Read Lampung Api MATIUS 20 Bible Online

MATIUS 20 - Lampung Api bible

MATIUS 20

¹“Kik Allah memerintah, keadaanni injuk perumpamaan inji: Sai jelma sekedau kebun anggor luah waktu pagi nyepok jelma untuk beguai di kebun anggorni.

²Radu jak seno ia setuju ngebayar tian sai duit perak serani, ia ngayun tian beguai di kebun anggorni.

³Pukul siwa pagi, sekedau kebun udi mik luot, rik ngeliak pira-pira jelma lagi mak ngedok guai di pasar.

⁴Maka cawado ia jama tian, ‘Mikdo keti beguai di kebun anggorku. Nyak haga ngebayar keti jama upah sai layak.’

⁵Tian pun mik. Pukul rua belas tengah rani rik pukul telu dibi, sekedau kebun udi luah lagi rik bebuat hal sai gegoh.

⁶Rik kira-kira pukul lima dibi, ia luah lagi rik ngeliak masih wat jelma sai mak beguai. Raduni ia betanya jama tian, ‘Mengapi keti cecok terus seranian di dija rik mak beguai api-api?’

⁷Jelma-jelma udi ngejawab, ‘Mak ngedok jelma sai haga ngeni guai jama sekam.’ ‘Kik injuk reno,’ ani sekedau kebun udi, ‘mikdo keti beguai di kebun anggorku.’

⁸ Dibi rani, sekedau kebun anggor udi cawa jama mandorni, ‘Uraudo buruh-buruh udi rik bayardo upah tian masing-masing, mulai jak jelma sai kuruk terakher sampai jama sai kuruk mula-mula.’

⁹Raduni ratongdo buruh-buruh sai mulai beguai jak pukul lima dibi. Tian masing-masing nerima sai duit perak.

¹⁰Raduni ratong muneh buruh-buruh sai di siwa radu jak pagi. Tian bepiker tian haga nerima lebih. Padahal tian angkah dikeni sai duit perak juga.

¹¹Waktu nerima duit udi, tian ngomel jama sekedau kebun:

¹²‘Buruh-buruh sai ratong terakher udi angkah beguai sejam. Sedang sekam beguai seranian di debah panas terik matarani, kidang Tuan ngebayar tian gegoh jama sekam!’

¹³Sekedau kebun udi ngejawab jama salah sai jak tian, ‘Kantik, nyak mak besalah jama niku. Kan niku setuju nerima upah sai duit perak untuk beguai serani?

¹⁴Nah, akukdo upahmu, rik mikdo. Nyak sangun mirak ngeni jama sai kuruk terakher udi upah sai gegoh jama sai kukeniko jama niku.

¹⁵Api kedo nyak mak ngasi bebuat sekehagaku jama kedauku? Atau niku sesera, mani nyak murah hati?’ ”

¹⁶ Raduni Isa cawa luot, “Injuk reno muneh jelma-jelma sai terakher haga jadi sai mula-mula, rik jelma-jelma sai mula-mula haga jadi sai terakher.”

¹⁷Waktu Isa mik nuju Yerusalem, di tengah renglaya Ia ngurau kerua belas jelma sai nutuk Ia bekumpul. Raduni Ia cawa jama tian,

¹⁸“Dengiko! Ram tano nuju Yerusalem. Di dudi Anak Manusia haga diserahko jama imam-imam kepala rik guru-guru agama. Raduni Ia haga dihukum mati,

¹⁹kak raduni diserahko jama jelma-jelma sai lain Yahudi. Tian haga ngehina Ia, nyiksa Ia, rik nyalibko Ia. Kidang pada rani ketelu, Ia haga dibangkitko luot.”

²⁰Kak raduni inggom Zebedeus ratong jama anak-anakni mik jama Isa. Dihadap Isa ia sujud ngilu sai hal.

²¹“Ibu haga api?” tanya Isa. Ibu ano ngejawab, “Nyak mirak kerua anakku inji mejong di kiri rik kanan Bapak kik Bapak jadi Raja kanah.”

²²“Keti mak pandai api sai keti kilu,” ani Isa jama tian. “Sanggup kedo keti nginum jak piala penderitaan sai haga Kuinum?” “Sanggup,” jawab tian.

²³Isa cawa, “Sangun keti haga nginum juga jak piala-Ku. Kidang mengenai sapa sai haga mejong di kiri rik kanan-Ku, ano lain Nyak sai berhak nantuko. Rang-rang seno untuk jelma-jelma sai radu ditantuko ulih Bapa-Ku.”

²⁴Waktu kepuluh jelma sai nutuk sai bareh ngedengi hal ano, tian butong jama kerua jelma muari ano.

²⁵ Ulihni seno Isa ngurau tian sunyinni raduni cawa, “Keti pandai bahwa jelma-jelma sai mimpin bangsa sai mak mengenal Allah nindas rakyatni. Rik jelma-jelma sai mimpin tian nindas tian.

²⁶ Kidang keti mak ngasi injuk reno. Sebalikni, jelma sai haga jadi langgar di hantara keti, haga jadi jelma sai ngelayani niku.

²⁷Rik jelma sai haga jadi sai mula-mula di hantara keti, haga jadi jelma sai ngebantumu.

²⁸Gegoh injuk Anak Manusia udi juga: Ia ratong lain hak untuk dilayani, kidang untuk ngelayani, rik nyerahko nyawa-Ni untuk ngebebasko lamon jelma.”

²⁹Waktu tian ninggalko Yerikho, lamon jelma nutuk Isa.

³⁰Rua jelma buta lagi mejong di pingger renglaya. Waktu tian ngedengi bahwa Isa liu, tian mekik, “Anak Daud, kesiando jama sekam!”

³¹Jelma lamon sai wat di dudi ngebutongi tian rik ngayun tian ngehema. Kidang tian mekik lebih nyaring lagi, “Tuan, Anak Daud, kesiando jama sekam!”

³²Raduni Isa taru rik ngurau tian. “Api sai keti mirak Nyak bebuat bagimu?” tanya Isa.

³³Tian ngejawab, “Tuan, sekam mirak ngeliak!”

³⁴Isa kesian jama tian, raduni ngejamah mata tian. Waktu seno juga tian dapok ngeliak. Raduni tian nutuk Isa.