Read Lampung Api MATIUS 21 Bible Online

MATIUS 21 - Lampung Api bible

MATIUS 21

¹Waktu radu redik Yerusalem, tian sampai di Betfage di Bukit Zaitun. Di dudi Isa ngayun rua jelma sai nutuk Ia lapah lebih mena.

²“Mikdo mik pekon sai dihadap udi,” luhot Isa jama tian. “Keti haga ngeliak sai keledai teikok jama anakni. Lepasko rua-ruani rik usung mik dija.

³Kik wat jelma sai nanyako sai hal, ucakko jama jelma seno, ‘Tuhan memerlukoni’, maka jelma udi geluk-geluk naganko keledai udi diusung.”

⁴Hal injuk reno in tejadido api sai dicawako ulih nabi injuk berikut,

⁵ “Ucakkodo jama Sion, Rajamu sedang ratong jama niku. Ia rendah hati rik nunggang keledai, sai anak keledai sai ngura.”

⁶Raduni kerua jelma sai nutuk Ia udi mik rik ngelakuko sebagai sai diluhotko Isa jama tian.

⁷Tian ngusung keledai ano jama anakni. Raduni tian ngalasi tundun keledai-keledai udi jama jubah tian. Raduni Isa cakak.

⁸Lamon jelma di disan ngebentangko jubah-jubah tian di renglaya, sedang jelma-jelma bareh melok ranting-ranting batang rik nyebarkoni di tengah renglaya.

⁹ Ulun lamon sai lapah di hadap rik di kudan Isa beseru-seru, “Hurikdo Anak Daud! Diberkatido Ia sai ratong atas gelar Tuhan! Pujido Allah Sai Mahatinggi!”

¹⁰Raduni, waktu Isa kuruk mik Yerusalem, sunyinni kota ano jadi gempar. “Inji sapa?” tanya jelma-jelma di kota ano.

¹¹“Ia Nabi Isa, jak Nazaret di Galilea,” jawab ulun lamon sai ngiring Isa.

¹²Kak raduni Isa kuruk mik Lamban Ibadah, rik nguser sunyinni jelma sai bejual beli di dudi. Ia ngejungker balikko mija-mija penukor duit, rik bangku-bangku penjual burung merpati.

¹³ Raduni Ia cawa jama jelma-jelma udi, “Di delom Alkitab tetulis bahwa Allah cawa, ‘Lamban-Ku haga disebut lamban rang bedua.’ Kidang keti ngejadikoni sarang penyamun!”

¹⁴Ulun-ulun buta rik lumpuh ratong jama Isa di Lamban Ibadah, rik Ia ngunyaiko tian.

¹⁵Kidang imam-imam kepala rik guru-guru agama butong ngeliak keajaiban-keajaiban sai dilakuko ulih Isa. Rik tian butong juga ngedengi sanak-sanak besurak-surak di Lamban Ibadah, “Hurikdo Anak Daud!”

¹⁶ Tian cawa jama Isa, “Niku dengi api sai tian cawako?” “Ya, Kudengi,” jawab Isa. “Makkung pernah kedo keti ngebaca ayat Alkitab inji: ‘Sanak-sanak rik upi radu Niku ajar untuk ngucapko pujian sai sempurna’?”

¹⁷Kak raduni Isa ninggalko tian, raduni luah jak kota ano mik Betania rik minok di disan.

¹⁸Pagi-pagi jemoh ranini, delom lapahni muloh mik kota, Isa mebetoh.

¹⁹Ia ngeliak sai batang ara di pingger renglaya. Ia mik batang udi, kidang mak ngehalu sai uah pun kecuali bulung-bulung gaoh. Raduni Isa cawa jama batang udi, “Niku mak dapok bebuah lagi!” Langsung batang ara udi layu.

²⁰Pada waktu jelma-jelma sai nutuk Isa ngeliak kejadian udi, tian hiran nihan. “Repa bang batang ara ano dapok langsung mati sunyinni?” tanya tian.

²¹ “Temon,” jawab Isa, “kik keti percaya rik mak ragu-ragu, keti dapok ngelakuko api sai radu Kulakuko tehadap batang ara udi. Rik lain hak seno gaoh, malah keti haga dapok cawa jama bukit inji, ‘Teiwakdo rik tetokdo mik delom laok’; maka hal seno haga tejadi.

²²Api gaoh sai keti kilu delom duamu, keti haga nerimani, asal keti percaya.”

²³Kak raduni Isa muloh mik Lamban Ibadah, raduni kuruk rik ngajar di dudi. Waktu Ia sedang ngajar, imam-imam kepala rik jelma-jelma sai mimpin Yahudi ratong jama Ia rik betanya, “Atas dasar api Niku ngelakuko sunyinni ano? Sapa sai ngeni hak ano jama Niku?”

²⁴Isa ngejawab, “Nyak juga haga betanya jama keti. Rik kik keti ngejawabni, Nyak haga ngucakko jama niku jama hak sapa Nyak ngelakuko hal-hal inji.

