Read Lamnso 1 Samuel 9 Bible Online

1 Samuel 9 - Lamnso bible

1 Samuel 9

¹Wìr woó ram Benjamin wùmòʼ wáa dzə, a dzə̀ ŋgaà kav, a yír rəə́ dzə̀ ji Kish, a dzə̀ wan Abiel woo wan Tsəror, woo wan Bekorat wo tàr wov‑iì dzəə̀n wan Afiya.

²Kish‑iì kér wán, a yír rəə́ dzə̀ Saul, a wù meé é wánlè nsùm. Wìr yòʼ‑oò ló a dzə e Isray wo wù‑uù bòŋèn moo Saul. Wù kfə̀n‑eè dàr, e shaà wir dzə̀m.

³Vimbèʼbìy vé Kish woo tàr à Saul vi nèn wìy lò, e lày. Kish suúy e wan və Saul jii, «Lì wir lìm wùmòʼ, é vèn wun du, e tàʼ vimbèʼbìy ve ví làyìn.»

⁴Áwune nèn dù, a tàʼ fo aŋkoŋ veé Efrayim, a tàʼ fo ŋgvən yeé Shalisha, e làa yòʼ yen. Á dù e ŋgvən Shaalim, a ví yòʼ dzə̀ fó. Á kfən ghàn é nsay Benjamin, e làa yòʼ yen.

⁵Áwune kfən dù, e mèé e ŋgvən Tsuv, Saul nèn sùúy e wìr lìm wo wùn wun‑eè dzəə̀n jii, «Wòsò wáa kfən e bàm, fo tàr wor shaa kinyo ke vimbèʼbìy, a rə̀m a dzə̀ kesò.»

⁶Wìr lìm və̀y suúy e Saul jii, «Yén mbà, wìr Nyùy wùmòʼ dzə̀ é wòŋàn, a wíri ghvə̀m wun e ŋàŋ, bìʼ fo wù suuy kinyo, kí kù ghèén. Wòsò du fó lèn, ghanmóʼ, é wù suúy e wòsò fo dzə̀ á yèn vimbèʼbìy vin.»

⁷Saul dzə́r e wìr lìm və̀y jii, «A wòsò dù, á fò ka shó? Vifá ve yi vi mày ne fo wòsò kibàm. Wòsò yòʼ kér fómo wùmòʼ wo aá dù, á fò shó. Wòsò siì kér ka?»

⁸Wìr lìm və̀y bìnèr jii, «Leéy, m kér shimbàm, a dzə̀ shimbàsìn she *shekel. Mo‑óò fó e wun, é wù nèn sùúy fo dzə̀ wòsò yèn vimbèʼbìy vin.»

⁹Yì‑iì dzə̀ é wòŋ Isray fo ŋgùʼ, wìr‑iì lóo tàʼ e kiíy kinyo fo Nyùy, wù nèn a suúy ji wun‑éè du á fo ŋgaà si, bìʼ fo vé‑eè yoŋ *ŋgaà ntum Nyùy e ghan fen ji ŋgaà si.

¹⁰Saul suúy e ŋgaà lìm və̀y jii, «Dzə̀ nshù ye juŋ. Wìy ri, é wòsò wáa dù.» Áwune nèn lò, a dù e mvə̀mlaʼ fo wìr Nyùy və̀y‑iì dzəə̀n.

¹¹Mo áwune kóʼ e mvə̀mlaʼ, e nèn tàrnín wùn à wónlě ŋgòn ámóʼó ve vé‑eè wiy ji á tú mendzə́v, e dzə̀r aáwune jii, «Ŋgaà si dzə̀ fó a?»

¹²Áwune bìnèr jii, «Wù du e věn mbìy fèy. Vèn shúr wúné, wù kì wiy e mvə̀mlaʼ lán, bìʼ fo wíri kér cu e kirə̀ʼ ké cù.

¹³Vèn du, e lòo nəə́ e mvə̀mlaʼ, é vèn ku nèn yèn wun, é bo wù wáa koʼ e kirə̀ʼ ké cù ji wun du e yìkír. Yòʼ dzə̀ wír ve á kì biiné kèʼ a yikír, a bó wù wíy, e səə̀vì vifá ve cù. Vèn a dù rì lèn, é vèn yén wun.»

