Read Lampung Api MATIUS 13 Bible Online

MATIUS 13 - Lampung Api bible

MATIUS 13

¹Waktu rani seno juga Isa ninggalko lamban udi raduni mik pingger danau rik mejong di dudi.

² Lamon nihan jelma sai bekumpul di sekeliling Isa, ulihni seno Ia mik mejong di delom jukung, sedang jelma lamon udi cecok di pantai.

³Raduni Isa ngajar lamon hal jama tian jama memakai perumpamaan. “Sai jelma petani mik nabor bibit,” injuk renodo Isa mulai jama cerita-Ni.

⁴“Waktu sedang nabor, wat bibit sai gugor di renglaya. Raduni burung ratong rik bibit ano dikanik sampai bela.

⁵Wat juga sai gugor di rang bebatu-batu, sai tanohni cutik. Bibit-bibit ano geluk tuoh ulih kurang tanoh.

⁶Kidang waktu matarani radu cakak, tunas-tunas udi mulai layu, raduni menyangu rik mati mani bakakni mak kuruk cukup relam.

⁷Wat muneh bibit sai gugor di tengah semak keruwi. Semak keruwi udi tuoh rik ngehimpit tunas-tunas udi sampai mati.

⁸Kidang wat juga bibit sai gugor di tanoh sai subor, raduni bebuah; wat sai seratus, wat sai enam puluh, rik wat juga sai telu puluh kali lipat.”

⁹Seraduni nyeritako perumpamaan ano Isa cawa, “Kik ngedok cuping, dengiko!”

¹⁰Kak raduni jelma-jelma sai nutuk Isa ratong rik betanya jama Ia, “Mengapi Bapak makai perumpamaan kik cawa jama ulun lamon udi?”

¹¹Isa ngejawab, “Mani keti radu dikeni anugerah untuk mengetahui rahasia tentang injuk repa Allah memerintah, sedangko tian mawat.

¹² Mani jelma sai radu ngedok, haga dikeni lebih lamon lagi, rik ia haga bekelebihan. Kidang jelma sai mak ngedok api-api, maka cutik sai wat jama ia malah haga diakuk.

¹³Udido sebabni Nyak makai perumpamaan kik cawa jama ulun lamon, mani tian ngeliak, kidang injuk jelma sai mak ngeliak; tian ngedengi kidang injuk jelma sai mak ngedengi rik mak ngerti.

¹⁴ Ulihni seno tejadido sai dinubuatko Nabi Yesaya, ‘Allah cawa: Tian haga terus ngedengi kidang mak ngerti; tian haga terus memperhatiko kidang mak pandai api sai tejadi.

¹⁵Mani pikeran jelma-jelma inji radu jadi kudul, cuping tian radu jadi tilu rik mata tian radu dipejamko. Inji tejadi in mata tian dang ngeliak, cuping tian dang ngedengi, pikeran tian dang ngerti rik dang muloh jama Nyak, raduni Nyak ngunyaiko tian.’ ”

¹⁶ “Kidang hara beruntungni keti,” ani Isa jama jelma-jelma sai nutuk Ia, “mani keti temon ngeliak rik ngedengi.

¹⁷Ingokdo, lamon nabi rik jelma sai taat jama Allah mirak ngeliak sai keti liak tano inji, kidang tian mak ngeliakni. Tian mirak ngedengi api sai keti dengi tano inji, kidang tian mak ngedengi.”

¹⁸“Dengiko api reti perumpamaan tentang sai penabor udi.

¹⁹Bibit sai gugor di renglaya injuk jelma-jelma sai ngedengi kabar tentang injuk repa Allah memerintah, kidang mak ngerti. Si Jahat udi ratong rik ngerampas api sai radu ditabor delom hati tian.

²⁰Bibit sai gugor di rang sai bebatu-batu, injuk jelma-jelma sai ngedengi kabar udi, rik langsung nerimani jama senang hati.

²¹Kidang kabar udi mak bebakak delom hati tian, sehingga mak tahan saka. Reno tian menderita kesusahan atau penganiayaan ulihni kabar udi, langsung tian murtad.

²²Bibit sai gugor di tengah-tengah semak keruwi injuk jelma-jelma sai ngedengi kabar udi, kidang khuater tentang hurik tian rik mirak hurik mewah. Ulihni seno kabar jak Allah tehimpit di delom hati tian hingga mak bebuah.

²³Rik bibit sai gugor di tanoh sai subor injuk jelma-jelma sai ngedengi kabar udi rik paham. Tian bebuah lamon, wat sai seratus, wat sai enam puluh, rik wat sai telu puluh kali lipat hasilni.”

²⁴Isa nyeritako luot sai perumpamaan jama ulun lamon, cawa-Ni, “Kik Allah memerintah, keadaanni injuk perumpamaan inji: Sai petani menabor bibit sai betik di kebunni.

²⁵Waktu di bingi, waktu sunyinni jelma lagi pedom, musuh petani udi ratong nabor bibit lioh di hantara gandum udi, raduni mik.

²⁶Waktu tanoman-tanoman udi tuoh rik mayang-mayangni mulai tuoh, keliakan muneh lioh udi.

²⁷Raduni jelma-jelma sai digaji petani udi ratong jama petani udi rik cawa, ‘Tuan, kan Tuan nanom bibit sai betik di kebun Tuan? Repa jadini sampai wat lioh di disan?’

²⁸Petani udi ngejawab, ‘Udi guaini musuh.’ Raduni jelma-jelma sai digaji petani udi betanya luot, ‘Tuan haga kedo sekam mik nyabut lioh udi?’

²⁹‘Dang,’ jawabni, ‘mani kik lioh udi cabut, kanah gandumni nutuk tecabut.

