Read Lampung Api MATIUS 8 Bible Online

MATIUS 8 - Lampung Api bible

MATIUS 8

¹Isa regah jak bukit, rik lamon jelma nutuk Ia.

²Pada waktu seno ratongdo sai jelma bepenyakik kusta. Ia belutut di hadapan Isa, terus cawa, “Pak, kik Bapak haga, Bapak dapok ngunyaiko nyak.”

³Isa nyating jelma udi sambil cawa, “Nyak haga. Munyaido!” Waktu seno juga penyakikni lebon.

⁴ Raduni cawa Isa jama ia, “Ingokdo! Dang cerita jama sapa pun. Kidang mikdo jama imam, rik ngilu ia untuk memastiko niku radu munyai. Radu jak seno persembahko kurban sai diperintahko Musa, sebagai bukti jama jelma-jelma bahwa niku temon-temon radu munyai!”

⁵Waktu Isa kuruk mik Kapernaum, sai perwira Roma ratong ngehadap Ia, rik ngilu tulung jama Ia.

⁶“Bapak,” ani perwira udi, “jelma sai ngelayani nyak meruyuh di lamban. Ia pedom lumpuh di rang pedom rik menderita nihan.”

⁷Ani Isa, “Nyak haga mik ngunyaiko ia.”

⁸“Mak perlu Pak,” jawab perwira udi, “Nyak mak patut nerima Bapak di lambanku. Bapak perintahko gaoh. Kanah jelma sai ngelayani nyak ano munyai.

⁹Mani nyak pun haga tunduk jama perintah atasan. Rik di debahku wat juga prajurit-prajurit sai haga tunduk jama perintahku. Kik nyak ngayun sai prajurit, ‘Mik!’ ia pun mik. Nyak ngucakko jama sai bareh, ‘Mik dija!’ ia pun ratong; rik kik nyak merintahko jelma sai ngebantuku, ‘Sanido inji!’ ia pun nyanini.”

¹⁰Waktu Isa ngedengi api sai diucakko ulih perwira udi, Ia kagum nihan. Raduni Ia cawa jama jelma-jelma sai sedang nutuk Ia, “Bukan main jelma inji. Di hantara jelma Israel pun makkung pernah Nyak ngehalu iman sebalak inji!

¹¹ Temon! Lamon jelma haga ratong jak timur rik barat untuk besenang-senang jejama Abraham, Ishak, rik Yakub di delom Dunia Ampai Allah.

¹² Padahal jelma-jelma sai seharusni jadi umat Allah haga ditokko mik kekelaman di luah. Di dudi tian haga miwang rik menderita.”

¹³Raduni Isa cawa jama perwira udi, “Mulangdo, api sai niku percaya ano haga tejadi.” Rik saat seno juga jelma sai ngelayani ia ano munyai.

¹⁴Isa mik lamban Petrus. Di dudi Ia ngeliak emak mentuha Petrus sedang meruyuh di rang pedom.

¹⁵Isa nyating culukni, raduni ruyuhni lebon. Ia minjak rik mulai ngelayani Isa.

¹⁶Pada waktu mulai dibi, jelma ngusung mik jama Isa lamon jelma sai kekurukan ruh jahat. Rik jama sepatoh cawa gaoh, Isa nguser ruh-ruh jahat udi rik ngunyaiko juga sunyinni jelma sai meruyuh.

¹⁷ Isa ngelakuko sunyinni seno, rik sunyinni udi tejadido api sai diucakko ulih Nabi Yesaya, yakdo, “Ia nanggung penderitaan neram rik ngunyaiko penyakik neram.”

¹⁸Wat lamon nihan jelma di sekeliling Isa. Waktu Isa ngeliak tian sunyinni, Ia ngayun jelma-jelma sai nutuk Ia nyeberangi danau.

¹⁹Raduni sai guru agama ratong jama Ia rik cawa, “Bapak Guru, nyak haga nutuk Bapa mik dipa gaoh!”

²⁰Isa ngejawab, “Serigala wat lubang, rik burung ngedok sarang, kidang Anak Manusia mak ngedok rang pedom.”

²¹Raduni sai jelma sai nutuk Ia sai bareh cawa, “Pak, izinko nyak mulang pai untuk nguborko bakku.”

²²Kidang Isa ngejawab, “Tutukdo Nyak, rik tagando ulun mati nguborko ulun matini tenggalan.”

²³Isa cakak mik jukung rik jelma-jelma sai nutuk Ia nutuk jejama Ia.

²⁴Tiba-tiba angin badai sai hibat nihan melanda danau hingga jukung dipukul umbak. Pada waktu seno Isa sedang pedom.

²⁵Maka jelma-jelma sai nutuk Ia mik jama Ia rik ngegurah Ia. “Pak! Tulung! Ram celaka!” cawa tian.

²⁶“Mengapi keti merabai?” cawa Isa. “Keti kurang percaya jama Nyak!” Kak raduni Isa cecok rik ngebentak angin rik danau udi. Raduni danau udi tenang nihan.

²⁷Jelma-jelma sai nutuk Isa hiran. Tian cawa, “Jelma api Ia inji, sampai angin rik umbak pun nutuk perintah-Ni!”

²⁸Isa sampai mik seberang danau di daerah Gadara. Di dudi rua jelma sai kekurukan ruh jahat ratong jama Ia. Kerua jelma udi ganas nihan, sehingga mak sai jelma pun bani liu di dudi.

²⁹Tian luah jak guha-guha kuboran rik mekik, “Anak Allah, haga Niku apiko sekam? Api Niku radu haga nyiksa sekam walaupun makkung waktuni?”

³⁰Mak jaoh jak udi, wat lamon nihan babui sedang nyepok kanikan.

³¹Ruh-ruh udi ngilu jama Isa, “Kik Niku haga ngayun sekam luah, kayundo sekam kuruk mik delom babui-babui udi.”

³²“Kisit!” ani Isa. Ruh-ruh jahat udi mik jak kerua jelma udi, raduni kuruk mik delom babui-babui. Rik babui-babui udi pun tegar rik terjun jak pingger rulah mik delom danau, raduni tebenam.

³³Penjaga-penjaga babui udi tegar mik kota, rik nyeritako sunyinni kejadian udi, juga mengenai api sai tejadi jama kerua jelma sai kekurukan ruh jahat udi.

³⁴Maka sunyinni jelma sai di kota udi pun mik nungga Isa. Waktu tian ngeliak Isa, tian ngilu nihan in Ia ninggalko daerah tian.