Read Lampung Api MATIUS 14 Bible Online

MATIUS 14 - Lampung Api bible

MATIUS 14

¹Waktu seno Herodes, sai bekuasa negeri Galilea, ngedengi tentang Isa.

²Herodes cawa jama pejabat-pejabatni, “Pasti inji Yohanes Pembaptis sai radu hurik luot! Reno sebabni Ia ngedok kuasa ngelakuko keajaiban.”

³ Mani semakkung ano Herodes ngayun nangkok Yohanes rik ngikok ia rik ngurukko ia mik delom bui. Herodes bebuat injuk reno mani soal Herodias, inggom puarini tenggalan, yakdo Filipus.

⁴ Mani pernah Yohanes ngucakko injuk reji jama Herodes, “Mak ngasi niku kawin jama Herodias!”

⁵Sebenorni Herodes mirak ngebunuh Yohanes, kidang ia rabai jama jelma-jelma, mani tian nganggap Yohanes nabi.

⁶Waktu Herodes ngerayako rani ulang tahunni, anak bebai Herodias nari di hadapan kuari. Tarianni nyenangko nihan hati Herodes,

⁷sehingga Herodes bejanji jama ia jama sumpah bahwa api gaoh sai ia kilu, haga dikeniko jama ia.

⁸Mani dihasut ulih emakni, muli udi cawa, “Nyak ngilu ulu Yohanes Pembaptis dikeniko jama nyak tano inji juga di atas baki!”

⁹Ngedengi kiluan ano, Herodes jadi sedih nihan. Kidang mani ia radu besumpah di hadapan kuarini, ia merintahko in kiluan muli udi dikabulko.

¹⁰Ia ngayun jelma mik bui untuk melok ulu Yohanes.

¹¹Kak raduni ulu Yohanes udi diusung kuruk di atas baki rik dikeniko jama muli udi. Raduni muli ano ngusungni muneh jama emakni.

¹²Radu jak seno jelma-jelma sai nutuk Yohanes ratong ngakuk mayat Yohanes rik nguborkoni. Raduni tian mik rik ngeni pandai hal seno jama Isa.

¹³Waktu Isa ngedengi kabar ano, Ia cakak jukung tenggalan rik ninggalko rang udi, untuk mik di suatu rang sai mangi. Kidang waktu jelma-jelma ngedengi tentang hal udi, tian ninggalko kota-kota tian rik mik nyusul Isa ngeliu renglaya darak.

¹⁴Waktu Isa regah jak jukung rik ngeliak jelma lamon udi, Ia kesian jama tian. Raduni Ia ngunyaiko jelma-jelma sai meruyuh di hantara tian.

¹⁵Dibi ranini, jelma-jelma sai nutuk Isa ratong rik cawa jama Ia, “Rani radu dibi rik rang inji tepencil. Lebih baik Bapak ngayun jelma-jelma inji mik, in dapok ngebeli kanikan di pekon-pekon.”

¹⁶“Dang tian mik,” ani Isa, “keti gaoh ngeni tian mengan.”

¹⁷“Sekam angkah ngedok lima ruti rik rua iwa!” jawab jelma-jelma sai nutuk Isa udi.

¹⁸“Usung ano mik dija,” ani Isa.

¹⁹Kak raduni Ia ngayun ulun lamon udi mejong di atas jukuk. Raduni Ia ngakuk lima ruti rik rua iwa udi, raduni nengadah mik langit rik ngucap syukor jama Allah. Radu jak seno Ia ngebelah-belah ruti udi jama culuk-Ni rik ngeniko-Ni jama jelma-jelma sai nutuk Ia untuk dibagi-bagiko jama ulun lamon udi.

²⁰Tian sunyinni mengan sampai betong. Radu jak seno jelma-jelma sai nutuk Isa ngumpulko kelebihan kanikan ano; wat rua belas bakul latap.

²¹Sai mengan waktu seno wat kira-kira lima ribu jelma, makkung tehitung bebai rik sanak-sanak.

²²Radu jak seno Isa ngayun jelma-jelma sai nutuk Ia cakak jukung rik lebih mena nyeberang danau, sementara Ia ngayun ulun lamon udi mulang.

²³Seraduni ulun lamon udi mik, Isa cakak sai bukit tenggalan untuk bedua. Waktu radu di bingi, Isa masih wat di dudi tenggalan.

²⁴Sementara ano jukung sai ditumpangi jelma-jelma sai nutuk Isa, radu jaoh di tengah-tengah danau. Jukung udi tehampas-hampas dipukul umbak, mani angin belawanan arah jama jukung.

²⁵Hantara pukul telu rik pukul enam pagi, Isa ratong mik jama tian lapah di atas way.

²⁶Waktu jelma-jelma sai nutuk Ia ngeliak Ia lapah di atas way, tian tekejut nihan. “Hantu!” pekik tian kerabaian.

²⁷Kidang Isa langsung ngejawab, “Tenangdo! Nyak Isa. Dang rabai!”

²⁸Raduni Petrus cawa, “Kik Niku sangun Isa, kayundo nyak ratong lapah di atas way.”

²⁹“Ratongdo,” jawab Isa. Jadi Petrus regah jak jukung, lapah di atas way rik ratong jama Isa.

³⁰Kidang waktu Petrus ngeliak hara kancangni angin di danau udi, ia rabai rik mulai tebenam. “Tuhan, tulung!” pekikni.

³¹Isa geluk ngulorko culuk-Ni rik nangkok ia, rik cawa, “Petrus, Petrus, niku inji kurang percaya. Mengapi niku ragu-ragu jama Nyak?”

³²Raduni tian rua cakak mik jukung udi, rik angin pun reda.

³³Maka jelma-jelma sai nutuk Isa sujud nyumbah Ia. Tian cawa, “Temon Tuhando Anak Allah!”

³⁴Waktu tian sampai di seberang danau, tian ngedarak di Genesaret.

³⁵Rik waktu jelma-jelma di dudi ngeliak bahwa sai ratong udi Isa, tian nyiarko kabar udi mik sunyinni daerah di sekitar kota udi. Raduni sunyin jelma meruyuh diusung mik jama Isa.

³⁶Rik tian ngilu jama Ia in ngasi nilut jubah-Ni, walau angkah uncukni. Raduni sunyin sai nilutni jadi munyai.