Read Lampung Api MATIUS 25 Bible Online

MATIUS 25 - Lampung Api bible

MATIUS 25

¹ “Kik Anak Manusia ratong sebagai Tuhan, keadaanni injuk delom perumpamaan inji: Puluh muli pengiring pengantin masing-masing ngakuk lampu, raduni nyambut kemantin.

²Lima jelma jak tian bugu, rik lima sai barehni bijaksana.

³Kelima muli sai bugu ngusung lampu, kidang mak ngusung minyak persediaan.

⁴Kelima muli sai bijaksana ngusung lampu jama minyak persediaan.

⁵Kemantin ano ratong telat, jadi muli-muli ano mulai tegedugok raduni pedom.

⁶Tengah bingi, ampai kedengian suara mekik, ‘Kemantin ratong! Ija sambut ia!’

⁷Puluh muli udi minjak, rik masang lampu tian.

⁸Muli-muli sai bugu udi cawa jama sai bijaksana, ‘Kenikodo minyakmu cutik jama sekam, mani lampu sekam radu haga padam.’

⁹‘Mak dapok!’ jawab sanak-sanak muli bijaksana udi, ‘mani kanah ram sunyinni mak ngedok cukup minyak. Mikdo ngebeli di toko.’

¹⁰Maka muli-muli sai bugu udi mik ngebeli minyak. Sementara tian mik, sampaido kemantin. Kelima muli sai radu siap ano kuruk jama-jama kemantin mik rang pesta, rik rangok pun disalok!

¹¹ Raduni muli-muli sai bareh udi sampai. Tian beseru, ‘Tuan, Tuan, bukakko rangok untuk sekam.’

¹²Kidang kemantin udi ngejawab, ‘Nyak mak kenal keti!’ ”

¹³Raduni Isa mengakheri perumpamaan-Ni ano injuk reji, “Ulihni seno bejaga-jagado, mani keti mak pandai ranini ataupun jamni.”

¹⁴ “Kik Anak Manusia ratong sebagai Tuhan keadaanni juga injuk delom perumpamaan inji. Sai jelma bakas haga berangkat mik rang sai jaoh. Ia ngurau jelma-jelma sai ngelayani ia, raduni mempercayako hartani jama tian.

¹⁵Jama unggal jelma sai ngelayani udi ia ngeni menurut kesanggupan masing-masing. Jama sai jelma ia ngeni lima ribu duit emas. Jama sai barehni ia ngeni rua ribu duit emas. Rik jama sai jelma lagi ia ngeni seribu duit emas. Raduni ia berangkat.

¹⁶Jelma sai ngelayani sai nerima lima ribu duit emas udi geluk mik bedagang, raduni mansa untung lima ribu duit emas luot.

¹⁷Injuk reno muneh jelma sai ngelayani sai nerima rua ribu duit emas ano mansa untung rua ribu luot.

¹⁸Kidang jelma sai ngelayani sai nerima seribu duit emas ano mik ngegali lubang di tanoh, raduni nyegokko duit tuanni ano di dudi.

¹⁹Saka nihan radu jak seno, tuan jak jelma-jelma sai ngelayani udi mulang, rik mulai nyani perhitungan jama tian.

²⁰Jelma sai ngelayani sai nerima lima ribu duit emas udi ratong, rik nyerahko puluh ribu. ‘Tuan,’ cawani, ‘Tuan nyerahko lima ribu duit emas jama nyak. Liakdo, nyak behasil mansa untung lima ribu luot.’

²¹‘Bagus,’ ani tuan udi, ‘niku jelma sai ngelayani sai betik rik setia. Mani niku dapok dipercaya jama sai cutik, nyak haga mempercayako sai lamon jama niku. Kurukdo rik tutukdo besenang-senang jama nyak!’

²²Raduni jelma sai ngelayani sai nerima rua ribu duit emas udi ratong, rik cawa, ‘Tuan, Tuan radu nyerahko rua ribu duit emas jama nyak. Liakdo, nyak behasil mansa untung rua ribu luot.’

²³‘Bagus,’ ani tuan ano, ‘niku jelma sai ngelayani sai betik rik setia. Mani niku dapok dipercaya jama sai cutik, nyak haga mempercayako sai lamon jama niku. Kurukdo rik tutukdo besenang-senang jama nyak!’

²⁴Kak raduni jelma sai ngelayani sai nerima seribu duit emas udi ratong rik cawa, ‘Tuan, nyak pandai Tuan jelma sai keras. Tuan ngakuk uah di rang Tuan mak nanom, rik ngakuk hasil di rang Tuan mak nabor benih.

