Read Lampung Api MATIUS 18 Bible Online

MATIUS 18 - Lampung Api bible

MATIUS 18

¹ Pada waktu seno jelma-jelma sai nutuk Isa ratong jama Ia rik betanya, “Sapa sai dianggap paling langgar di hantara umat Allah?”

²Isa ngurau sai sanak lunik, rik ngepikko ia cecok di hadap tian.

³ Raduni Isa cawa, “Percayado! Angkah kik keti berubah rik jadi injuk sanak-sanak, keti haga jadi anggota umat Allah.

⁴Jelma sai ngerendahko dirini rik jadi injuk sanak inji, yakdo sai paling langgar di hantara umat Allah.

⁵Rik jelma sai nerima sanak sai injuk inji mani Nyak, retini nerima Nyak.”

⁶“Sapa nyebabko salah sai jak jelma-jelma sai lunik inji mak percaya lagi jama Nyak, lebih baik kik batu penggilingan diikokko digalahni rik ia dibenamko di laok sai relam.

⁷Hara celakani dunia inji mani hal-hal sai nyebabko jelma bedusa. Sangun hal-hal injuk reno haga selalu wat, kidang celakado jelma sai nyebabkoni!

⁸ Kik culukmu atau cukutmu nyani niku bedusa, pelokdo rik tokko. Lebih baik niku hurik jama Allah tanpa kebelah culuk atau cukut, jak niku ditokko mik delom apui neraka jama kerua culuk rik cukutmu.

⁹ Rik kik matamu nyebabko niku bebuat dusa, cungkildo rik tokko. Lebih baik niku hurik jama Allah tanpa sai mata jak niku ditokko mik delom apui neraka jama kerua mata.”

¹⁰“Awas! Dang ngehina salah sai jak jelma sai lunik inji. Mani, ingokdo, malaikat-malaikat tian selalu wat di hadapan Bapa-Ku di surga. [

¹¹ Mani Anak Manusia ratong untuk nyelamatko jelma sai sesek!]

¹²Injuk repa pendapatmu? Seandaini wat sai jelma ngedok seratus biri-biri, raduni sai jak biri-biri udi lebon, api sai haga diguaiko ulih ulun udi? Pasti ia haga ninggalko biri-biri sai siwa puluh siwa udi di bukit rik mik nyepok sai lebon udi.

¹³Rik kik ia ngehaluni luot biri-biri udi — percaya jama Nyak — ia haga lebih gembira atas biri-biri sai lebon udi jak atas siwa puluh siwa biri-biri sai mak lebon.

¹⁴Injuk reno juga Bapamu sai di surga mak haga salah sai jak ulun-ulun sai ampai percaya jama Nyak inji sesek.”

¹⁵ “Kik puarimu bedusa jama niku, mikdo jama ia rik tunjukko kesalahanni. Guaikodo udi secara hema-hema hantara keti rua gaoh. Kik ia nurut cawa-cawamu, maka behasildo niku mansa puarimu udi luot.

¹⁶ Kidang kik mawat, usung sai atau rua jelma lagi. Mani delom Alkitab tetulis, ‘Sekurang-kurangni rua atau telu saksi diperluko untuk nyatako sai jelma tetuduh besalah.’

¹⁷Kik ia mak nerima petuah-petuah jelma-jelma udi, keni pandai hal udi jama jemaah. Rik akherni, kik ia mak haga nerima petuah jemaah, anggapdo ia injuk tukang tagih pajak rik sai jelma mak mengenal Allah.”

¹⁸ “Pandai mak: Api sai keti larang di dunia, juga dilarang di surga. Rik api sai keti benorko di dunia, juga dibenorko di surga.

¹⁹Rik pandai mak juga: Kik di hantara keti di dunia inji rua jelma sepakat mengenai api gaoh rik ngeduakoni, dua udi haga dikabulko ulih Bapa-Ku di surga.

²⁰Mani di dipa rua atau telu jelma bekumpul sebab Nyak, Nyak wat di tengah-tengah tian.”

²¹ Kak raduni Petrus ratong jama Isa rik betanya, “Tuhan, kik puariku bedusa tehadapku, sampai pira kali nyak haga ngampuni ia? Sampai pitu kali kedo?”

²²Isa ngejawab, “Mawat, lain hak sampai pitu kali, kidang pitu puluh kali pitu kali!

²³Mani kik Allah memerintah, keadaanni injuk delom perumpamaan inji: Sai raja haga nyelesaiko utang-utang jelma-jelma sai ngebantuni.

²⁴Waktu ia mulai ngadako pemeriksaan, dihadapko jama ia jelma sai ngebantu sai behutang bejuta-juta,

²⁵rik mak dapok ngebayarni. Jadi, raja udi memerintahko in jelma sai ngebantu udi dijual jama-jama anak kajongni, rik sunyinni harta kedauni untuk ngebayar utangni.

²⁶Jelma sai ngebantu udi sujud dihadap raja udi, rik ngilu, ‘Tuan, sabardo tehadap jelma sai ngebantu. Jelma sai ngebantu haga ngebayar sunyinni hutang jelma sai ngebantu.’

²⁷Raja udi kesian jama ia, raduni ia ngehapusko sunyinni utangni.

²⁸Waktu jelma sai ngebantu udi luah, ia betungga jama kantikni, sai jelma sai ngebantu juga, sai wat utang jama ia pira-pira ribu. Ia nangkok kantikni udi, nyekikni, rik cawa, ‘Bayardo sunyinni utangmu!’

²⁹Raduni kantikni udi sujud dihadapni sambil ngilu, ‘Sabar pai kantik, sunyinni haga kubayar!’

³⁰Kidang jelma sai ngebantu udi nulak. Sebalikni, ia ngurukko ia mik delom bui sampai ia ngebayar utangni.

³¹Waktu jelma-jelma sai ngebantu sai bareh ngeliak api sai radu tejadi, tian sedih rik ngelaporko hal udi jama raja.

³²Maka raja udi ngurau jelma sai ngebantu sai jahat udi rik cawa jama ia, ‘Jelma sai ngebantu sai jahat! Sunyinni utangmu radu kuhapusko angkah mani niku ngilu jama nyak.

³³Reno juga niku haga kesian jama kantikmu sebagai nyak pun radu ngeni kesian jama niku?’

³⁴Raja udi butong nihan. Jelma sai ngebantu sai jahat udi dikurukkoni mik delom bui sampai ia ngebayar sunyinni utang-utangni.”

³⁵Isa ngeraduko cerita-Ni jama cawa-cawa inji, “Reno muneh Bapa-Ku di surga haga memperlakuko keti masing-masing, kik keti mak ikhlas ngampuni puarimu.”