Read Lampung Api MATIUS 22 Bible Online

MATIUS 22 - Lampung Api bible

MATIUS 22

¹Isa cawa luot jama ulun lamon jama memakai perumpamaan,

²cawa-Ni, “Kik Allah memerintah, keadaanni injuk perumpamaan inji: Sai raja nyani pesta kawin untuk anak bakasni.

³Raja udi ngayun jelma-jelma sai ngelayani ia mik nyunsung ulun-ulun sai diundang mik pesta udi. Kidang para undangan udi mak haga ratong.

⁴Kak raduni raja udi ngutus lagi jelma-jelma sai ngelayani ia sai bareh. Cawani jama tian: ‘Keni pandai jama para undangan ano: Hidangan pesta radu siap. Jawi, rik anak-anak jawiku sai paling betik radu ditikol. Sunyinni radu siap. Silako ratong mik pesta kawin!’

⁵Kidang kuari-kuari sai diundang udi mak ngehiraukoni. Tian mik diguaini masing-masing — wat sai mik kebunni, sai barehni mik rang usahani;

⁶rik sai barehni muneh nangkok jelma-jelma sai ngelayani raja udi, raduni mukul rik ngebunuh tian.

⁷Waktu raja udi ngedengi hal seno, ia butong nihan. Ia ngirim tenterani untuk ngebunuh jelma-jelma sai ngebunuh udi, rik nyuah kota tian.

⁸Radu jak seno ia ngurau jelma-jelma sai ngelayani ia, raduni cawa, ‘Pesta kawin radu siap, kidang para undangan mak layak.

⁹Mikdo tano mik renglaya-renglaya rik undangdo lamon-lamon jelma mik pesta kawin inji.’

¹⁰Maka jelma-jelma sai ngelayani udi pun mikdo. Tian mik renglaya-renglaya raduni ngumpulko sunyinni jelma sai tian halu di disan, sai betik maupun sai jahat. Maka latapdo ruangan pesta kawin udi jama kuari-kuari.

¹¹Raduni raja udi kuruk untuk ngeliak-liak kuari. Ia ngeliak wat sai jelma di pesta udi sai mak makai kawai pesta.

¹²Raduni ia betanya jama jelma-jelma udi, ‘Kantik, injuk repa niku dapok kuruk mik dija tanpa makai kawai pesta?’ Jelma udi mak dapok ngucakko api-api.

¹³ Raduni raja udi cawa jama jelma-jelma sai ngelayani ia, ‘Ikok cukut rik culuk ulun inji, rik tokko ia mik luah mik rang sai kelam. Di dudi haga wat hiwang rik derita.’ ”

¹⁴Raduni Isa mengakheri perumpamaan ano injuk reji, “Lamon sai diurau, kidang cutik gaoh sai tepilih.”

¹⁵Kak raduni jelma Farisi mik berunding jejama mengenai injuk repa tian dapok ngejebak Isa jama pertanyaan-pertanyaan.

¹⁶Maka tian ngutus jelma-jelma sai nutuk tian jama Isa jama pira-pira anggota golongan Herodes. Jelma-jelma udi cawa jama Isa, “Pak Guru, sekam pandai Bapak jujor. Bapak ngajar terus terang mengenai kehaga-Ni Allah untuk manusia, tanpa ngehirauko pendapat sapa pun. Mani Bapak mak pandang jelma.

¹⁷Ulihni seno, cuba Bapa ucakko jama sekam: Nutuk atoran agama neram, ngasi mak ngebayar pajak jama Kaisar atau mawat?”

¹⁸Isa pandai maksud tian sai jahat udi, jadi Ia cawa, “Hai, jelma-jelma munafik! Mengapi keti haga ngejebak Nyak?

¹⁹Cuba tunjukko jama Nyak mata duit sai keti pakai untuk ngebayar pajak!” Raduni tian ngeniko jama Ia sekeping mata duit perak.

²⁰Isa betanya jama tian, “Gambar rik gelar sapa inji?”

