Read Lampung Api MATIUS 17 Bible Online

MATIUS 17 - Lampung Api bible

MATIUS 17

¹ Enam rani jak seno Isa ngusung Petrus jama Yakobus rik puarini Yohanes, ngasingko diri mik sai gunung sai langgar.

²Di hadap tian, Isa berubah bantuk: Pudak-Ni jadi terang injuk matarani rik kawai-Ni handak bekilauan.

³Raduni ketelu jelma sai nutuk Ia udi ngeliak Musa rik Elia cawa jama Isa.

⁴Raduni Petrus cawa jama Isa, “Tuhan, bangik nihan ram di dija. Kik Tuhan haga, nyak haga ngediriko telu kemah di dija: sai untuk Tuhan, sai untuk Musa, rik sai lagi untuk Elia.”

⁵ Sementara Petrus masih cawa, awan sai terang nihan meliputi tian rik jak awan udi kedengian suara sai cawa, “Injido Anak-ku sai Kukasihi. Ia nyenangko hati-Ku. Dengiko Ia!”

⁶Waktu jelma-jelma sai nutuk Isa ngedengi suara ano, tian rabai nihan, hingga tesungkor mik tanoh.

⁷Kidang Isa ratong rik nyating tian. “Minjakdo,” cawa-Ni, “dang rabai!”

⁸Waktu tian ngeliak, tian mak ngeliak sapa pun, kecuali Isa gaoh.

⁹Waktu tian regah jak gunung udi, Isa ngingokko tian, “Dang ngeni pandai jama sapa pun api sai keti liak jeno, semakkung Anak Manusia dibangkitko jak kematian.”

¹⁰ Jelma-jelma sai nutuk Isa betanya jama Ia, “Mengapi guru-guru agama cawa bahwa Elia haga ratong lebih mena?”

¹¹Isa ngejawab, “Sangun Elia ratong rik ia haga ngeberesko sunyin hal.

¹² Kidang Nyak cawa jama niku, Elia radu ratong, kidang jelma-jelma mak mengenal ia; tian memperlakuko ia kehaga tian gaoh. Rik reno muneh tian haga memperlakuko Anak Manusia.”

¹³Raduni jelma-jelma sai nutuk-Ni ngerti bahwa Isa cawa tentang Yohanes Pembaptis.

¹⁴Waktu Isa rik ketelu jelma sai nutuk Ia muloh jama ulun lamon udi, sai jelma bakas ratong, sujud di hadapan Isa,

¹⁵rik cawa, “Bapak, kesian pai jama anakku. Ia sakik ayan. Serangan ayanni hibat nihan sehingga ia risok tumbak mik delom apui rik risok juga mik delom way.

¹⁶Nyak radu ngusung ia jama jelma-jelma sai nutuk Bapak, kidang tian mak dapok ngunyaiko ia.”

¹⁷Isa ngejawab, “Bukan main keti inji! Keti temondo jelma-jelma sai nyeleweng rik mak percaya. Sampai kapan Nyak haga tinggal jama-jama keti rik besabar tehadap keti? Usung sanak udi mik dija!”

¹⁸Raduni Isa merintahko ruh jahat sai di delom sanak udi luah. Rik ruh jahat udi luah, raduni sanak udi munyai waktu saat seno juga.

¹⁹Kak raduni jelma-jelma sai nutuk Isa ratong jama Ia tenggalan rik betanya jama Ia, “Pak, api sebab sekam mak dapok nguser ruh jahat udi?”

²⁰ Isa ngejawab, “Sebab keti kurang percaya. Ingokdo! Kik keti ngedok iman sebalak biji sawi, keti dapok cawa jama bukit inji, ‘Malihdo mik disan!’ pasti bukit inji haga malih. Mak ngedok sai pun sai mak dapok keti sani! [

²¹Kidang ruh jahat sai injuk reno inji, angkah dapok diuser ulih dua rik puasa gaoh.]”

²²Waktu jelma-jelma sai nutuk Isa bekumpul di Galilea, Isa cawa jama tian, “Mak mesaka lagi, Anak Manusia haga diserahko jama kuasa manusia.

²³Ia haga dibunuh, kidang pada rani ketelu Ia haga dibangkitko.” Maka jelma-jelma sai nutuk Ia jadi sedih nihan.

²⁴ Waktu Isa rik jelma-jelma sai nutuk Ia sampai di Kapernaum, tukang-tukang tagih pajak Lamban Ibadah ratong jama Petrus rik betanya, “Gurumu ngebayar pajak Lamban Ibadah mawat?”

²⁵Petrus ngejawab, “Bayar!” Waktu Petrus mulang, Isa nagu ia lebih mena, “Simon, injuk repa pendapatmu? Sapa sai haga ngebayar bea atau pajak jama raja-raja dunia inji? Rakyat atau ulun asing?”

²⁶“Ulun asing,” jawab Petrus. “Kik injuk reno,” ani Isa, “rakyat mak perlu ngebayar.

²⁷Kidang dang neram nyinggung perasaan jelma-jelma udi. Jadi, mikdo mik danau untuk ngawil. Akukdo iwa mula-mula sai niku tangkok. Di delom bangukni udi niku haga ngehalu mata duit sai cukup untuk pajak ram rua. Akukdo duit ano rik bayardo jama tian pajak neram untuk Lamban Ibadah.”