Read Lampung Api MATIUS 9 Bible Online

MATIUS 9 - Lampung Api bible

MATIUS 9

¹Isa cakak mik delom jukung, raduni nyeberangi danau, muloh mik pekon-Ni.

²Di dudi ulun ngusung jama Ia sai jelma lumpuh pepedoman di apai. Waktu Isa ngeliak hara balak iman jelma udi, Ia cawa jama jelma lumpuh udi, “Tabahdo, anak-Ku! Dusa-dusamu radu diampuni.”

³Pira-pira guru agama sai wat di dudi cawa delom hati, “Jelma inji ngehina Allah!”

⁴Isa pandai pikeran tian, jadi Ia cawa, “Mengapi pikeranmu sejahat ano?

⁵Sepa sai lebih mudah: ngucakko, ‘Dusamu radu diampuni’, atau ngucakko, ‘Minjakdo rik lapahdo’?

⁶Kidang tano Nyak haga ngebuktiko jama niku bahwa di atas bumi inji Anak Manusia bekuasa untuk ngampuni dusa.” Raduni Isa cawa jama jelma lumpuh udi, “Minjak, iwakko apaimu rik mulangdo!”

⁷Jelma lumpuh udi pun minjak rik mulang mik lambanni.

⁸Waktu jelma-jelma ngeliak kejadian udi, tian kerabaian rik memuji Allah, mani Allah radu ngeniko kuasa sai reno balak jama manusia.

⁹Kak raduni Isa ninggalko rang udi. Sementara lapah, Ia ngeliak sai jelma tukang tagih pajak, gelarni Matius, sedang mejong di kantor pajakni. Isa cawa jama ia, “Ija nutuk Nyak!” Maka Matius cecok rik nutuk Isa.

¹⁰ Waktu Isa sedang mengan di lamban Matius, ratongdo lamon tukang tagih pajak rik jelma-jelma sai dianggap mak betik ulih masyarakat, nutuk mengan jama-jama Isa rik jelma-jelma sai nutuk Ia.

¹¹Wat jelma-jelma Farisi sai ngeliak hal seno. Rik tian betanya jama jelma-jelma sai nutuk Isa, “Api mani gurumu mengan jejama jama tukang tagih pajak rik jelma-jelma mak betik?”

¹²Isa ngedengi pertanyaan tian raduni ngejawab, “Jelma sai sihat mak memerluko dokter, angkah jelma sai meruyuh gaoh.

¹³ Selidikido api retini ayat Alkitab inji: ‘Nyak ngehagako belas kesian, rik lain hak kurban binatang’. Mani Nyak ratong lain hak untuk ngurau jelma sai nganggap dirini radu betik, melainko jelma sai dianggap hina.”

¹⁴Radu jak seno jelma-jelma sai nutuk Yohanes Pembaptis ratong jama Isa. Raduni tian betanya, “Mengapi sekam rik ulun-ulun Farisi bepuasa sedang jelma-jelma sai nutuk Bapak mawat?”

¹⁵Isa ngejawab, “Injuk repa pendapat keti? Dapok mak kuari-kuari di pesta kawin besedih hati kik kemantin masih wat jama-jama tian? Tantu mawat! Kidang haga ratong waktuni kemantin ano diakuk jak tian. Waktu seno ampai tian bepuasa.

¹⁶Mak ngedok jelma sai nambal kawai sai radu tuha jama sepotong kain sai masih ampai. Mani kain penambal udi haga menciut rik nyabikko kawai ano, sehingga ngakibatko cabik sai lebih balak.

¹⁷Reno muneh mak ngedok jelma sai nuangko anggor ampai mik delom kantong bawak sai tuha. Mani kantong udi haga pecoh rik cadang, raduni anggor tetok. Anggor ampai haga dituang mik delom kantong sai ampai juga, in rua-ruani tetap betik.”

¹⁸Sementara Isa cawa jama jelma-jelma sai nutuk Yohanes Pembaptis, ratongdo sai jelma sai mimpin lamban ibadah. Ia belutut dihadap Isa rik cawa, “Anak bebaiku ampai gaoh mati. Kidang, tulung pai ratong untuk nyating in ia hurik lagi.”

¹⁹Isa minjak rik jejama jelma-jelma sai nutuk Ia mik jama jelma udi.

²⁰Di tengah renglaya sai bebai sai radu rua belas tahun sakani meruyuh ngeluahko rah sai behubungan jama mekamakni, ratong ngeredik Isa jak kudan. Ia bepiker, “Asal gaoh nyak nilut jubah-Ni, nyak haga munyai.” Raduni ia nilut uncuk jubah Isa.

²²Waktu seno Isa ngerilong rik ngeliak bebai ano raduni cawa jama ia, “Tabahdo, anak-Ku! Mani niku percaya jama Nyak, niku munyai!” Pada waktu seno juga bebai seno munyai.

²³Kak raduni Isa sampai di lamban jelma sai mimpin lamban ibadah udi. Waktu Ia ngeliak jelma-jelma sai main musik perkabungan rik lamon jelma-jelma sai ribut-ribut,

²⁴Ia cawa jama tian, “Luah niku sunyinni! Sanak inji mak mati; ia angkah pedom.” Tian sunyinni ngelalangko Isa.

²⁵Seraduni jelma-jelma udi luah, Isa kuruk mik delom kamar sanak udi rik nyating culukni. Raduni minjakdo sanak bebai udi.

²⁶Kabar seno tesebar mik sunyinni daerah ano.

²⁷Isa mik jak udi rik di tengah renglaya rua jelma buta nutuk Ia. Tian mekik, “Anak Daud, kesiando jama sekam!”

²⁸Waktu Isa kuruk mik delom lamban, kerua jelma buta udi ratong jama Ia. Isa betanya jama tian, “Api keti percaya bahwa Nyak dapok ngunyaiko keti?” “Percaya, Pak!” jawab tian.

²⁹Raduni Isa ngejamah mata tian sambil cawa, “Mani keti percaya, jadido api sai keti harapko.”

³⁰Maka tian dapok ngeliak. Isa tegas-tegas ngingokko tian, in dang ngeni pandai hal seno jama sapa pun.

³¹Kidang tian mik rik nyiarko kabar tentang Isa mik sunyinni daerah.

³²Waktu kerua jelma udi mik, sai jelma bisu sai dikuasai ruh jahat diusung jama Isa.

³³Isa nguser ruh jahat udi rik pada waktu seno juga jelma udi dapok cawa luot. Jelma lamon udi hiran rik cawa, “Makkung pernah sekam ngeliak kejadian gegoh inji di Israel!”

³⁴ Kidang jelma-jelma Farisi cawa, “Kepala ruh-ruh jahatdo sai ngeni Ia kuasa untuk nguser ruh-ruh jahat udi.”

³⁵ Injuk rejido Isa mik bekeliling jak sai kota mik kota bareh rik jak sai pekon mik pekon sai bareh. Ia ngajar di lamban-lamban ibadah, rik ngabarko Kabar Betik tentang repa Allah memerintah sebagai Raja. Ia ngunyaiko jelma-jelma sai menderita sunyin macam penyakik rik cacat badan.

³⁶ Waktu Isa ngeliak ulun lamon udi, Ia kesian jama tian, mani tian kebingungan rik mak bedaya, injuk biri-biri sai mak ngedok gembala.

³⁷ Raduni Isa cawa jama jelma-jelma sai nutuk Ia, “Panenni lamon, kidang tukang ngakuk uahni angkah cutik.

³⁸Ulihni seno ngiludo jama sekedau kebun udi in ngirim tukang ngakuk uah untuk panenni.”