²¹“Kaisar,” jawab tian. Maka Isa cawa jama tian, “Kik injuk reno, keniko jama Kaisar api sai kedauni Kaisar, rik jama Allah api sai kedau-Ni Allah.”

²²Waktu tian ngedengi penjelasan ano, tian jadi hiran. Maka tian mik ninggalko Isa.

²³ Pada rani seno juga, pira-pira ulun Saduki ratong jama Isa. Tian anodo golongan sai bependapat jelma mati mak dapok bangkit luot.

²⁴ “Bapak Guru,” ani tian, “Musa ngajarko injuk reji: Kik sai jelma bakas mati, rik ia mak ngedok anak, puarini haga kawin jama randani in ngeni keturunan jama jelma sai radu mati ano.

²⁵Pernah wat pitu jelma muari sai tinggal di dija. Sai tuha kawin raduni mati tanpa ngedok anak. Maka randani ditinggalko untuk puarini.

²⁶Puarini ano kak raduni mati juga tanpa ngedok anak. Hal sai gegoh tejadi muneh jama puarini sai ketelu rik seterusni sampai kepitu.

²⁷Akherni bebai ano tenggalan mati juga.

²⁸Nah, pada waktu jelma mati dibangkitko luot, inggomni sapa bebai ano? Mani kepitu-pituni radu kawin jama ia.”

²⁹Isa ngejawab, “Keti keliru nihan, mani keti mak ngerti Alkitab, maupun kuasa-Ni Allah.

³⁰Mani kik jelma mati kanah bangkit luot, tian mak haga kawin lagi, kidang tian haga hurik injuk malaikat di surga.

³¹Makkung pernah kedo keti ngebaca api sai diucakko Allah tentang ulun mati dibangkitko luot? Allah cawa,

³² ‘Nyakdo Allah Abraham, Allah Ishak rik Allah Yakub.’ Allah ano lain hak Allah ulun mati. Ia Allah ulun hurik!”

³³Waktu ulun lamon udi ngedengi penjelasan Isa, tian kagum nihan jama ajaran-Ni.

³⁴Pada waktu ulun-ulun Farisi ngedengi bahwa Isa radu nyani ulun-ulun Saduki mak dapok cawa api-api lagi, tian bekumpul.

³⁵ Sai jak tian, yakdo sai guru agama, nyuba ngejebak Isa jama suatu pertanyaan.

³⁶“Bapak Guru,” cawani, “perintah sai sepa sai paling utama di delom hukum agama?”

³⁷ Isa ngejawab, “Cintaido Tuhan Allahmu sepenuh hatimu, segenap jiwamu, rik seluruh akalmu.

³⁸Senodo perintah sai terutama rik terpenting!

³⁹ Perintah kerua, gegoh jama sai mula-mula ano: Cintaido peperdamu sebagai niku mencintai dirimu tenggalan.

⁴⁰Seluruh hukum agama sai dikeniko ulih Musa rik ajaran para nabi bedasar jama kerua perintah udi.”

⁴¹Sementara ulun-ulun Farisi masih bekumpul di dudi, Isa betanya jama tian,

⁴²“Api pendapat keti tentang Raja Penyelamat? Keturunan sapa Ia?” “Keturunan Daud,” jawab tian.

⁴³“Kik injuk reno,” tanya Isa, “api mani Ruh Allah ngeilhami Daud untuk nyebut Raja Penyelamat ‘Tuhan’? Mani Daud cawa,

⁴⁴ ‘Tuhan cawa jama Tuhanku: mejongdo di kebelah kanan-Ku, sampai Nyak nyani musuh-musuh-Mu takluk jama Niku.’

⁴⁵Jadi kik Daud nyebut Raja Penyelamat udi ‘Tuhan’, repa mungkin Ia keturunan Daud?”

⁴⁶Mak sai jelma pun dapok ngejawab Isa. Rik semenjak rani seno, mak ngedok sai bani nanyako api-api lagi jama Ia.