑Shemeshi ku nèn a cù NYÙY TÀR é kishiíy fóo fèy, ton nyám se tonèn sí, seé se seén sí.

¹⁶Atǎr saʼ veé Filistia vee atàne wáa tiy, a leéy, e nèn lò bìnkìr, e kfə̀n é bàm é Ekron e kishiíy fóo fèy.

¹⁷Vimfìʼìr ve vinto vi‑iì dzə̀ vitàn ve wír veé Filistiàa‑aà tsənsin e NYÙY TÀR ji cu ye yí kwaay ajay. Vé‑eè fèr e kisha ke mbàm ke baar kí. Kee kimòʼón ki‑iì dzə̀ ké wìr veé Ashdod, kímóʼ kí ké wìr veé Gasa, kímóʼ kí ké wìr veé Ashkelon, kímóʼ kí ké wìr veé Gat, e lì ké wìr veé Ekron.

¹⁸Mbàv see kisha ke mbàm ke baar kí sí‑iì dzə̀ sá sitàn mo ŋkà se laʼ seé Filistia si dzəə̀n wùn aàtǎr saʼ véví. Ŋkàlaʼ e dzə̀m‑eè kér kay ye vé‑eè bomen, e kaàrí sho, e tàr, e bóo lì ntèʼ see fó ghaŋ see là kay. Lúm kilan wo vé‑eè tiirin ŋkùv mensàŋ sho e Joshua woo wír woó Bet‑Shemesh súmé kù dzə̀ kisəəm ké kinyò kee shooy, e wìy shem lán.

¹⁹Wír veé Bet‑Shemesh ámóʼó‑oò lò, e tùytí sí e ŋkùv mensàŋ. NYÙY TÀR nèn yùyrí áwune wír msaàmbà[11]. Wír veé Bet‑Shemeshi wáa sòv kitú e ŋàŋ, bìʼ fo NYÙY TÀR‑iì teèn wíri anín.

²⁰Á nèn a ghaynín jii, «A dzə̀ tìím la e NYÙY TǍR si, Nyùy wo wù ranen ben? Ŋkùv və fèn lo lò fo vèsən, é wù du a dzə̀ fo ala?»

²¹Á gháynín bey, e nèn tùm wíri fo wír veé Kiriat‑Jearimé wùn, á dù, e tiìsí jii, «Wír veé Filistiàa siìr ne ŋkùv mensàŋ NYÙY TÀR. Vèn sə́y, e lì, a koʼ sho.»