³⁰Tagando lioh udi tuoh jama-jama sampai waktu ngegetas. Kanah nyak cawa jama jelma-jelma sai ngegetas: Kumpulko pai lioh, ikok, raduni suah. Radu jak seno kumpulko gandumni, raduni segok di delom lumbung.’ ”

³¹Isa nyeritako luot sai perumpamaan jama jelma lamon, cawa-Ni, “Kik Allah memerintah, keadaanni sebagai perumpamaan inji: Sai biji sawi diakuk ulih sai jelma, raduni ditanom di kebunni.

³²Biji sawi yakdo bibit sai paling lunik. Kidang kik radu tuoh, ia jadi paling balak di hantara tanoman-tanoman. Ia jadi batang, hingga burung-burung ratong besarang di cabang-cabangni.”

³³Wat sai perumpamaan bareh sai diceritako Isa jama jelma-jelma lamon. “Kik Allah memerintah, keadaanni injuk ragi sai diakuk ulih sai bebai, raduni diaduk jama epak puluh liter tepung terigu sampai bekembang sunyinni!”

³⁴Sunyinni diajarko Isa jama ulun lamon jama memakai perumpamaan.

³⁵ Jama injuk reno tejadido sai dicawako ulih nabi, “Nyak makai perumpamaan kik cawa jama tian; Nyak haga ngabarko hal-hal sai tesegok semenjak tejadini dunia inji.”

³⁶Radu jak seno Isa ninggalko ulun lamon udi, raduni kuruk lamban. Jelma-jelma sai nutuk Ia ratong rik cawa, “Cuba Bapak terangko jama sekam reti perumpamaan tentang lioh di hantara gandum udi.”

³⁷Isa ngejawab, “Jelma sai nabor bibit sai betik udi yakdo Anak Manusia.

³⁸Kebun udi yakdo dunia inji. Bibit sai betik udi yakdo jelma-jelma sai radu jadi umat Allah. Lioh udi yakdo jelma-jelma sai bepihak jama iblis.

³⁹Musuh sai nanomi lioh udi yakdo iblis. Masa panen yakdo Rani Kiamat, rik jelma-jelma sai ngegetas udi yakdo malaikat-malaikat.

⁴⁰Injuk repa lioh dikumpulko rik disuah di delom apui, injuk reno juga waktu Rani Kiamat kanah.

⁴¹Anak Manusia haga ngayun malaikat-malaikat-Ni ngumpulko jak hantara umat-Ni sunyinni sai menyebabko jelma bebuat dusa, rik sunyinni jelma bareh sai ngelakuko kejahatan.

⁴²Tian sunyinni haga ditokko mik delom tungku apui sai menyala-nyala; di dudi tian haga miwang rik menderita.

⁴³Rik jelma-jelma sai ngelakuko kehaga Allah haga besinar injuk matarani di delom Dunia Ampai Allah, Bapa tian. Jadi, kik ngedok cuping, dengiko!”

⁴⁴“Kik Allah memerintah, keadaanni sebagai perumpamaan inji: Wat harta sai tependam di delom tanoh raduni dihalu ulih sai jelma, rik dikurukkoni mik delom tanoh. Kak raduni ulih riangni, ulun udi mik ngejual sunyinni kedauni, raduni muloh rik ngebeli tanoh udi.”

⁴⁵“Kik Allah memerintah, keadaanni sebagai perumpamaan inji: Sai jelma sai bedagang nyepok mutiara-mutiara sai berega.

⁴⁶Waktu ia ngehalu sai mutiara sai luar biasa helauni, raduni ia mik rik ngejual sunyinni kedauni, raduni ngebeli mutiara sai sinji.”

⁴⁷“Kik Allah memerintah, keadaanni diumpamako jama jala sai ditebarko mik danau, raduni mansa bemacam-macam iwa.

⁴⁸Seraduni jala udi latap, jala udi diiwakko mik darak ulih nelayan-nelayan. Kak raduni tian mejong rik misah-misahko iwa-iwa udi: Sai betik disegokko delom runcung rik sai mak mebetik ditokko.

⁴⁹Renodo halni Rani Kiamat, malaikat-malaikat haga mik misahko jelma-jelma jahat jak jelma-jelma sai ngelakuko kehaga Allah.

⁵⁰Kak raduni jelma-jelma jahat udi ditokko mik delom tungku apui. Di dudido tian haga miwang rik menderita.”

⁵¹“Api keti ngerti sunyinni ano?” tanya Isa. “Ngerti Pak!” jawab tian.

⁵²Raduni Isa cawa, “Udi sebabni unggal guru agama sai radu jadi anggota umat Allah, injuk sai tuan rumah sai ngeluahko jak rang hartani barang-barang ampai rik saka.”

⁵³Seraduni Isa nyeritako perumpamaan-perumpamaan udi, Ia ninggalko rang udi,

⁵⁴raduni muloh mik pekon-Ni. Di dudi Ia mik ngajar di lamban ibadah, rik jelma-jelma sai ngedengiko Ia di dudi, hiran nihan. Tian cawa, “Jak ipa jelma inji mansa hikmat injuk reno? Rik jak ipa Ia mansa kuasa untuk nyani keajaiban?

⁵⁵Kan Ia anak tukang kayu? Kan Maria udi emak-Ni; rik puari-puari-Ni yakdo Yakobus, Yusuf, Simon rik Yudas?

⁵⁶Rik bukankah puari-puari bebai-Ni tinggal di dija juga? Jak ipa Ia mansa sunyinni ano?”

⁵⁷ Maka tian nulak Isa. Raduni Isa cawa jama tian, “Sai nabi dihormati di dipa-dipa, kecuali di pekonni rik di lambanni tenggalan.”

⁵⁸Ulihni seno Isa mak nyani lamon keajaiban-keajaiban di dudi mani tian mak percaya.