Read Lampung Api MATIUS 12 Bible Online

MATIUS 12 - Lampung Api bible

MATIUS 12

¹ Pada suatu rani Sabat, waktu Isa liu di sai kebun gandum, jelma-jelma sai nutuk Ia mulai mutil gandum, raduni nganikni mani mebetoh.

²Waktu ulun-ulun Farisi ngeliak udi, tian cawa jama Isa, “Liak! Jelma-jelma sai nutuk Niku ngelanggar hukum agama neram jama ngelakuko sai dilarang waktu rani Sabat.”

³ Isa ngejawab, “Makkung pernah kedo keti ngebaca tentang api sai dilakuko Daud waktu ia rik jelma-jelmani mebetoh?

⁴ Ia kuruk mik delom Lamban Ibadah; raduni nganik ruti sai radu dipersembahko jama Allah. Padahal menurut hukum agama neram, ia maupun jelma-jelmani mak ngasi nganik ruti udi — angkah imam-imam gaoh sai ngasi.

⁵ Atau makkung pernah kedo keti ngebaca di delom hukum Musa unggal rani Sabat imam-imam sai betugas di Lamban Ibadah, ngelanggar atoran rani Sabat, kidang mak disalahko?

⁶Perhatiko api sai Kucawako inji: di dija wat sai lebih balak jak Lamban Ibadah.

⁷ Di delom Alkitab tetulis: Belas kesiando sai Kuhagako, lain hak kurban binatang. Kik sekirani keti benor-benor ngerti cawa ano, pasti keti mak haga nyalahko jelma-jelma sai mak besalah.

⁸Mani Anak Manusia bekuasa atas rani Sabat.”

⁹Isa ninggalko rang udi raduni mik di sai lamban ibadah.

¹⁰Di dudi wat jelma sai culukni lumpuh kebelah. Pira-pira jelma sai haga nyepok kesalahan Isa, betanya jama Ia, “Ngasi kedo ngunyaiko jelma pada rani Sabat?”

¹¹ Isa ngejawab, “Seandaini wat sai jelma jak hantara keti ngedok sai biri-biri, rik waktu rani Sabat biri-biri udi tumbak mik delom lubang sai relam; api sekedau biri-biri udi mak haga berusaha ngeluahko biri-biri udi jak delom lubang udi?

¹²Nah, manusia lebih berega jak biri-biri! Jadi, kik injuk reno, ngasi nulung jelma waktu rani Sabat.”

¹³Kak raduni Isa cawa jama jelma sai culukni lumpuh kebelah udi, “Julorko culukmu.” Jelma udi ngulorko culukni, rik culuk udi munyai injuk culukni sai kebelah lagi.

¹⁴Kidang jelma-jelma Farisi ninggalko lamban ibadah udi, raduni bemufakat untuk ngebunuh Isa.

¹⁵Isa pandai bahwa jelma-jelma Farisi udi beniat jahat tehadap diri-Ni. Jadi Ia mik jak rang udi rik lamon jelma nutuk Ia. Raduni Ia ngunyaiko sunyinni jelma sai meruyuh.

¹⁶Kidang Ia ngelarang tian ngeni pandai tentang Ia jama jelma bareh.

¹⁷Jama injuk reno tejadido api sai diucakko Allah liwat Nabi Yesaya,

¹⁸ “Injido utusan-Ku sai Kupilih, Jelma sai Kukasihi rik sai bekenan di hati-Ku. Ruh-Ku haga Kukeniko jama Ia, keadilan-Ku haga diberitako-Ni jama bangsa-bangsa.

¹⁹Ia mak haga betangkar atau mekik, atau bepidato di renglaya-renglaya.

²⁰Buluh sai tekulai mak haga dipatahko-Ni lampu sai redup mak haga dipadamko-Ni. Ia haga bejuang sampai keadilan tecapai;

²¹sunyinni bangsa haga ngepikko harapan jama Ia.”

²²Kak raduni diusung jama Isa sai jelma buta rik bisu mani dikuasai ulih ruh jahat. Isa ngunyaiko jelma udi sehingga ia dapok cawa rik ngeliak.

²³Sunyinni jelma hiran rik cawa, “Mungkin kedo Ia inji Anak Daud sai dijanjiko udi?”

²⁴ Waktu jelma-jelma Farisi ngedengi ano, tian ngejawab, “Jelma inji angkah dapok nguser ruh jahat, mani Beelzebul, kepala ruh-ruh jahat, radu ngeni kuasa udi jama Ia.”

²⁵Isa pandai sai dipikerko jelma-jelma Farisi udi. Jadi Ia cawa jama tian, “Kik sai negara pecoh delom kelompok-kelompok sai saling bemusuhan, negara udi mak dapok betahan. Rik sai kota atau keluarga sai pecoh-pecoh rik bemusuhan peperda tian haga hancor.

²⁶Injuk reno muneh di delom kerajaan iblis; kik sai kelompok nguser kelompok sai bareh, maka kerajaan iblis ano radu tepecoh-pecoh rik haga runtuh.