¹⁴Áwune nèn a koʼ e mvə̀mlaʼ, e lòo nəə́, e tò e Samuel wùn, a wù sí kóʼ e kirə̀ʼ ké cù.

¹⁵Kí wáa koóy bèy, a NYÙY TÀR‑ii yii ne, Samuel kiíy, é bo Saul bvəə́shí a wìy, ji

¹⁶bvəə́shi lòo dzə a e ghan fen kibvəə́shí, é wun tsə́nsí á wír fo wun wùn wo wù loòn á fo nsay Benjamin. Samuel yéné, wù yòʼ á wun e meŋgvə́r mè ji ŋgaà saʼ wo wù wáa saʼ wír NYÙY TÀR veé Isray. A wun wíy sə a áwune fo wír veé Filistiàá wo, bìʼ fo wun yenen á ne ŋgeʼ se wìr və́, e kfə̀n yù á tóŋ yév.

¹⁷Mo Samuel yenen Saul, a wù wiyì, NYÙY TÀR nèn sùúy e wun jii, «Á wír wo mò‑oo yoŋ e wò. Dzə̀ wun wo wù wíy a saʼ wír vém.»

¹⁸Saul kóʼtí e Samuel mentsə̀m é shùu kày, e dzə̀r shó jii, «Lav ŋgaà si dzə̀ feé?»

¹⁹Samuel bìnèr jii, «Dzə̀ mo ŋgaà si woo shooy. Á koʼ shùy e kirə̀ʼ ké cù. À yíi yikír wòsò lán. M bvəə́shi, é bóo maʼti wò, áà wáa dù. M lóo màʼtì, é m suúy vinyo vidzə̀m ve ví gháʼ ven.

²⁰Kee kùm vimbèʼbìy ve ví‑ii làyìn é bǎm vishiíy vitaár, lá vèn yòʼ dzə́ə a fàn, bìʼ fó vé‑ee yenen ne. Wìr wo wír veé Israyi kér shií shó lán dzə̀ la, bánlà wò, vèn à kfə́ə tàr woné?»

²¹Saul bìnèr jii, «Bó m yòʼ dzə̀ kém a dzə̀ wír woó ram Benjamin à? Bó yòʼ dzə̀ rám ye yí dorin, e shaà rám seé Isray sidzə̀m à? Kí kfə́ə yémé dòr sá e shaà kfəə́ sidzə̀m seé Benjamin? Bo dzə̀ à ghàn é le, bó a yòŋ kinyo kee ben e mò?»

²²Áwune nèn a dù e kirə̀ʼ ké cù. Mo á meen fó, Samuel lì Saul wùn wìr lìm və, e nə̀ə́ sho e ŋgày yee fo vé kimbii‑iì dzəə̀n. Wù dzə̀ʼə̀r áwune, á wáa dzə vitú ve ntaʼ fo wír vee mtaár ve vé‑eè biiné.

²³Samuel nèn sùúy e wìr wo wù‑uù naa vifá ve yi jii, «Wìy e nyàm ye m kì foon ji à lem rə̀y.»

²⁴Wù nèn lì kiyéŋ ké nyàm ke nyàm‑eè dzəə̀n é mbìv yìmòʼ kijuŋ, e wìy neèr e Saul si. Samuel suúy e Saul jii, «Rə̀n dzə̀ ye á kì lèmèn e wò, á yi. Dzə̀ ye mò‑oo lèmèn e wò, e kèʼ mo mò‑oo kèʼèn, a bi wíri ŋkàʼ vən ji wíri wiy, lóo yikír, áà wáa yi.» Saul ku nèn yìkír wùn Samuel e kishiíy fóo fèy.

²⁵Áwune màysì fo kirə̀ʼ ké cù, e sə̀y é mvə̀mlaʼ, Samuel lì Saul, e kòʼ shó e mbìv lav yee fó yuv, a suŋnín e wun.

²⁶Ndzə bvəə́shí, lòo jàv, Samuel yòŋ Saul fo mbìv lav yee fó yuv ji wù lo á e yuv, é wun tsəə́né á wun. Saul nèn nànèn, wùn Samuel wáa dù.

²⁷Á lòo fəəsín mvəmlaʼ, Samuel suúy e Saul jii, «Suúy, é wìr lìm wáa du fo mbìy, áà tiím fen e bǎm shintàm, é m tiísí ntum Nyùy e wò.»