Read Lampung Api MARKUS 1 Bible Online

MARKUS 1 - Lampung Api bible

MARKUS 1

¹Injido Kabar Betik tentang Isa Almasih, Anak Allah.

² Kabar Betik ano mulai injuk sai ditulis ulih Nabi Yesaya, reji, “ ‘Injido utusan-Ku,’ ani Allah; ‘Nyak ngutus ia lebih mena jak Niku, in ia ngebukak renglaya untuk-Mu.’

³ Wat jelma beseru-seru di padang heni, ‘Siapko renglaya untuk Tuhan; ratako renglaya-renglaya sai diliu-Ni.’ ”

⁴Injuk sai tetulis ano, injuk renodo juga muncul Yohanes di padang gurun. Ia ngebaptis jelma rik nyampaiko kabar jak Allah. “Niku haga betubat jak dusa-dusamu rik haga dibaptis, in Allah ngampuni niku,” reno cawa Yohanes.

⁵Sunyinni ulun jak negeri Yudea rik kota Yerusalem mik ngedengi Yohanes. Tian ngaku dusa-dusa tian, rik Yohanes ngebaptis tian di Way Yordan.

⁶ Yohanes makai kawai jak bulu unta. Ikok tengahni jak bawak, rik kanikanni belalang rik madu pulan.

⁷Ia ngabarko kabar inji, “Kanah radu jak nyak, haga ratong jelma sai lebih balak jak nyak. Untuk ngebungkuk ngebuka tali sepatu-Ni pun, nyak mak layak.

⁸Nyak ngebaptis niku jama way, kidang Ia haga ngebaptis niku jama Ruh-Ni Allah.”

⁹Pada waktu seno Isa ratong jak Nazaret di daerah Galilea, rik Yohanes ngebaptis Ia di Way Yordan.

¹⁰Reno Isa luah jak way udi, Ia ngeliak langit tebukak rik Ruh Allah regah injuk burung merpati mik di atas-Ni.

¹¹ Raduni kedengian suara-Ni Allah ngucakko, “Nikudo Anak-Ku sai Kukasihi. Niku nyenangko hati-Ku.”

¹²Langsung radu jak seno Ruh-Ni Allah nyani Isa mik di padang gurun.

¹³Epak puluh rani Ia wat di dudi, dicubai ulihni iblis. Binatang-binatang liar wat juga jejama Ia di dudi, rik malaikat-malaikat ngelayani Ia.

¹⁴Seraduni Yohanes kuruk bui, Isa mik di Galilea, rik ngabarko Kabar Betik jak Allah di dudi.

¹⁵ Cawa-Ni, “Allah geluk haga mulai memerintah. Betubatdo jak dusa-dusamu, rik percayado jama Kabar Betik sai jak Allah!”

¹⁶Waktu Isa lapah di pantai Danau Galilea, Ia ngeliak rua nelayan, yakdo Simon rik adikni Andreas. Tian sedang nangkok iwa di danau udi jama jala.

¹⁷Isa cawa jama tian, “Tutukdo Nyak. Nyak haga ngajar keti ngejala jelma.”

¹⁸Langsung tian ninggalko jala tian raduni nutuk Isa.

¹⁹Isa lapah terus, raduni ngeliak muneh rua jelma muari sai bareh, yakdo Yakobus rik Yohanes, anak-anakni Zebedeus. Tian wat di delom jukung, rik sedang nguyunko jala tian.

²⁰Isa langsung ngurau tian. Rik tian ninggalko bak tian di delom jukung jejama jama ulun upahanni. Radu tian mik nutuk Isa.

²¹Isa rik jelma-jelma sai nutuk Ia sampai di kota Kapernaum. Waktu rani Sabat berikutni, Isa kuruk mik delom lamban ibadah rik mulai ngajar.

²² Jelma-jelma sai ngedengi-Ni kagum jama cara Ia ngajar. Mani, Ia ngajar jama wibawa, mak injuk guru-guru agama.