²⁷Keti cawa bahwa Nyak nguser ruh jahat mani kuasa Beelzebul. Kik injuk reno jama kuasa sapa jelma-jelma sai nutuk niku nguser ruh jahat. Jelma-jelma sai nutuk niku ano tenggalan sai ngebuktiko bahwa keti salah!

²⁸Kidang Nyak nguser ruh jahat jama kuasa Ruh Allah. Rik udi retini bahwa Allah radu mulai memerintah di tengah-tengah keti.

²⁹Injuk repa jelma dapok kuruk mik delom lamban jelma sai kuat untuk ngerampas hartani, kik ia mak mena ngikok jelma kuat udi? Radu jak seno, ampai ia dapok ngerampas hartani.

³⁰ Jelma sai mak memihak Nyak setemonni nantang Nyak. Rik jelma sai mak ngebantu Nyak setemonni nyadangko guai-Ku!

³¹Ulihni seno, pandai mak, kik jelma bebuat dusa rik ngucakko sai ngehina, ia dapok diampuni! Kidang kik ia ngehina Ruh Allah, ia mak dapok diampuni!

³² Kik jelma ngucakko sai hal nantang Anak Manusia, ia dapok diampuni, kidang kik ia ngehina Ruh Allah, ia mak dapok diampuni, baik tano maupun di akherat!”

³³ “Untuk mansa uah sai betik, batangni haga subor. Kik batangni mak subor, uahni mak betik juga. Subor mawatni sai batang kepandaian jak uahni.

³⁴ Niku jelma jahat, injuk repa niku dapok ngucakko hal-hal sai betik kik niku jahat? Api sai diucakko ulih banguk udido sai ngelimpah jak hati!

³⁵Jelma sai betik ngucakko hal-hal sai betik mani ia mebetik nihan. Sebalikni, jelma sai jahat ngucakko hal-hal sai jahat mani ia jahat nihan.

³⁶Jadi, ingokdo: waktu Rani Kiamat, unggal jelma haga betanggung jawab atas unggal cawani sai mak beguna.

³⁷Mani cawa-cawamu tenggalando sai haga dipakai untuk memutusko niku besalah atau mawat.”

³⁸ Radu jak seno pira-pira guru agama rik ulun-ulun Farisi cawa, “Pak Guru, sekam mirak ngeliak Bapak nyani keajaiban.”

³⁹ “Hara jahatni rik durhakani jelma-jelma zaman inji!” jawab Isa. “Keti ngilu Nyak nyani keajaiban? Keti mak haga dikeni sai keajaiban pun, kecuali keajaiban Nabi Yunus.

⁴⁰ Yunus tinggal telu rani telu bingi di delom tenai iwa balak. Injuk reno muneh Anak Manusia haga tinggal telu rani telu bingi di delom tenai bumi.

⁴¹ Waktu Rani Kiamat, penduduk Niniwe haga bangkit jejama jelma-jelma zaman inji rik nuduh tian. Mani jelma-jelma Niniwe udi betubat jak dusa-dusa tian, waktu Yunus bekhotbah jama tian. Kidang di dija tano wat sai lebih balak jak Yunus!

⁴² Waktu Rani Kiamat, ratu jak negeri Selatan haga bangkit jejama jelma-jelma zaman inji rik nuduh tian. Mani untuk ngedengiko pengajaran Salomo sai bijak, ratu udi nyani lapahni sai jaoh nihan jak uncuk bumi. Kidang di dija tano wat sai lebih balak jak Salomo!”

⁴³“Kik ruh jahat ninggalko sai jelma, ruh udi bekeliling mik rang-rang sai menyangu untuk nyepok rang istirahat, kidang ia mawat ngedapokni.

⁴⁴Ulihni seno ia cawa, ‘Nyak haga muloh mik lamban sai radu kutinggalko.’ Waktu ia sampai di disan, lamban udi bangkang, mekecah rik teratur.

⁴⁵Raduni ia mik rik ngusung pitu ruh bareh sai lebih jahat jak ia. Raduni tian kuruk mik delom jelma udi, raduni tinggal di dudi. Rik akherni keadaan jelma udi jadi lebih burak jak mula-mula. Senodo juga sai haga tejadi jama jelma-jelma jahat zaman inji.”

⁴⁶Sementara Isa masih cawa jama jelma lamon udi, ratongdo emak rik puari-puari-Ni. Tian cecok di luah sambil berusaha untuk dapok cawa jama Ia.

⁴⁷Sai jelma jak ulun lamon udi cawa jama Isa, “Pak, emak rik puari-puari Bapak wat di luah. Tian mirak cawa jama Bapak.”

⁴⁸Raduni Isa ngejawab, “Sapa emak-Ku? Sapa puari-puari-Ku?”

⁴⁹Raduni Ia nunjuk jama jelma-jelma sai nutuk Ia rik cawa, “Injido mak rik puari-puari-Ku.

⁵⁰Jelma sai ngelakuko kehaga Bapa-Ku di surga, iado puari bakas, puari bebai, rik emak-Ku.”