²⁵Nyak rabai, jadi nyak mik nyegokko duit Tuan di delom tanoh. Ajodo duit Tuan.’

²⁶‘Niku jelma sai ngelayani sai jahat rik malas!’ ani tuan udi. ‘Kan niku radu pandai bahwa nyak ngakuk uah di rang nyak mak nanomi, rik ngakuk hasil di rang nyak mak nabor benih?

²⁷Kik injuk reno, seharusni niku nyegokko duitku ano di bank, in waktu nyak mulang, nyak dapok nerima luot duitku ano jama bungani.

²⁸Ulihni seno, akukdo duit ano jak ia, rik keniko jama jelma sai ngedok puluh ribu duit emas ano.

²⁹ Mani jelma sai radu ngedok, haga dikeni lebih lamon luot rik ia haga bekelebihan. Kidang jelma sai mak ngedok, cutik sai masih wat jama ia haga diakuk juga.

³⁰ Rik jelma sai ngelayani sai mak beguna ano, tokko delom kekelaman di luah. Di disan ia haga miwang rik menderita!’ ”

³¹ “Kik Anak Manusia ratong sebagai Raja diiring sunyinni malaikat-Ni, Ia haga mejong di atas takhta-Ni sai mulia.

³²Sunyinni bangsa haga dikumpulko dihadap-Ni. Raduni Ia haga misahko tian jak rua kumpulan sebagai gembala misahko biri-biri rik kambing.

³³Jelma-jelma sai ngelakuko kehaga-Ni Allah haga dikumpulko di kebelah kanan-Ni, rik sai bareh di kebelah kiri-Ni.

³⁴Raduni Raja udi haga cawa jama jelma-jelma di kebelah kanan-Ni, ‘Ijado keti sai diberkati Bapa-Ku. Kurukdo mik delom Kerajaan sai disediako bagimu sejak permulaan dunia.

³⁵Mani waktu Nyak mebetoh, keti ngeni Nyak mengan, rik pada waktu Nyak mahu, keti ngeni Nyak nginum. Nyak jelma asing, keti nerima Nyak di lambanmu.

³⁶Nyak mak bekawai, keti ngeniko Nyak kawai. Nyak meruyuh, keti ngerawat Nyak. Nyak kuruk bui, keti nulung Nyak.’

³⁷Raduni ulun-ulun udi haga cawa, ‘Tuhan, kapan sekam pernah ngeliak Tuhan mebetoh raduni sekam ngeni Tuhan mengan, atau mahu raduni sekam ngeni Tuhan nginum?

³⁸Kapan sekam pernah ngeliak Tuhan sebagai jelma asing, raduni sekam nyambut Tuhan mik delom lamban sekam? Kapan Tuhan pernah mak bekawai, raduni sekam ngeni Tuhan kawai?

³⁹Kapan sekam pernah ngeliak Tuhan meruyuh atau kuruk bui, raduni sekam nulung Tuhan?’

⁴⁰Raja udi ngejawab, ‘Pandai mak: waktu keti ngelakuko hal seno, sekalipun jama salah sai jak puari-puari-Ku sai paling hina, retini keti ngelakukoni jama Nyak!’

⁴¹Raduni Raja ano haga cawa jama ulun-ulun di kebelah kiri-Ni, ‘Kisit jak ija, jahanam! Kurukdo mik delom apui sai mak dapok padam, sai radu disediako bagi iblis rik malaikat-malaikatni!

⁴²Mani waktu Nyak mebetoh, keti mak ngeni Nyak mengan; pada waktu Nyak mahu, keti mak ngeni Nyak nginum.

⁴³Nyak jelma asing, keti mak nerima Nyak di delom lambanmu. Nyak mak bekawai, keti mak ngeni Nyak kawai. Nyak meruyuh rik dikurukko mik bui, keti mak ngerawat Nyak.’

⁴⁴Raduni tian haga cawa jama Ia, ‘Tuhan, kapan sekam ngeliak Tuhan mebetoh, atau mahu, atau injuk jelma asing, atau mak bekawai, atau meruyuh, atau dikurukko mik bui, rik sekam mak nulung Tuhan?’

⁴⁵Raja udi haga ngejawab, ‘Pandai mak: waktu keti mak haga nulung salah sai jelma sai paling hina inji, retini keti mak haga nulung Nyak.’

⁴⁶ Maka ulun-ulun udi haga dihukum jama hukuman sai kekal, sedangko ulun-ulun sai ngelakuko kehaga-Ni Allah haga ngalami hurik sejati rik kekal.”