²³Pada waktu seno sai jelma kekurukan ruh jahat kuruk mik delom lamban ibadah, rik mekik,

²⁴“Hai Isa, ulun Nazaret, Niku haga nyani api jama sekam? Niku ratong untuk ngebinasako sekam? Nyak pandai sapa Niku: Nikudo utusan sai suci jak Allah!”

²⁵“Hema!” bentak Isa jama ruh udi, “luahdo jak jelma inji!”

²⁶Maka ruh jahat udi ngeguncang-guncangko ulun udi keras-keras, raduni luah jak ulun udi sambil mekik.

²⁷Sunyinni hiran nihan, sehingga tian cawa peperda tian, “Wah, api inji? Suatu pengajaran sai ampai! Jama wibawa rik kuasa Ia memerintahko ruh-ruh jahat luah, rik tian taat jama Ia!”

²⁸Maka kabar tentang Isa tesebar geluk mik sunyinni daerah Galilea.

²⁹Isa rik jelma-jelma sai nutuk Ia ninggalko lamban ibadah udi, rik mik di lamban Simon rik Andreas. Yakobus rik Yohanes mik juga jejama tian.

³⁰Emak mentuha Simon lagi meruyuh di rang pedom. Jadi waktu Isa mik, jelma-jelma sai nutuk Ia kuruk mik lamban udi, Isa dikeni pandai tentang hal udi.

³¹Maka Isa mik jama emak mentuha Simon, rik nyating culukni, raduni nulung ia minjak. Ruyuhni lebon, rik ia pun mulai ngelayani tian.

³²Dibi ranini, radu matarani tebenam, jelma-jelma ngusung jama Isa sunyin jelma sai meruyuh rik sai kekurukan ruh jahat.

³³Sunyinni penduduk kota udi bekerumun di hadap lamban udi.

³⁴Raduni Isa ngunyaiko lamon jelma sai menderita macam-macam penyakik, rik nguser juga lamon ruh jahat. Ia mak ngizinko ruh-ruh jahat udi cawa, mani tian pandai sapa Ia.

³⁵Jemoh ranini, waktu masih subuh, Isa minjak raduni ninggalko lamban. Ia mik rang sai mangi di luah kota, rik bedua di disan.

³⁶Kidang Simon rik kantik-kantikni mik nyepok Ia.

³⁷Rik radu tian ngehalu-Ni, tian cawa, “Sunyinni jelma sedang nyepok Bapak.”

³⁸Kidang Isa ngejawab, “Ija ram nerusko lapah ram mik kota-kota bareh di sekitar dija. Nyak haga bekhotbah di dudi juga, ulihni senodo maksudni Nyak mik dija.”

³⁹ Ulihni seno Isa mik dipa-dipa di sunyinni Galilea, rik bekhotbah di lamban-lamban ibadah rik nguser ruh-ruh jahat.

⁴⁰Sai jelma sai bepenyakik kusta ratong jama Isa. Jelma udi belutut, rik cawa, “Kik Bapak haga, Bapak dapok ngunyaiko nyak.”

⁴¹Isa kesian jama ulun udi. Jadi, Ia ngejamah ulun udi sambil cawa, “Nyak haga, munyaido!”

⁴²Waktu seno juga penyakikni lebon rik ia munyai.

⁴³Raduni Isa ngayun ia mik jama peringatan inji,

⁴⁴ “Awas, dang nyeritako jama sapa pun, kidang mikdo jama imam, rik kilu ia untuk memastiko niku radu munyai. Raduni untuk kemunyaianmu ano, persembahko kurban nutuk sai diperintahko Musa, sebagai bukti jama jelma-jelma bahwa niku temon-temon radu munyai.”

⁴⁵Kidang ulun udi mik, rik terus-menerus nyeritako kejadian ano di dipa-dipa sampai Isa mak dapok kuruk kota jama terang-terangan. Ia angkah tinggal di luah kota di rang-rang sai mangi. Kidang jelma terus gaoh ratong jama Ia jak ipa-ipa.