Read Lampung Api MATIUS 27 Bible Online

MATIUS 27 - Lampung Api bible

MATIUS 27

¹Pagi-pagi nihan, sunyinni imam kepala rik jelma-jelma sai mimpin Yahudi nyani keputusan untuk ngebunuh Isa.

²Tian ngebelenggu Ia, rik ngusung Ia, radu nyerahko Ia jama Pilatus, gubernur pemerintahan Roma.

³ Waktu Yudas si pengkhianat udi ngeliak bahwa Isa radu dijatuhko hukuman, ia nyesol. Raduni ia ngulohko ketelu puluh duit perak udi jama imam-imam kepala rik jelma-jelma sai mimpin Yahudi.

⁴Ia cawa, “Nyak radu bedusa ngekhianati jelma sai mak besalah, sampai Ia dihukum mati!” Kidang tian ngejawab, “Peduli api sekam? Udi urusanmu!”

⁵Yudas nayarko duit udi mik delom Lamban Ibadah, raduni mik rik ngegantung diri.

⁶Imam-imam kepala nguyut duit udi rik cawa, “Duit inji duit rah. Menurut hukum agama, duit inji mak ngasi dikurukko mik delom rang persembahan di Lamban Ibadah.”

⁷Seraduni tian sepakat, tian makai duit ano untuk ngebeli tanoh sai disebut Tanoh Tukang Periuk. Tanoh udi dipakai untuk kuboran ulun-ulun asing.

⁸Renodo sebabni sampai rani inji tanoh udi dikeni gelar “Tanoh Rah”.

⁹ Ulihni seno, tejadido api sai diucakko ulih Nabi Yeremia, yakdo, “Tian nerima telu puluh duit perak, rega sai disetujui ulih bangsa Israel sebagai bayaran untuk Ia.

¹⁰Rik duit udi tian pakai untuk ngebeli Tanoh Tukang Periuk, sebagai sai diperintahko Tuhan jamaku.”

¹¹Waktu Isa ngehadap Pilatus, gubernur negeri ano, Pilatus betanya, “Api Niku raja ulun Yahudi?” “Injuk renodo cawamu,” jawab Isa.

¹²Kidang waktu imam-imam kepala rik jelma-jelma sai mimpin Yahudi ngemukako lamon tuduhan tehadap Isa, Ia mak ngejawab sama sekali.

¹³Ulihni seno Pilatus cawa jama Ia, “Api Niku mak ngedengi sunyinni sai tian tuduhko jama Niku ano?”

¹⁴Kidang Isa mak ngejawab cutikpun sehingga gubernur udi hiran nihan.

¹⁵Di unggal Perayaan Paskah, gubernur biasani ngelepasko sai jelma tahanan nurut pilihan ulun lamon.

¹⁶Pada waktu ano wat sai jelma hukuman sai tekenal. Gelarni Isa Barabas.

¹⁷Jadi, waktu ulun lamon radu bekumpul, Pilatus betanya jama tian, “Sapa sai keti haga nyak lepasko untuk keti? Isa Barabas atau Isa sai disebut Almasih?”

¹⁸Pilatus cawa injuk reno mani ia pandai, bahwa jelma-jelma sai nguasai Yahudi nyerahko Isa jama ia mani tian sesera.

¹⁹Pada waktu Pilatus sedang mejong di balai pengadilan, inggomni ngirim luhot inji jama ia, “Dang niku turut campor perkara jelma sai mak besalah udi, mani ulihni Ia, nyak behanipi sai ngeri rani inji.”

²⁰Kidang imam-imam kepala rik jelma-jelma sai mimpin Yahudi terus gaoh ngehasut ulun lamon udi untuk ngilu jama Pilatus in Barabas dibebasko rik Isa dihukum mati.

²¹Raduni gubernur udi betanya luot jama tian, “Jak kerua jelma udi, sapa sai keti haga kubebasko untuk keti?” “Barabas,” jawab tian.

