Read Lampung Api MATIUS 4 Bible Online

MATIUS 4 - Lampung Api bible

MATIUS 4

¹ Radu seno Isa dibimbing ulih Ruh Allah mik padang gurun untuk dicubai ulih iblis.

²Epak puluh rani pak puluh bingi Isa mak mengan. Raduni Ia ngerasa mebetoh.

³Iblis ratong rik cawa, “Niku Anak Allah, bukan? Nah, kayunko batu-batu inji jadi ruti.”

⁴ Isa ngejawab, “Di delom Alkitab tetulis: Manusia mak dapok hurik jak ruti gaoh, kidang juga jak unggal cawa sai diucakko ulih Allah.”

⁵Radu jak seno iblis ngusung Isa mik Yerusalem, kota suci, rik ngepikko Ia di atas ubung-ubung Lamban Ibadah.

⁶ Raduni iblis cawa jama Ia, “Niku Anak Allah, bukan? Kik injuk reno, terjundo mik debah; mani di delom Alkitab wat tetulis injuk reji, ‘Allah haga ngayun malaikat-malaikat-Ni ngelindungi Niku, tian haga nyambut Niku jama culuk tian, in cukut-Mu pun mak nilut batu.’ ”

⁷ Isa ngejawab, “Kidang di delom Alkitab tetulis juga, ‘Dang niku nyubai Tuhan Allahmu.’ ”

⁸Kak raduni iblis ngusung Isa luot mik gunung sai langgar nihan rik nunjukko jama Ia sunyinni kerajaan dunia jama sunyin kebatinanni.

⁹Raduni iblis cawa jama Isa, “Sunyinni inji haga kukeniko jama Niku, kik Niku sujud nyumbah nyak.”

¹⁰ Isa ngejawab, “Kisit niku, hai Pengguda! Delom Alkitab tetulis: Sumbahdo Tuhan, Allahmu, rik layannido Ia gaoh!”

¹¹Akherni iblis ninggalko Isa, rik malaikat-malaikat pun ratong ngelayani Ia.

¹² Waktu ngedengi bahwa Yohanes dikurukko mik delom bui, Isa nyingker mik di Galilea.

¹³ Ia ninggalko Nazaret, raduni tinggal di Kapernaum di pingger Danau Galilea di daerah Zebulon rik Naftali.

¹⁴Mani Isa ngelakuko hal seno, tejadido api sai diucakko Nabi Yesaya:

¹⁵ “Tanoh Zebulon rik tanoh Naftali, di renglaya mik danau, seberang Way Yordan, Galilea tanoh ulun lain Yahudi!

¹⁶Bangsa sai hurik di delom kekelaman radu ngeliak terang sai cemerlang! Bagi sai tinggal delom negeri kekelaman maut radu terbit cahaya terang!”

¹⁷ Jak waktu seno Isa mulai ngabarko, “Betubatdo jak dusa-dusamu, mani Allah haga geluk memerintah sebagai Raja!”

¹⁸Waktu Isa lagi lapah di pantai Danau Galilea, Ia ngeliak rua nelayan, yakdo Simon (sai dikeni gelar juga Petrus) jama adikni, Andreas. Tian sedang nangkok iwa di danau udi jama jala.

¹⁹Isa cawa jama tian, “Ija tutuk Nyak. Nyak haga ngajar keti ngejala jelma.”

²⁰Langsung tian ninggalko jala tian raduni nutuk Isa.

²¹Isa lapah terus, raduni ngeliak muneh rua jelma muari sai bareh, yakdo Yakobus rik Yohanes, anak-anak Zebedeus. Tian jejama jama bakni tian sedang nguyunko jala delom jukung. Isa ngurau tian juga,

²²rik tian langsung ninggalko jukung rik bak tian, raduni nutuk Isa.

²³ Di Galilea, Isa bekeliling di sunyinni negeri rik ngajar di lamban-lamban ibadah. Ia ngabarko Kabar Betik bahwa Allah haga memerintah. Rik Ia juga ngunyaiko jelma-jelma sai meruyuh rik cacat.

²⁴Kabar tentang Isa ano tesiar di sunyinni negeri Siria, sehingga lamon jelma ratong jama Ia. Tian ngusung jelma-jelma sai menderita sunyin macam penyakik rik kesusahan. Jelma-jelma sai kekurukan ruh jahat, sai sakik ayan, rik sai lumpuh, sunyinni dimunyaiko ulih Isa.

²⁵Lamon nihan jelma sai nutuk Isa pada waktu seno. Wat sai ratong jak Galilea, wat sai jak Puluh Kota, jak Yerusalem, jak Yudea, rik wat muneh sai jak negeri di seberang Yordan.