²⁵Yohanes ngebaptis jama hak sapa? Allah atau manusia?” Raduni imam-imam kepala rik jelma-jelma sai mimpin Yahudi ano mulai berunding di hantara tian, “Kik neram ucakko, ‘Jama hak Allah,’ Ia haga cawa, ‘Kik injuk reno mengapi keti mak percaya jama ia?’

²⁶Kidang kik ram ucakko, ‘Jama hak manusia,’ ram rabai jama ulun lamon, mani tian sunyinni nganggap Yohanes nabi.”

²⁷Jadi tian ngejawab, “Sekam mak pandai.” Raduni Isa cawa jama tian, “Kik injuk reno Nyak pun mak haga ngucakko jama niku jama hak sapa Nyak ngelakuko sunyinni inji.”

²⁸“Tano repa pendapatmu tentang hal inji?” ani Isa selanjutni. “Wat sai bak sai ngedok rua anak bakas. Jelma udi mik jama anakni sai tuha rik cawa, ‘Nak, mikdo beguai di kebun anggor rani inji.’

²⁹‘Nyak mak haga,’ jawab sanak udi. Kidang kak raduni ia berubah pikeran rik mik di kebun anggor udi.

³⁰Kak raduni bak udi mik jama anakni sai kerua, rik ngucakko hal sai gegoh. ‘Ya, Bak,’ jawab anak sai kerua seno. Kidang ia mak mik.

³¹Nah, jak hantara kerua sanak ano, sapa sai ngelakuko kehaga bakni?” “Sai tuha,” jawab imam-imam kepala rik jelma-jelma sai mimpin Yahudi ano. Maka Isa cawa jama tian, “Percayado: Tukang-tukang tagih pajak rik bebai-bebai lacor haga lebih mena jadi anggota umat Allah jak keti.

³² Mani Yohanes Pembaptis ratong, rik nunjukko jama keti cara hurik sai dikehagako Tuhan, kidang keti mak haga percaya jama ajaranni; kidang tukang-tukang tagih pajak rik bebai-bebai lacor percaya jama ia. Kidang meskipun keti radu ngeliak sunyinni udi, keti mak juga ngubah pikeranmu rik mak percaya jama Tuhan.”

³³ “Dengiko perumpamaan sai inji lagi,” ani Isa. “Sai tuan tanoh nanomi sebidang kebun anggor. Ia masang kuta di sekelilingni, rik ngegali lubang untuk alat pemeras anggor, raduni nyani menara jaga. Radu jak seno ia nyiwako kebun anggor udi jama penggarap-penggarap, raduni berangkat mik negeri bareh.

³⁴Waktu radu sampai musim ngunduh uah anggor, tuan tanoh ano ngirim jelma-jelma sai ngelayani ia jama penggarap-penggarap kebun udi untuk nerima bagianni.

³⁵Kidang penggarap-penggarap kebun udi nangkok jelma-jelma sai ngelayani tuan tanoh udi: Sai jelma dipukul, sai bareh dibunuh, rik sai bareh lagi ditayar batu.

³⁶Tuan tanoh udi ngirim luot jelma-jelma sai ngelayani bareh, lebih lamon jak sai mula-mula. Kidang tian diperlakuko jama cara sai gegoh.

³⁷Akherni tuan tanoh udi ngirim jama tian anakni tenggalan. ‘Pasti anakku haga dihormati,’ pikerni.

³⁸Kidang waktu penggarap-penggarap kebun udi ngeliak anak tuan tanoh udi, tian cawa peperda tian, ‘Nah, inji ia, ahli warisni. Ija ram bunuh ia, in ram dapok warisanni!’

³⁹Maka sanak udi ditangkok, ditokko mik luah, raduni dibunuh.”

⁴⁰Isa betanya, “Nah, kik sekedau kebun anggor udi muloh, ia haga bebuat api tehadap penggarap-penggarap udi?”

⁴¹Tian ngejawab, “Pasti ia haga ngebunuh jelma-jelma jahat udi, raduni nyiwako kebun anggor udi jama ulun bareh sai haga ngeni bagian hasil tanoh udi jama ia pada waktuni.”

⁴² Maka Isa cawa jama tian, “Makkung pernah kedo keti ngebaca sai tetulis delom Alkitab? ‘Batu sai mak tepakai ulih tukang bangunan radu jadi batu sai terutama. Injido perbuatan Tuhan; hara helauni!’ ”

⁴³“Jadi ingokdo,” ani Isa, “sunyinni hak sebagai umat Allah haga dicabut jak niku rik dikeniko jama sai bangsa sai haga ngejalanko perintah-perintah Allah. [

⁴⁴Jelma sai tumbak di batu udi, haga hancor; rik jelma sai ditimpa batu udi, haga tegilas jadi harbuk.]”

⁴⁵Pada waktu imam-imam kepala rik jelma-jelma Farisi ngedengi perumpamaan-perumpamaan Isa ano, tian pandai bahwa Isa cawa tentang tian.

⁴⁶Jadi tian berusaha nangkok Ia. Kidang tian rabai jama ulun lamon, mani ulun lamon udi nganggap Isa nabi.