²²“Kik injuk reno, nyak haga bebuat api jama Isa sai disebut Almasih?” tanya Pilatus jama tian. “Salibko Ia!” jawab tian sunyinni.

²³“Kidang api kejahatan-Ni?” tanya Pilatus. Raduni tian mekik lebih keras lagi, “Salibko Ia!”

²⁴ Akherni Pilatus sadar bahwa ia mak dapok bebuat api-api lagi rik bahwa jelma-jelma udi halokni haga berontak. Jadi ia ngakuk way, di hadap ulun lamon ano ia ngebasuh culukni rik cawa, “Nyak mak betanggung jawab atas kematian ulun inji! Udi urusan keti!”

²⁵Sunyinni ulun lamon udi ngejawab, “Ya, tagando sekam rik anak-anak sekam nanggung hukuman atas kematian-Ni!”

²⁶Raduni Pilatus ngelepasko Barabas untuk tian, rik ngayun ulun nyambuk Isa; rik nyerahko Ia untuk disalibko.

²⁷Kak raduni prajurit-prajurit Pilatus ngusung Isa kuruk mik istana gubernur, rik sunyinni pasukan bekumpul ngelilingi Isa.

²⁸Tian ngebukak kawai Isa, rik makaiko jama Ia jubah ungu.

²⁹Tian nyani sai mahkota jak ranting-ranting sai keruwi, rik masang di ulu-Ni Isa. Raduni tian ngepikko sebatang tungkok di culuk kanan-Ni, raduni belutut di hadap-Ni rik ngereneh Ia. “Daulat Raja Ulun Yahudi!” ani tian.

³⁰Tian ngelui Ia, rik ngakuk tungkok udi, raduni mukul Ia di ulu-Ni.

³¹Seraduni ngemainko Ia, tian ngebukak jubah ungu ano raduni makaiko luot kawai-Ni tenggalan. Kak raduni Ia diusung mik luah untuk disalibko.

³²Di tengah renglaya, tian betungga jama sai jelma jak Kirene gelarni Simon. Tian maksa ulun udi memikul salib Isa.

³³Raduni tian sampai di suatu rang sai gelarni Golgota, sai retini “Rang Tengkorak”.

³⁴ Di dudi tian ngeni Isa nginum anggor sai dicampor empedu. Kidang seraduni Isa nyicipi anggor ano, Ia mak haga nginumni.

³⁵ Raduni tian nyalibko Ia, rik ngebagi-bagiko kawai-Ni secara lotre.

³⁶Radu jak seno tian mejong ngejaga Ia di disan.

³⁷Di atas ulu-Ni tian masang tulisan mengenai tuduhan tehadap-Ni, yakdo: “Injido Isa, Raja Ulun Yahudi.”

³⁸Jejama jama Ia tian nyalibko juga rua jelma penyamun; sai di kebelah kanan, sai lagi di kebelah kiri-Ni.

³⁹ Ulun-ulun sai liu di dudi ngegileng-gilengko ulu, rik ngehina Isa.

⁴⁰ Tian cawa, “Niku sai haga ngerubuhko Lamban Ibadah, rik ngebangunni delom telu rani! Kik Niku Anak Allah, regahdo jak salib udi, rik selamatko diri-Mu!”

⁴¹Injuk reno juga imam-imam kepala rik guru-guru agama rik jelma-jelma sai mimpin Yahudi ngereneh Isa. Tian cawa,

⁴²“Ia nyelamatko ulun bareh, padahal diri-Ni tenggalan Ia mak dapok selamatko! Kik Ia raja Israel, helauni Ia tano regah jak salib ano, ampai sekam haga percaya jama Ia.

⁴³ Ia percaya jama Allah, rik cawa bahwa Ia Anak Allah. Nah, ija ram liak api Allah haga nyelamatko Ia tano.”

⁴⁴Penyamun-penyamun sai disalibko jama Ia pun malah ngehina Ia juga injuk reno.

