Read Lampung Api MATIUS 15 Bible Online

MATIUS 15 - Lampung Api bible

MATIUS 15

¹Sekelompok jelma Farisi rik pira-pira guru agama jak Yerusalem ratong jama Isa. Tian betanya jama Ia,

²“Mengapi jelma-jelma sai nutuk Niku ngelanggar adat istiadat nenek muyang neram? Waktu haga mengan, tian mak ngebasuh culuk pai nutuk atoran!”

³Isa ngejawab, “Rik mengapi keti juga ngelanggar perintah Allah, angkah mani haga nutuk adat istiadat nenek muyangmu?

⁴ Mani Allah cawa, ‘Hormatido bak rik emakni,’ rik ‘Sapa sai ngupokko emak bakni, haga dihukum mati.’

⁵Kidang keti ngajarko: kik ulun cawa jama ulun tuhani, ‘Api sai seharusni kukeniko jama bak rik emak, radu kupersembahko jama Allah,’

⁶maka jelma udi mak lagi diwajibko untuk ngehormati ulun tuhani. Jadi, mani adat istiadat nenek muyangmu, keti ngeremehko cawa-Ni Allah.

⁷Keti jelma munafik! Tepat nihan api sai dinubuatko Yesaya tentang keti, yakdo,

⁸ ‘Injuk reji cawa Allah: Jelma-jelma udi angkah nyumbah Nyak jama cawa-cawa, kidang hati tian jaoh jak Nyak.

⁹Percuma tian nyumbah Nyak, mani atoran manusia tian ajarko seolah-olah ano atoran-Ku.’ ”

¹⁰Kak raduni Isa ngurau jelma-jelma rik cawa jama tian, “Dengiko in ngerti!

¹¹Sai kuruk mik banguk mak nyani jelma udi najis; angkah sai luah jak bangukni, anodo sai ngejadiko ia najis.”

¹²Raduni jelma-jelma sai nutuk Isa ratong rik cawa jama Ia, “Pandai mak Bapak bahwa jelma-jelma Farisi ano tesinggung waktu ngedengi Bapak cawa injuk reno?”

¹³Isa ngejawab, “Unggal tanoman sai mak ditanom ulih Bapa-Ku di surga haga dicabut.

¹⁴ Dang hirauko jelma-jelma Farisi udi. Tian udi jelma-jelma sai mimpin buta; rik kik jelma buta memimpin jelma buta, tian rua haga tumbak mik delom siring.”

¹⁵Petrus cawa, “Tulung jelasko perumpamaan ano jama sekam, Pak!”

¹⁶Isa ngejawab tian, “Api keti juga makkung ngerti?

¹⁷Pandai mak keti, bahwa sai kuruk mik delom banguk regah mik delom tenai, rik kak raduni luah lagi?

¹⁸ Kidang sai luah jak banguk, asalni jak hati; rik senodo sai nyani jelma udi najis.

¹⁹Mani jak hati timbul pikeran-pikeran jahat, sai nyebabko jelma ngebunuh, bezinah, bebuat hajor, maling, ngeni kesaksian palsu rik memfitnah.

²⁰Hal-hal senodo sai menyebabko jelma jadi najis, rik lain hak mengan jama culuk sai mak dibasuh.”

²¹Kak raduni Isa ninggalko rang udi mik di daerah redik kota Tirus rik Sidon.

²²Sai bebai Kanaan jak daerah udi, ratong jama Isa sambil mekik, “Anak Daud, kesian jama nyak! Anak bebaiku kekurukan ruh jahat. Keadaanni parah nihan.”

²³Isa mak ngejawab bebai udi sama sekali. Raduni jelma-jelma sai nutuk Isa ratong jama Ia rik ngilu, “Pak, kayun bebai ano mik. Ia angkah ribut-ribut gaoh di kudan neram!”

²⁴Isa ngejawab, “Nyak diutus angkah jama bangsa Israel, khususni jama tian sai sesek.”

²⁵Bebai udi ratong raduni sujud di hadapan Isa rik cawa, “Tulung pai nyak, Tuan.”

²⁶Isa ngejawab, “Mak mebetik ngakuk kanikan sanak-sanak rik nayarko jama kaci.”

²⁷“Benor, Tuan,” jawab bebai udi, “kidang kaci pun nganik tirah-tirah sai gugor jak mija tuanni.”

²⁸Raduni Isa cawa jama ia, “Ibu, temon balak imanmu! Tagando tejadi api sai niku mirak!” Waktu seno juga anak bebai ano munyai.

²⁹Isa ninggalko rang udi, raduni lapah nyusor pantai Danau Galilea. Kak raduni Ia cakak mik sai bukit raduni mejong di dudi.

³⁰Lamon ulun ratong jama Ia ngusung jelma-jelma sai pincang, sai buta, sai lumpuh, sai bisu, rik lamon lagi jelma meruyuh sai bareh. Tian ngepikko jelma-jelma udi dihadap Isa, rik Ia ngunyaiko jelma-jelma udi.

³¹Jelma lamon sai wat di dudi hiran nihan, waktu tian ngeliak jelma bisu dapok cawa, jelma pincang munyai, jelma lumpuh lapah, rik jelma buta ngeliak. Raduni tian muji-muji Allah bangsa Israel.

³²Kak raduni Isa ngurau jelma-jelma sai nutuk Ia raduni cawa, “Nyak kesian jama jelma lamon inji. Radu telu rani sakani tian jama-jama Nyak, rik tano tian mak ngedok kanikan. Nyak mak haga naganko tian mulang jama tenai bangkang, kanah tian pangsan di renglaya.”

³³Raduni jelma-jelma sai nutuk Isa betanya jama Ia, “Di dipa ram dapok mansa kanikan di daerah tepencil inji untuk jelma selamon inji?”

³⁴“Wat pira ruti jama keti?” tanya Isa jama tian. “Pitu,” jawab tian, “rik iwa lunik pira-pira biji.”

³⁵Maka Isa ngayun jelma lamon udi mejong di atas tanoh.

³⁶Raduni Ia ngakuk kepitu ruti udi rik iwani, kak raduni ngucap syukor jama Allah. Radu jak seno Ia ngebelah-belah ruti rik iwa udi jama culuk-Ni, raduni ngeniko jama jelma-jelma sai nutuk Ia. Rik tian ngebagi-bagiko jama jelma lamon udi.

³⁷Sunyinni jelma udi mengan sampai betong. Radu jak seno jelma-jelma sai nutuk Isa ngumpulko kelebihan kanikan udi. Sunyinni wat pitu bakul latap.

³⁸Jumlah jelma bakas gaoh sai mengan pada waktu seno wat epak ribu jelma, makkung tehitung bebai rik sanak-sanak.

³⁹Raduni Isa ngayun jelma lamon udi mulang. Ia tenggalan cakak sai jukung rik mik di daerah Magadan.