Read Lampung Api MARKUS 11 Bible Online

MARKUS 11 - Lampung Api bible

MARKUS 11

¹Waktu radu redik Yerusalem, tian sampai di kota Betfage rik Betania, di lireng Bukit Zaitun. Di dudi rua jelma sai nutuk Ia diutus lebih mena ulih Isa.

²“Mikdo di pekon sai di hadap udi,” ani Isa jama tian. “Reno keti kuruk pekon udi, keti haga ngeliak sai anak keledai lagi teikok, sai makkung pernah ditunggangi jelma. Lepasko keledai udi rik usung mik dija.

³Rik kik wat ulun betanya jama niku api mani keti ngelepasko keledai udi, ucakko, ‘Tuhan memerlukoni, rik Ia geluk haga ngulohkoni.’ ”

⁴Kerua jelma sai nutuk Isa udi pun mik, rik ngehalu sai anak keledai lagi teikok di rangok lamban di pingger renglaya. Maka tian ngelepasko keledai udi.

⁵Ulun-ulun sai cecok di dudi betanya jama tian, “Hui, sedang api keti? Mengapi ngelepasko anak keledai udi?”

⁶Tian ngejawab injuk sai radu dicawako ulih Isa jama tian. Maka ulun-ulun udi naganko tian ngusung keledai udi.

⁷Waktu sampai jama Isa, tundun keledai udi tian alasi jama jubah tian, raduni Isa cakak di atasni.

⁸Lamon ulun ngebentangko jubah tian di renglaya, wat juga sai nyebarko di tengah renglaya ranting-ranting batang sai tian akuk jak kebun.

⁹ Ulun-ulun sai lapah di hadap rik ulun-ulun sai nutuk jak kudan, sunyinni beseru-seru, “Pujido Allah! Diberkatido Ia sai ratong atas gelar Tuhan!

¹⁰Hurikdo pemerintahan-Ni sai haga ratong — pemerintahan Daud nenek muyang neram! Pujido Allah Sai Mahatinggi!”

¹¹Akherni Isa sampai di Yerusalem, raduni kuruk di Lamban Ibadah. Di dudi Ia memperhatiko di sekeliling-Ni. Kidang mani radu hamper kelam, Ia berangkat mik Betania jejama jama kerua belas jelma sai nutuk Ia.

¹²Jemoh ranini, waktu tian sedang lapah luah jak Betania, Isa mebetoh.

¹³Jak jaoh Ia ngeliak sai batang ara sai bulungni lamon. Jadi Ia mik di batang udi untuk ngeliak api wat uahni. Kidang waktu Ia sampai di batang udi, Ia mak ngehalu api-api, kecuali bulung-bulung gaoh, mani pada waktu seno makkung musim uah ara.

¹⁴Raduni Isa cawa jama batang ara udi, “Mulai tano mak ngedok sai jelma pun sai haga nganik uah jak niku lagi!” Jelma-jelma sai nutuk Isa ngedengi cawa udi.

¹⁵Kak raduni tian sampai di Yerusalem, rik Isa mik luot di Lamban Ibadah. Di dudi Ia mulai nguser sunyinni jelma sai bedagang di rang udi. Ia ngejungker balikko mija-mija tukang tukor duit, rik bangku-bangku penjual burung merpati.

¹⁶Rik mak sai jelma pun sai diizinko-Ni ngusung api gaoh ngeliu tengebah Lamban Ibadah udi.

¹⁷ Raduni Isa ngajar ulun-ulun di dudi. Ia cawa, “Di delom Alkitab tetulis injuk reji: Allah cawa, ‘Lamban-Ku haga disebut lamban rang bedua untuk sunyin bangsa.’ Kidang keti ngejadikoni sarang penyamun!”

¹⁸Imam-imam kepala rik guru-guru agama ngedengi cawa seno. Maka tian mulai nyepok renglaya untuk ngebunuh Isa. Tian rabai jama Ia, mani sunyinni jelma kagum ngedengi ajaran-Ni.

¹⁹Ngejelang di bingi, Isa rik jelma-jelma sai nutuk Ia ninggalko kota ano.

²⁰Pagi-pagi jemoh ranini, waktu tian ngeliu batang ara udi, tian ngeliak batang udi radu mati sampai bakak-bakakni.

²¹Raduni Petrus ingok jama peristiwa serani semakkungni. Maka Petrus cawa jama Isa, “Bapak Guru, cuba liak! Batang ara sai Bapak kutuk udi radu mati!”

²²Isa ngejawab, “Percayado jama Allah.

²³ Sangun keti dapok cawa jama bukit inji, ‘Teiwakdo rik tetokdo mik delom laok!’ maka hal udi haga dilakuko bagi keti; asal keti mak ragu-ragu, rik keti percaya bahwa sai keti cawako ano haga benor-benor tejadi.

²⁴Ulihni seno ingokdo inji: Kik keti bedua rik ngilu sai hal, percayado bahwa Allah radu ngeniko jama niku api sai keti kilu, maka keti haga nerimani.

²⁵ Rik kik keti bedua, kidang hatimu mak senang tehadap sai jelma, ampunido pai ulun udi, in Bapamu di surga juga ngampuni dusa-dusamu. [

²⁶Kik keti mak ngampuni ulun bareh, Bapamu di surga juga mak haga ngampuni dusa-dusamu.]”

²⁷Tian muloh luot mik Yerusalem. Rik pada waktu Isa lapah bekeliling di delom Lamban Ibadah, imam-imam kepala, guru-guru agama rik jelma-jelma sai mimpin Yahudi ratong jama Ia.

²⁸Tian betanya, “Atas dasar api Niku ngelakuko sunyinni inji? Sapa sai ngeni hak ano jama Niku?”

²⁹Isa ngejawab, “Nyak juga haga betanya jama keti. Jawabdo rik Nyak haga ngucakko jama niku jama hak sapa Nyak ngelakuko hal-hal inji.

³⁰Yohanes ngebaptis jama hak sapa, Allah atau manusia?”

³¹Raduni imam-imam kepala rik jelma-jelma sai mimpin Yahudi mulai berunding di hantara tian. Tian cawa, “Kik ram ucakko, ‘Jama hak-Ni Allah,’ Ia haga cawa, ‘Mengapi keti mak percaya jama Yohanes?’

³²Kidang sulit juga untuk cawa, ‘Jama hak manusia.’ ” Mani tian rabai jama ulun lamon, mani sunyinni jelma nganggap Yohanes nabi.

³³Jadi, tian ngejawab, “Sekam mak pandai.” Raduni Isa cawa jama tian, “Kik injuk reno, Nyak pun mak haga ngucakko jama niku jama hak sapa Nyak ngelakuko sunyinni inji.”