Read Lampung Api MATIUS 7 Bible Online

MATIUS 7 - Lampung Api bible

MATIUS 7

¹“Dang hak ngehakimi jelma bareh, in keti tenggalan juga dang dihakimi ulih Allah.

² Mani injuk repa keti ngehakimi jelma bareh, injuk reno juga Allah haga ngehakimi keti. Rik ukoran sai keti pakai untuk ulun bareh, haga dipakai juga ulih Allah untuk keti.

³Mengapi keti ngeliak secuil kayu delom mata puarimu, sedangko balok delom matamu tenggalan mak keti perhatiko?

⁴Injuk repa keti dapok ngucakko jama puarimu, ‘Ija kuluahko kayu secuil ano jak matamu,’ sedangko di delom matamu tenggalan wat balok?

⁵Hai munafik! Luahko pai balok jak matamu tenggalan, ampai niku ngeliak jelas, rik dapok ngeluahko secuil kayu jak mata puarimu.

⁶Dang keniko barang sai suci jama kaci, in kaci udi dang bebalik rik nyerang niku. Rik dang keniko mutiara jama babui, in babui udi dang ngilik-ngilik mutiara udi.”

⁷“Kiludo, maka keti haga nerima. Sepokdo, maka keti haga mansa. Ketukdo, maka rangok haga dibukakko untuk niku.

⁸Mani jelma sai ngilu haga nerima; jelma sai nyepok haga mansa; rik jelma sai mengetuk, haga dibukakko rangok.

⁹Di hantara keti api wat bak sai ngeniko batu jama anakni, kik ia ngilu ruti?

¹⁰Atau ngeniko ulai, kik ia ngilu iwa?

¹¹Walaupun keti jahat, keti pandai juga ngeni sai betik jama anak-anakmu. Apilagi Bapamu di surga! Ia lebih lagi haga ngeniko sai betik jama jelma sai ngilu jama Ia.

¹² Perlakukodo jelma bareh injuk keti mirak diperlakuko ulih tian. Udido inti hukum Musa rik ajaran nabi-nabi.”

¹³“Kurukdo ngeliu rangok sai pelik, mani rangok rik renglaya sai nuju mik neraka balak rik berak, rik lamon jelma sai ngeliuni.

¹⁴Kidang pelik rik payahdo rangok rik renglaya sai ngusung jelma mik jama hurik. Rik angkah cutik jelma sai ngehaluni.”

¹⁵“Hati-hatido tehadap nabi-nabi palsu. Tian ratong jama keti bekedok biri-biri, kidang tian sebenorni injuk serigala sai buas.

¹⁶Keti haga kenal tian jak hasil perbuatanni. Semak keruwi mak ngeluahko uah anggor, rik semak keruwi mak ngehasilko uah ara.

¹⁷Jak batang sai subor dihasilko uah sai betik, rik jak batang sai mak subor uahni sai burak.

¹⁸Batang sai subor mak dapok ngehasilko uah sai burak, rik batang sai mak subor mak dapok ngehasilko uah sai betik.

¹⁹ Unggal batang sai mak ngehasilko uah sai betik, dipelok rik disuah.

²⁰ Injuk reno muneh jama nabi-nabi palsu. Keti haga kenal tian jak hasil perbuatanni.”

²¹“Mawat sunyinni jelma sai ngurau Nyak, ‘Tuhan, Tuhan,’ haga jadi anggota umat Allah, kidang angkah jelma-jelma sai ngelakuko kehaga-Ni Bapa-Ku sai di surga.

²²Waktu Rani Kiamat lamon jelma haga cawa jama Nyak, ‘Tuhan, Tuhan, bukankah jama gelar-Mu sekam radu nyampaiko luhot-Ni Allah? Rik bukankah jama gelar Tuhan juga sekam radu nguser ruh-ruh jahat rik ngadako lamon keajaiban?’

²³ Kidang Nyak haga ngejawab, ‘Nyak mak pernah kenal keti! Mikdo jak ija, keti sai ngelakuko kejahatan!’ ”

²⁴“Nah, jelma sai ngedengi cawa-Ku inji, rik nurut, gegoh injuk jelma bijak sai ngebangun lambanni di atas batu.

²⁵Pada waktu labung ratong, rik way banjer ratong rik angin badai memukul lamban udi, lamban udi mak rubuh mani radu dibangun di atas batu.

²⁶Rik jelma sai ngedengi cawa-Ku inji, kidang mak nurut, ia gegoh injuk jelma bugu sai ngebangun lambanni di atas heni.

²⁷Pada waktu labung ratong, rik way banjer ratong rik angin badai memukul lamban udi, lamban udi rubuh. Rik cadangni hibat nihan!”

²⁸ Akherni Isa selesai ngajar, rik jelma-jelma sai wat di dudi hiran nihan ngedengi ajaran-Ni.

²⁹Mani Ia ngajar jama wibawa, mak injuk guru-guru agama tian.