⁴⁵Waktu tengah rani, selama telu jam seluruh negeri udi jadi kelam.

⁴⁶ Pukul telu dibi, Isa mekik jama suara keras, “Eli, Eli, lama sabakhtani?” sai retini, “Ya Allah-Ku, ya Allah-Ku, mengapi Niku ninggalko Nyak?”

⁴⁷Pira-pira jelma di dudi ngedengi pekik ano, rik cawa, “Ia ngurau Elia!”

⁴⁸ Sai jak tian geluk-geluk mik ngakuk bunga karang, rik nyelupkoni mik delom anggor peros. Raduni ia nyucukko di uncuk sebatang kayu, rik ngulorko mik beber Isa.

⁴⁹Kidang ulun-ulun bareh cawa, “Tunggu, ija ram liak api Elia ratong nyelamatko Ia!”

⁵⁰Raduni Isa mekik luot jama suara keras, raduni ngehembusko napas-Ni sai penghabisan.

⁵¹ Hordeng sai tegantung di delom Lamban Ibadah cabik jadi rua jak atas sampai debah. Bumi beguyang rik gunung-gunung batu kebelah.

⁵²Kuboran-kuboran tebukak, rik lamon umat Allah sai radu mati dihurikko luot.

⁵³Tian luah jak kuboran-kuboran seraduni Isa bangkit jak kematian, rik tian kuruk mik Yerusalem. Rik di disan lamon jelma ngeliak tian.

⁵⁴Kepala pasukan jejama jama prajurit sai sedang ngejaga Isa jadi rabai nihan waktu ngeliak kukuk, rik sunyinni sai tejadi ano. Tian cawa, “Temon, Ia inji Anak Allah!”

⁵⁵ Di dudi wat juga lamon bebai sai sedang ngeliak jak jaoh. Tiando sai radu nutuk Isa untuk nulung Ia radu jak Galilea.

⁵⁶Di hantarani yakdo Maria Magdalena, Maria emakni Yakobus rik Yusuf, rik emakni anak-anak Zebedeus.

⁵⁷Bingi seno ratongdo sai jelma batin jak Arimatea, sai gelarni Yusuf. Ia juga jelma sai nutuk Isa.

⁵⁸Ia mik jama Pilatus, rik ngilu mayat Isa. Raduni Pilatus merintahko in mayat Isa dikeniko jama ia.

⁵⁹Maka Yusuf ngakuk mayat udi, rik ngebungkuskoni jama kain kafan jak linen sai ampai.

⁶⁰Raduni ia ngepikko mayat Isa di delom kuboran kedauni tenggalan sai disani di delom sai bukit batu. Radu jak seno ia ngegulingko sai batu balak nyalok rangok kubor udi, raduni mik.

⁶¹Maria Magdalena rik Maria sai bareh tinggal mejong di dudi ngehadapi kuboran udi.

⁶²Jemoh ranini, waktu rani Sabat, imam-imam kepala rik ulun-ulun Farisi mik jejama ngehadap Pilatus

⁶³ tian cawa, “Tuan, sekam ingok waktu jelma sai nipu udi masih hurik, Ia pernah cawa, ‘Radu jak telu rani Nyak haga bangkit.’

⁶⁴Ulihni seno, kayundo ulun ngejaga kuboran udi betik-betik sampai rani sai ketelu, in jelma-jelma sai nutuk Ia mak dapok maling mayat-Ni raduni cawa jama ulun-ulun bahwa Ia radu dibangkitko jak kematian. Rik penipuan sai terakher inji haga lebih burak jak sai mula-mula.”

⁶⁵“Keti ngedok tentera pengawal,” ani Pilatus jama tian, “mikdo ngejaga kuboran udi seketat mungkin.”

⁶⁶Raduni tian mik kuboran, nyegel batu penyalokni rik ngeni tukang jaga di hadapni, in mak ngedok sai ngeganggu kuboran udi.